YAP Yasamal rayon təşkilatında Ulu Öndərin əziz xatirəsi anıldı

Adı həmişə milli dövlətçiliyimiz, müstəqilliyimizlə qoşa çəkilən fenomen, dövlət və siyasi xadim kimi təcrübəsi daim öyrənilən Heydər Əliyev min ildən bir Tanrının insanlara bəxş etdiyi müdrik, lider olduğunu fəaliyyəti ilə təsdiqləyən dahilərdən biri, bəlkə də birincisidir. Ulu öndər Heydər Əliyevin anadan olmasının 94-cü ildönümü münasibətilə keçirilən tədbirlərdə dəfələrlə səslənən bu fikirlər xalqımızın xilaskarına ümumxalq məhəbbətinin ifadəsidir.

YAP Yasamal rayon təşkilatında ulu öndər Heydər Əliyevin anadan olmasının ildönümü ilə bağlı keçirilən tədbirdən əvvəl Ulu Öndərin foyedəki büstü önünə əklil qoyuldu. Azərbaycanın Dövlət himninin səsləndirilməsi, “Mən çox sınaqlardan keçmiş bir adamam və həyatımı da özümə yox, xalqıma həsr etmişəm” söyləyən Heydər Əliyevin xatirəsinin bir dəqiqəlik sükutla yad olunması ilə başlayan tədbirdə dahi şəxsiyyətin həyatı, siyasi fəaliyyəti ilə bağlı videoçarx nümayiş etdirildi.

Çıxışına “Azərbaycan xalqının xilaskarı Heydər Əliyevin qərinədən artıq müddətdə Azərbaycan naminə gördüyü işlər, respublikanı inkişaf etmiş dövlətlərlə eyni səviyyəyə qaldırmaq üçün göstərdiyi fədakarlıqlar bu gün fəxrlə söhbət açdığımız uğurların təməlidir” sözləri ilə başlayan YAP Yasamal rayon təşkilatının sədri Tağı Əhmədov bildirdi ki, Sovet Azərbaycanına rəhbərlik etdiyi illərdə onun neft sənayesinin inkişafına göstərdiyi diqqəti, bilavasitə təşəbbüsü ilə tikilən İttifaq əhəmiyyətli fabrik, zavodların, mədəniyyət ocaqlarının adları çəkilsə bir neçə cildi əhatə edən kitablar hazırlanar: “Sağlığında belə əfsanəyə çevrilən Heydər Əliyevin bütün istək və ideyaları həyata keçib. Müasiri olduğu dünyanın ən aktual çağırışlarına qətiyyəti, ağlı, zəkası ilə cavab vermək qüdrətinə malik sərkərdə olan Ulu Öndər öz gücünə inandığı qədər də xalqının qətiyyətinə güvənirdi. Deyirdi ki, əgər xalq öz hüquqlarını anlayır və onları qoruya bilirsə, o zaman ən kiçik dövlət də ən böyük məmləkət qədər güclü olur. Dövləti xalqın işinə çevirən bu tarixi şəxsiyyət sovetlərin təsiri altında yaşayıb, işlədiyi illərdə də inanırdı ki, vaxt gələcək Azərbaycan imperiya buxovundan azad olacaq, müstəqilliyini bərpa edəcək, azadlığına qovuşacaq. Bu səadəti Azərbaycan xalqına bəxş edən ulu öndər Heydər Əliyev oldu. Milyonlar isə bu fədakarlıq üçün daim Ulu Öndərə hörmət və etiram bəsləyir, onu əbədi lider, xilaskar kimi sevir, hörmət edir. Çünki Ulu Öndər Vətəninə bağlılığını təsdiqləyən tarixi xidmətləri ilə müasir Azərbaycanın yaradıcısı olduğunu təsdiqlədi. Müstəqqilliyimizin əbədi qarantı oldu.”

“Böyük azərbaycanlı olduğunu təsdiqləyən, dünya azərbaycanlılarını təşkilatlandıran, Yeni Azərbaycan Partiyasını yaratmaqla cəmiyyətin siyasi sistemində aparıcı qüvvə, möhtəşəm vahid siyasi güc mərkəzi formalaşdıran Ulu Öndər Naxçıvan MR Ali Məclisinin Sədri işlədiyi qısa müddətdə Azərbaycanın taleyüklü məsələlərinin həllinə xüsusi diqqətlə yanaşdı” söyləyən Tağı Əhmədov bildirdi ki, mənalı həyatını xalqına həsr etmiş tarixi şəxsiyyət kimi respublikanı daxili və xarici qüvvələrin təhdid, təzyiq və təsirlərindən qorudu. “İnsanlarda milli dirçəliş ideyasını yalnız milli liderlər həyata keçirə bilərlər” ifadəsi məhz onun simasında əksini tapdı: “Onun sədrliyi ilə keçirilən Naxçıvan MR Ali Məclisinin sessiyasında muxtar respublikanın adından “sovet sosialist” sözləri çıxarıldı. Azərbaycan Xalq Cümhuriyyətinin üçrəngli bayrağı, gerbi, himni bərpa edildi. Bu qətiyyətli addım o dövrdə hakimiyyətdə olan səriştəsiz rəhbərləri qəzəbləndirsə də atılan hər bir addım Azərbaycan Xalq Cümhuriyyətinin davam etdirə bilmədiyi, yarımçıq qalan müstəqillik ideyasına ümummilli lider Heydər Əliyevin sədaqəti, vətəndaşlıq borcu, liderlik missiyasının başlanğıcı idi. 20 Yanvar faciəsinə siyasi qiymət verilməsi tələbi də ulu öndər Heydər Əliyev tərəfindən səsləndirildi. SSRİ-ni başqa formatda təşkil etmək üçün irəli sürülən və müttəfiq respublikların suveren hüquqlarını pozan “İttifaq müqaviləsi”nin əsl mahiyyətini uzaqgörənliklə hiss edib “təhlükəli oyunun” ağır itkilərlə nəticələnəcəyini xalqa çatdıran müdrik şəxsiyyət Heydər Əliyev haqlı olaraq bunu M.Qorbaçovun xalqı aldatmaq cəhdinin bir təzahürü adlandırdı.”

Milli Konstitusiyamızın hazırlanmasında şəxsən iştirak edən, müxtəlif dövlət və xalqlarla əməkdaşlıq və qarşılıqlı anlaşma şəraitində yaşamağa xarici siyasətimizin prioritetləri kimi baxan Ulu Öndərin ən çox diqqət yetirdiyi məsələ Dağlıq Qarabağ münaqişəsinin həlli, işğala məruz qalan torpaqlarımızın azad olunması, Azərbaycan həqiqətlərinin dünya xalqlarına çatdırılması, qürbətdə yaşayan həmvətənlərimizlə görüşməklə güclü diaspor hərəkatının təməlini qoymaq idi.

Tədbirdə YAP sıralarına yeni qəbul olunanlara üzvlük vəsiqələri, partiyanın işində fəallıq göstərənlərə fəxri fərmanlar verildi.

Xuraman İsmayılqızı.

İki sahil.- 2017.-4 may.- S.11

.