Müalicəvi vasitə - zəncəfil

Zəncəfil həm müalicəvi vasitə, həm də qidada istifadə olunan ədviyyatdır. Zəncəfil kökü bir sıra xəstəliklərin müalicəsində - soyuqdəymə, qrip, həzm problemi və əzələ ağrılarında ən mükəmməl vasitə hesab olunur.

“İki sahil” healthymuslim.com saytına istinadən xəbər verir ki, zəncəfil əsrlər boyu xalq təbabətində mədə ağrısı, ishal, artrit, baş ağrısı, ürək bulantısı və s. xəstəliklərlə mübarizədə istifadə olunub. Ənənəvi tibbdə zəncəfil soyuqdəymə, qrip və həzm sistemi xəstəliklərində istifadə olunan ən vacib ədviyyatdır. Zəncəfil, həmçinin sakitləşdirici və mülayim spazmoltik təsir göstərərək mədə- bağırsaq traktını sakitləşdirə bilir. O, həmçinin karminativ və ağrikəsici effektlərə də malikdir.

İllahiyyatçı alim, təfsir və fiqh elmlərinin mahir bilicisi İbn əl-Qayyim “Tibb-i nebevi” adlı vəsaitində zəncəfilin faydalarını qeyd etmişdir . Burada zəncəfilin göz xəstəlikləri və yaddaş problemləri , ağciyər və mədə xəstəliklərinin müalicəsində rolunun böyük olduğunu bildirib. Bugünkü dövrümüzdə də aparılan araşdırmalar zəncəfilin antioksidant tərkibli, iltihab yaradan komponentlərin formalaşmasına mane olan terapevtik xüsusiyyətlərə malik ədviyyat olduğunu sübut edir. Qeyd edək ki, zəncəfil “gingerols”, “shogaols” və “zingerones” kimi güclü antioksidantlarla zəngindir. Bu antioksidantlar insan orqanizminin zərərli toksinlərdən azad olunmasına kömək edir. Məhz bu antiseptik tərkib qrip , soyuqdəymə və bronxial infeksiyalar ilə mübarizədə insana yardımcı olur. Sözügedən bu qida iltihab əleyhinə güclü vasitə olmaqla yanaşı, xərçəng hüceyrələri ilə də mübarizə apara bilir.

Çalışın təzə zəncəfili isti şorbalarda, kartof qızartmalarında istifadə edəsiniz.

İki sahil.- 2017.- 10 fevral.- S.16.