Qocaman neftçi Kamil Akimovun 90 illik yubileyi qeyd olundu

SOCAR-ın Heydər Əliyev adına Neft Emalı Zavodunda (NEZ) Azərbaycan SSR-nin neft emali sənayesi naziri vəzifəsində çalışmış, Əməkdar mühəndis Kamil Akimovun 90 illik yubileyinə həsr olunmuş tədbir keçirildi.

Yubiley tədbirində SOCAR-ın birinci vitse-prezidenti, akademik Xoşbəxt Yusifzadə, Azərbaycan Milli Elmlər Akademiyasının (AMEA) prezidenti, akademik Akif Əlizadə, SOCAR-ın vitse-prezidentləri David Məmmədov, Xalik Məmmədov, Bədəl Bədəlov, AMEA-nın akademik Yusif Məmmədəliyev adına Neft-Kimya Prosesləri İnstitutunun direktoru, AMEA-nın həqiqi üzvü, kimya elmləri doktoru, professor Vaqif Abbasov, Dövlət Neft Şirkətinin idarə və müəssisə rəhbərləri və digər qonaqlar iştirak edirdilər.

Tədbir iştirakçıları əvvəlcə Ulu Öndərin Heydər Əliyev adına Neft Emalı Zavodundakı büstünü ziyarət edərək önünə gül dəstələri düzdülər.

SOCAR-ın emal üzrə vitse-prezidenti David Məmmədov tədbiri açaraq Əməkdar mühəndis Kamil Akimovla bağlı xoş təəssüratlarını bölüşdü, yubilyardan çox şey öyrəndiklərini vurğuladı: “Neftin emalı sahəsində zəngin təcrübəyə malik olan Kamil Akimov öz həyat və istehsalat təcrübəsini gənclərə öyrətməkdən zövq alır. O, gənclərlə tez-tez görüşür, onlara öz təcrübəsini həvəslə öyrədir, yeni texnika və texnologiyaların istehsalata tətbiqi barədə öz dəyərli təkliflərini verir. Kamil Akimova cansağlığı, yaşayıb-yaratmaq arzu edirəm. Çünki gənc nəsil onun həyat və istehsalat təcrübəsindən hələ çox bəhrələnəcək.”

Daha sonra K.Akimov haqqında film nümayiş etdirildi. Kamil Akimov 1927-ci il iyulun 11-də Sabirabadda doğulub. O, Bakı Neft Texnikumunu və Azərbaycan Sənaye İnstitutunu bitirib. Bakı Neft Emalı Zavodunun direktoru, Azərbaycan SSR neft emalı sənayesi nazirinin birinci müavini, Azərbaycan SSR neft emalı sənayesi naziri vəzifələrində çalışıb. K.Akimov hazırda SOCAR-ın “Ekol Mühəndislik Xidmətləri” QSC-nin baş direktorunun məsləhətçisidir. O, “Oktyabr İnqilabı”, “Qırmızı Əmək Bayrağı”, “Şərəf Nişanı” ordenləri ilə təltif edilib, 2 çağırış Azərbaycan SSR Ali Sovetinin deputatı seçilib. Alimin 10-dan artıq ixtirası, 30-a qədər təklifi neft emalı sənayesində istifadə edilir.

AMEA-nın həqiqi üzvü, AMEA-nın akademik Yusif Məmmədəliyev adına Neft-Kimya Prosesləri İnstitutunun direktoru, kimya elmləri doktoru, professor Vaqif Abbasov fədakar insan, təcrübəli neft emalçısı, yüksək təşkilatçılıq bacarığı, xeyirxahlığı, sadəliyi və ziyalılığı ilə hər kəsə nümunə ola biləcək şərəfli bir ömür yaşamış Kamil Akimovun həyat və fəaliyyətindən fəxrlə danışdı. V.Abbasov yubilyarın neft emalı sənayesi naziri işlədiyi illərdə bu sahəyə verdiyi töhfələri, xüsusilə 1970-1980-ci illərdə ulu öndər Heydər Əliyevin dəstəyi ilə NEZ-də həyata keçirdiyi yenidənqurma işlərini xüsusilə vurğuladı: “1970-ci ildə Azərbaycan Respublikasının neftayırma sənayesi naziri vəzifəsinə təyin olunan Kamil Akimov ulu öndər Heydər Əliyevin bilavasitə rəhbərliyi ilə neftayırma zavodlarında yenidənqurma işlərinə başlayır. Keçmiş İttifaqın Neft Emalı Sənayesi Nazirliyi üzrə 6 ədəd yüksək məhsuldarlığa malik ELOU- AVT-6 markalı qurğuların alınması və onun ikisinin Azərbaycana verilməsi, dünya neftayırma sənayesi sahəsində yeni texnologiyaya malik 5 katalitik reforminq qurğusunun altıncısının Azərbaycanda - Bakı Neftayırma Zavodunda tikilməsi məhz şəxsən ulu öndər Heydər Əliyevin köməkliyi ilə mümkün olmuşdur. Heydər Əliyevin köməkliyi və təşəbbüsü ilə görülən bu işləri və qazanılan nailiyyətləri, həqiqətən, Azərbaycanın neft sənayesi üçün bir inqilab hesab etmək olar.”

Azərbaycan Milli Elmlər Akademiyasının prezidenti, akademik Akif Əlizadə Kamil Akimovun həyat və fəaliyyətindən söhbət açdı. Bildirdi ki, neft emalı sənayesində müstəsna xidmətləri olan bu şəxsiyyət haqqında günlərlə danışmaq olar: “Onun həyat tarixçəsi özünün müəllifi olduğu “Qara qızılın Kamillik dövrü” kitabında daha dolğun ifadə olunmuşdur. 90 yaşının olmasına baxmayaraq, gümrah, ürəyi yaşayıb-yaratmaq həvəsi ilə çırpınan, zəngin təcrübəyə malik olan Kamil Akimov bu gün də öz qayğıkeşliyi və işgüzarlığı ilə seçilir.” Akademik A.Əlizadə bildirdi ki, ömrün kəşməkəşli yollarında əzmlə çətinliklərə sinə gərmiş K.Akimov öz nümunəvi əməyi sayəsində sənətinin ən yüksək pilləsinə gəlib çatıb.

SOCAR-ın birinci vitse-prezidenti, akademik Xoşbəxt Yusifzadə Kamil Akimovla tələbəlik illərindən tanış olduğunu diqqətə çatdırdı. Akademik X.Yusifzadə təcrübəli mütəxəssis, neft emalçısı Kamil Akimovun ayrı-ayrı illərdə neft-kimya sənayesinin hazırkı vəziyyəti və gələcək perspektivləri ilə əlaqədar bir çox xarici ölkələrdə - ABŞ, İngiltərə, Fransa, Yaponiya, Belçika, Bolqarıstan, Macarıstan, Polşa, İsrail, Türkiyə, İraq, Kuba və digər dövlətlərdə yaşadığını, işlədiyini, bir sıra beynəlxalq tədbirlərdə yaxından iştirak edərək Azərbaycan Respublikasını layiqincə təmsil etdiyini vurğuladı. SOCAR-ın birinci vitse-prezidenti bildirdi ki, bu təcrübəli, müdrik insanın arzu və istəyinin əsasını Vətənə layiqli xidmət etmək amalı təşkil edir.

Sonra akademik X.Yusifzadə SOCAR-ın Fəxri fərmanını və qiymətli hədiyyələri Kamil Akimova təqdim etdi.

Daha sonra “Ekol Mühəndislik Xidmətləri” QSC-nin baş direktoru Ramil Əliyev, Müharibə, Əmək və Silahlı Qüvvələr Veteranları Təşkilatının sədr müavini, ehtiyatda olan polkovnik Cəlil Xəlilov və digər natiqlər yubilyarla bağlı fikirlərini bölüşdülər. Vurğulandı ki, K.Akimov bu gün də ən çətin məsələnin həllində, ətraf mühitin mühafizəsi və ekoloji vəziyyətin yaxşılaşdırılması sahəsində öz bilik və təcrübəsini gənclərə həvəslə öyrədir.

Tədbirin sonunda yubilyar Kamil Akimov tədbirin təşkilatçılarına və iştirakçılarına minnətdarlığını bildirdi.

Orxan Vahidoğl

İki sahil.- 2017.- 12 iyul.- S.5.