Qeyri-neft sektoru üzrə ixracın həcmi 25 faiz artıb

Qlobal siyasi qeyri-sabitlik, maliyyə-iqtisadi böhran fonunda Prezident İlham Əliyevin çevik və qətiyyətli, uzaqgörən iqtisadi siyasəti sayəsində Azərbaycan iqtisadiyyatının inkişafı iqtiqamətində qazanılmış uğurlar daha da möhkəmləndirilib, respublikamız dinamik inkişaf tempini qoruyub saxlayıb, ölkəmizdə bütün sahələrdə inamla irəliyə gedilərək gələcək tərəqqi üçün möhkəm təməl yaradılıb. Bu gün Azərbaycan dünyada böhrandan ziyan çəkməyən və sabit inkişafda olan çox az sayda ölkələrdən biridir. Ölkəmizin başçısının qəbul etdiyi qərarlar, imzaladığı Fərman və sərəncamlar qeyri-neft sektorunun inkişafı üçün çox geniş imkanlar yaradıb. Azərbaycanın Dünya İqtisadi Forumunun Qlobal Rəqabətlilik Hesabatında dünyanın 10 ən sabit makroiqtisadi mühitə malik ölkələri arasında olması bunun əyani sübutudur. Son illərdə nüfuzlu beynəlxalq maliyyə qurumlarının hesabatlarında Azərbaycanda investisiyalar üçün münasib biznes mühitinin yaradılması, əcnəbi sərmayəçilər üçün hökumət tərəfindən əlverişli sərmayə imkanlarının təmin edilməsi, eləcə də digər tədbirlərin intensiv xarakter alması əksini tapıb.

Qeyri-neft sektorunun aparıcı sahələrindən biri olan aqrar sektorun daha da inkişaf etdirilməsi məqsədilə investisiya layihələrinin reallaşdırılmasına, güzəştli kreditlərin, subsidiyaların verilməsinə, qanunvericilik bazasının təkmilləşdirilməsinə dövlət dəstəyi gücləndirilib, regionların sürətli inkişafına dair Dövlət proqramları icra edilib. Bu proqramlar respublikamızın müxtəlif bölgələrində sənaye məhəllələrinin salınmasına, aqrar parkların yaradılmasına, infrastruktur şəbəkələrinin genişləndirilməsinə, aqrar sahədə məhsul istehsalının həcminin artırılmasına, qeyri-neft sektorunun ixrac potensialının gücləndirilməsinə və diversifikasiyasına, eləcə də ölkənin xarici ticarət dövriyyəsinin artmasına böyük töhfələr vermişdir. Son illərdə aqrar sektorda rəqabətqabiliyyətli məhsulların istehsalını artırmaq yolu ilə respublikamıza dayanıqlı valyuta axınını təmin etmək, qeyri-neft sektorunun inkişafı hesabına bir çox məhsul növləri üzrə idxaldan asılılığı aradan qaldırmaq yolunda mühüm nailiyyətlər əldə edilib.

İqtisadiyyat Nazirliyinin rəsmilərinin mətbuata verdikləri açıqlamalara görə, bu ilin yanvar-avqust aylarında Azərbaycan ötən ilin 8 ayı ilə müqayisədə qeyri-neft ixracını 30 faiz artırıb. Onun sözlərinə görə, kənd təsərrüfatı məhsullarının ixracatı 37 faiz, sənaye məhsulları ixracatı isə 25,4 faiz artıb. Eyni zamanda ixracat artımı ilə yanaşı, ixrac edilən məhsulların spektri də böyüyür. Belə ki, bir il ərzində bu göstərici 16,6 faiz artaraq, 2700-dən çox fərqli məhsula çatıb. Bu müddət ərzində həmçinin ölkəmizdə ixracla məşğul olan şirkətlərin sayı da artıb. Avqustun sonunda şirkət və fərdi sahibkarların sayı 11 mini keçib.

Bu dövrdə ölkə iqtisadiyyatına 5 milyard ABŞ dolları həcmində investisiya yatırılıb, valyuta ehtiyatları artıb. Cari ilin yanvar-avqust aylarında Azərbaycanın hüquqi və fiziki şəxsləri dünyanın 180 ölkəsindəki tərəfdaşları ilə ticarət əməliyyatları həyata keçiriblər. 2017-ci ilin yanvar-avqust aylarında xarici ticarət dövriyyəsi 12 milyard 523.79 milyon dollar, ixracın dəyəri 7 milyard 223 milyon dollar, idxalın dəyəri isə 5 milyard 300 milyon dollar təşkil edib. Bu ilin yanvar-avqust ayları ərzində xarici ticarət dövriyyəsində 1 milyard 922 milyon dollar həcmində müsbət saldo yaranıb ki, bu da ötən ilin eyni dövrü ilə müqayisədə 7,7 dəfə çoxdur.

Ceyhun Piriyev

İki sahil.- 2017.- 25 oktyabr.- S.9.