Müstəqillik hər bir xalqın ən

böyük neməti, varlığının təsdiqidir

“Azadlıq və istiqlaliyyət hər bir xalqın milli sərvətidir” söyləyən ulu öndər Heydər Əliyev vurğulayırdı ki, hər bir qurtuluşun əsasını milli azadlıq təşkil edir.

Müasir Azərbaycanın salnaməsində siyasi əhəmiyyəti, şərəfli tarixi ilə seçilən əlamətdar hadisələr çoxdur. Belə şanlı günlərdən biri də xalqımızın həmişə arzusunda olduğu və birliyi, həmrəyliyi ilə əldə etdiyi Dövlət Müstəqilliyi Günüdür.

XX əsrin sonlarında Azərbaycan dövlət müstəqilliyini bərpa etdi. 1991-ci il oktyabrın 8-də Azərbaycanın keçmiş Ali Sovetinin növbədənkənar sessiyasında aparılan müzakirələrin məntiqi nəticəsi kimi on gündən sonra Dövlət müstəqilliyi haqqında Konstitusiya Aktı qəbul edilsə də suverenliyimizin əbədiliyi “Müstəqillik yolu qədər çətin yol yoxdur... Müstəqilliyin əldə olunması nə qədər çətindirsə, onun saxlanılması, daimi, əbədi olması bundan da çətindir” söyləyən ümummilli lider Heydər Əliyevin adı ilə bağlıdır. “Milli azadlığa nail olmaq üçün milli oyanış, milli dirçəliş, milli ruhun canlanması lazımdır” sözləri ilə müstəqilliyi hər bir xalqın tarixi neməti adlandıran, “Azadlıq və istiqlaliyyət hər bir xalqın milli sərvətidir” söyləyən Ulu Öndər onu da vurğulayırdı ki, hər bir qurtuluşun əsasını milli azadlıq təşkil edir. Ümummilli lider Heydər Əliyevin müdrikliklə söylədiyi bu sözlər artıq reallaşıb. Ötən illərin təcrübəsi göstərdi ki, müstəqillk arzusunun xalqın tələbatı kimi yaranması, milli özünüdərk, ideoloji dəyərlərin formalaşması, “güclü iqtisadiyyat dövlət müstəqilliyinin təməlidir” tezisinin həqiqətə çevrilməsi suverenliyin əbədiliyi üçün başlıca şərtlərdəndir.

Müdrik şəxsiyyət kimi dünya siyasətçiləri arasında uzaqgörənliyi ilə ön sıralarda yer alan Ulu Öndər bildirirdi ki, əgər hər hansı ölkənin xalqları öz hüquqlarını anlayır və onları qoruya bilirsə, o zaman ən kiçik dövlət də ən böyük məmləkət qədər güclü olur. “Mən dəfələrlə demişəm və bir daha demək istəyirəm ki, bizdən əvvəlki nəsillər müstəqillik həsrəti ilə yaşamışlar. Ancaq müstəqilliyi görə bilməmişlər. Bu xoşbəxtlik bizə nəsib oldu. Eyni zamanda, bu gün müstəqil dövləti inkişaf etdirmək, irəliyə aparmaq da bizə nəsib oldu. Bu, böyük xoşbəxtlikdir, böyük məsuliyyətdir” söyləyən Ulu Öndərin siyasi məktəbinin yetirməsi və davamçısı Prezident İlham Əliyev düşünülmüş siyasəti ilə müstəqilliyimizin əbədiliyi naminə köklü islahatları əminliklə davam etdirir.

Sovetlər dönəmində Azərbaycanın tərəqqisi naminə çalışaraq ölkəmizi inkişaf etmiş sənaye respublikası kimi tanıdan Heydər Əliyev özünü vətənpərvər, cəsarətli, bacarıqlı dövlət xadimi kimi bir daha 1990-cı ilin yanvar ayında göstərmişdir. “O günlər mənim yaxşı xatirimdədir. Azərbaycan xalqına qarşı böyük cinayət törədilmişdi, günahsız insanlar qətlə yetirilmişdi. Sovet ordusu Bakıya müdaxilə edərək kütləvi qırğın törətmişdi. Yüzlərlə insan həlak olmuş, yaralanmış, itkin düşmüşdü. Bu, böyük cinayət idi. Ancaq əfsuslar olsun ki, Azərbaycanın o vaxtkı rəhbərliyi bu barədə öz etiraz səsini qaldırmamışdı. Yenə də xalqın yeganə ümid yeri Heydər Əliyev idi” söyləyən Prezident İlham Əliyevin vurğuladığı kimi, şəxsi həyatının və siyasi fəaliyyətinin mənasını xalqına xidmətdə görən Heydər Əliyev təhdid və təzyiqlərdən qorxmayaraq yanvarın 21-də Moskvadakı Azərbaycan nümayəndəliyinə gələrək Kremldə əyləşənləri ittiham etdi, bu cinayəti pislədi və öz haqq səsini ucaltdı. Bu səs bütün Azərbaycan xalqını bir amal, müstəqillik uğrunda mübarizəyə çağırdı.

Müstəqilliyi hər bir xalqın tarixi, milli sərvəti adlandıran Ulu Öndərin vətənə dönüşünün, ata-baba yurdu Naxçıvandakı fəaliyyətinin əsas məqsədi suverenliyimizin əbədiliyi və onun qorunması idi. O illəri müstəqillik tariximizin yaddaqalan səhifələri kimi dəyərləndirən, “Heydər Əliyevi ilk növbədə muxtar respublikanın parlamentinə, sonra isə Azərbaycan parlamentinə deputat seçdilər. Sonra xalq onu Naxçıvan Ali Məclisinin sədri vəzifəsinə seçmişdir. O vaxt artıq Azərbaycan rəhbərliyinin rəyi heç bir məna kəsb etmirdi və xalq Naxçıvanda əsl vətənpərvərlik, cəsarət, müdriklik göstərmişdir” söyləyən Prezident İlham Əliyevin bildirdiyi kimi, Heydər Əliyevin müstəqilliyə gedən yolda göstərdiyi cəsarət, xilaskarlıq missiyası xalqı bir amal ətrafında birləşdirdi.

Məhz onun təşəbbüsü və rəhbərliyi ilə müstəqilliyimizin rəmzi olan Azərbaycan Xalq Cümhuriyyətinin üçrəngli bayrağı Naxçıvanda rəsmi dövlət bayrağı kimi təsdiq edildi və Azərbaycan Ali Sovetinə müraciət olundu ki, bu bayraq Azərbaycanın rəsmi bayrağı kimi təsdiq edilsin. Müstəqilliymizə təhlükə olan Sovet İttifaqının saxlanmasına dair referendumun keçirilməsi məhz Naxçıvanda mümkün olmadı. Çünki Heydər Əliyev buna imkan vermədi. Naxçıvan Muxtar Sovet Sosialist Respublikasının adı dəyişildi. Bu, müstəqilliyə gedən yolların müxtəlif istiqamətləri idi və o da təsadüfi deyil ki, məhz o illərdə Azərbaycan dövlətçiliyinin gələcəyi müəyyən edilirdi.

1993-cü ildə Azərbaycanda vətəndaş müharibəsi başlayanda xalq yenə də Ulu Öndərə üz tutdu, onu siyasi hakimiyyətə dəvət etdi. Müdrik şəxsiyyət Heydər Əliyev xalqın istəyi və dəstəyi ilə Prezident seçildi. Azərbaycanda quruculuq, sabitlik, inkişaf dövrü başladı. Sabitlik təmin edildi, vətəndaş müharibəsinə son qoyuldu. Müstəqilliyin əsas atributları olan ordu quruculuğu sahəsində ciddi islahatlar aparıldı, qeyri-qanuni silahlı birləşmələr tərksilah edildi. Bir sözlə, Azərbaycan islahatlar yoluna qədəm qoydu. Dövlətçiliyin əsasları məhz o illərdə qoyuldu.

...Bəşər tarixi çox böyük insanlar yetiribdir. Onlar arasında inqilablar edənlər, dövlət yaradıb millətləri üçün böyük işlər görənlər də vardır. Ancaq onların çoxunun tarixdə izi, yeri, xidmətləri qalmayıb. Onların gördüyü işlər gələcək uğurlara hesablanmadığı, dəyərli, faydalı olmadığı üçün uğursuzluqla nəticələnib, ardıcılları olmayıb. Ancaq qərinədən artıq bir müddətdə hakimiyyətdə olan Ulu Öndərin xalqı, müstəqilliyimizin əbədiliyi üçün gördüyü işlər o qədər qiymətli, misilsizdir ki, onun siyasi irsi, dövlətçilik məktəbi, ənənələri bu gün də yaşayır, davam etdirilir. Dövlətçilik təcrübəsindən də aydın bilirdi ki, hökumətin iki məqsədi, vəzifəsi var: millətin qorunması, insanların rifahının təmin olunması. Heydər Əliyev müəllifi olduğu Azərbaycanın müstəqilliyini qoruyub əbədiləşdirməklə bu missiyanı layiqincə yerinə yetirdi. Ölkəmizin dünya birliyində mövqeyinin möhkəmlənməsini apardığı demokratik islahatlarla təmin etdi, dövləti etibarlı əllərə tapşırdı. Azərbaycanın hamını heyrətə salan iqtisadi inkişafı sübut etdi ki, onun ideyaları gələcək nəsillər üçün də dəyərlidir.

Arxasında müstəqilliyimizi istəməyən qüvvələrin dayandığı, daxili və xarici qaragüruhçuların törətdikləri 1994-cü və 1995-ci illərdə dövlət çevrilişlərinə cəhdlərin qarşısı Ulu Öndərin qətiyyəti sayəsində alındı. Azərbaycan xalqına güvənən, arxalanan Heydər Əliyevin rəhbərliyi ilə bu cəhdlərə son qoyuldu və xəyanətkarlar layiqli cəzasını aldılar.

Müstəqil, tarazlı, cəsarətli siyasət yeridərək özünün qeyd etdiyi kimi, ömrünü Azərbaycan xalqının gələcəyinə həsr etdi. İlk addım kimi Azərbaycanda sabitlik, nizami ordu yaradan, müstəqilliyin əbədiliyini təmin edən, daxili çəkişmələrə, hakimiyyət uğrunda mübarizələrə son qoyan Heydər Əliyev ərazi bütövlüyümüzün təminatı üçün də misilsiz xidmətlər göstərərək atəşkəs barədə müqavilə imzaladı.

“Azərbaycan xalqı 1991-1992-ci illəri, 1993-cü ilin əvvəllərini yaxşı xatırlayırdı. Azərbaycanı kimlər idarə edirdi? Hansı səviyyəsiz qüvvələr hakimiyyət başına gəlmişdilər? Əslində hakimiyyəti zorla zəbt etmişdilər. O, tariximizin qara səhifələridir. Səriştəsizlik, bacarıqsızlıq, mədəniyyətsizlik, cəsarətsizlik, qorxaqlıq, riyakarlıq - bu idi o vaxt Azərbaycan rəhbərliyini əks etdirən epitetlər. Azərbaycan xalqı istəmirdi ki, yenə o qara günlər qayıtsın. İstəyirdi ki, insanlar rahat yaşasınlar, ölkəmiz inkişaf etsin, sabitlik pozulmasın. Düzgün seçim edərək bir daha Heydər Əliyev siyasətinə səs verdi və əminəm, bu gün bütün Azərbaycan xalqı bir daha görür ki, nə qədər düzgün bir seçim edib” söyləməklə müstəqilliyimizi dövlətçilik salnaməmizin şərəfli tarixi kimi dəyərləndirən Prezident İlham Əliyev 1993-2003-cü illəri sabitlik və inkişaf dövrü adlandırır. Bu gün bəhrəsini verən islahatların təməli o illərdə qoyulmuşdu. 2003-cü ildən sonra isə müasir Azərbaycanın inkişafı yeni mərhələ üzrə, Ulu Öndərin siyasətinə uyğun davam etdirilir. Dünya siyasətçilərinin də etiraf etdikləri kimi, çoxəsrlik tarixində Azərbaycan heç vaxt indiki qədər güclü olmamışdır.

Çünki Azərbaycan dövləti çox möhkəm dayaqlar üzərində, Ulu Öndərin xalqına bəxş etdiyi milli təfəkkür və özünüdərk ideyaları əsasında inkişaf edir. Dövlətçilik maraqları və milli ideologiyamız Heydər Əliyev tərəfindən təməli qoyulan konsepsiya əsasında, Prezident İlham Əliyev tərəfindən uğurla davam və inkişaf etdirilir, zənginləşdirilir.

Azərbaycançılıq ideologiyası bu gün artıq bir nümunə kimi mövcuddur. Geoiqtisadi dəyərinə görə Ulu Öndərin 1994-cü ildə əsasını qoyduğu neft strategiyası və transmilli enerji-nəqliyyat-kommunikasiya layihələrinin həyata keçirilməsi Azərbaycanı dünyanın aparıcı dövlətləri və şirkətləri üçün cəlbedici tərəfdaşa çevirmişdir. “Əsrin müqaviləsi”nin imzalanması ilə ölkəmizin dünya enerji bazarında mövqeyi möhkəmlənir. BTC, BTƏ neft-qaz kəmərlərinin davamı olan TANAP, TAP, “Cənub Qaz Dəhlizi” ümummilli lider Heydər Əliyevin müəyyənləşdirdiyi neft strategiyasının məntiqi nəticəsi, Prezident İlham Əliyev qətiyyətinin ifadəsidir.

Bu gün geostrateji əhəmiyyətli mövqeyə malik Azərbaycanın adı düşünülmüş, cəsarətli və dürüst xarici siyasəti ilə seçilən nadir ölkələr sırasında çəkilir. Danılmaz həqiqətdir ki, dövlət müstəqilliyinin mühüm atributu müstəqil xarici siyasətin xalq, dünya ictimaiyyəti tərəfindən dəstəklənməsidir. Azərbaycan bu uğura diplomatik səyləri ilə imza atıb.

Uğurlarımıza, inkişafımıza paxıllıqla yanaşan dairələr tərəfindən ölkəmizə qarşı qərəzli kampaniyalar təşkil olunsa da, Azərbaycan həqiqətləri belə qaranlıq dünyanın bədxahlarının fitnə və məkrlərinə işıq salır, gözlərini qamaşdırır. Belə dairələri “Bizim siyasətimizə ancaq Azərbaycan xalqı, onun iradəsi təsir edə bilər. Biz ölkəmizi Azərbaycan xalqının iradəsi ilə idarə edirik. Milli maraqlarımız bizim üçün hər şeydən üstündür. Bundan sonra da biz öz prinsipial mövqeyimizdən kənara çıxmayacağıq. Biz ölkəmizin inkişafı, xalqımızın rifahı üçün bundan sonra da səmərəli işləyəcəyik, Ulu Öndərin siyasi xəttinə sadiq qalacağıq. Azərbaycanın dövlət müstəqilliyi bizim ən böyük sərvətimizdir, ən böyük xoşbəxtliyimizdir” sözləri ilə layiqli cavab verən Prezident İlham Əliyev bildirir ki, müstəqilliyə düşünülmüş siyasət, Azərbaycan xalqının birlik və həmrəyliyi sayəsində nail olunmuşdur və bu nemət əbədidir.

Bu gün Azərbaycanın siyasi mənzərəsi stabildirsə, dinamik inkişaf bütün sahələrdə hiss olunursa, bu yalnız ulu öndər Heydər Əliyevin, ONUN layiqli davamçısı Prezident İlham Əliyevin gərgin zəhmətinin bəhrəsidir. Prezident İlham Əliyevin vurğuladığı kimi son illərin təcrübəsi müstəqilliyimizin üstünlüklərini açıq-aydın göstərir. Ancaq müstəqil Azərbaycan bu uğurlara nail ola bilmişdir. Azərbaycan xalqının taleyi öz əlindədir. Müstəqilliyin üstünlükləri bundan ibarətdir. Heç vaxt müstəqilliyimiz bu qədər möhkəm olmamışdır.

“Müstəqillik deyəndə mən rəsmi atributları nəzərdə tutmuram. Müstəqil siyasət müstəqilliyin əsas amilidir və belə olan halda həmişə inkişaf, əmin-amanlıq olacaq, Azərbaycan xalqı rahat, təhlükəsizlik şəraitində yaşayacaq, necə ki bu gün yaşayır. Bizim siyasətimiz bundan ibarətdir. Hesab edirəm ki, bizim nümunəmiz bir çox ölkələr üçün də cəlbedicidir. Ona görə də bu gün dünyada Azərbaycanı böyük rəğbətlə qarşılayırlar, bizə inanırlar, sözümüzə inanırlar. Ona görə ki, biz ləyaqətli siyasət aparırıq və xalqın maraqlarını həmişə müdafiə edirik.” Prezident İlham Əliyevin bu sözləri Ulu Öndərin adı ilə bağlı olan müstəqilliyimizin əbədi qarantıdır.

Xuraman İsmayılqızı

İki sahil.- 2016.- 18 oktyabr.- S.5.