Ölkəmizdə sənayeləşmə siyasəti uğurla aparılır

Ölkə iqtisadiyyatında qeyri-neft sektoru önəmli yer tutur. Qeyri-neft sektorunun inkişafı istiqamətində bir sıra - qanunvericilik bazasının təkmilləşdirilməsi, sahibkarlığın inkişafı, ixrac potensialının artırılması istiqamətində stimullaşdırıcı tədbirlər həyata keçirilir. Regionlarda sənaye parklarının, zonalarının yaradılması, qeyri-neft məhsullarının emal sənayesinin dirçəldilməsi, kiçik və orta səhibkarlığın genişləndirilməsi deyilənlərin bariz nümunəsidir.

İqtisadiyyatımızın digər sahələri ilə yanaşı, sənayenin inkişafına da xüsusi önəm verilir. Ölkə Prezidenti cənab İlham Əliyevin rəhbərliyi ilə həyata keçirilən sənayeləşmə siyasətinə uyğun olaraq, yüzlərlə müasir sənaye müəssisəsi fəaliyyətə başlayıb, ölkəmizdə yeni sənaye sahələri yaradılıb. Ən əsası isə yerli tələbatın ödənilməsində istehsal olunan məhsulların payı əhəmiyyətli dərəcədə artıb, ixracın həcmi yüksəlib.

Bu gün sənayenin inkişafı istiqamətində çox ciddi addımlar atılır, proqramlar icra edilir. Əvvəlki dövrdə proqram kimi təqdim edilən layihələr artıq reallaşır. Bölgələrdə yaradılan sənaye parklarında rezidentlərin sayı, investisiyaların həcmi artır və buna maraq da çox böyükdür.

Bu günlərdə Prezident İlham Əliyev Neftçala Sənaye Məhəlləsinin açılışında iştirak edib. Qeyd edək ki, dövlət başçısının müvafiq Sərəncamla inşa edilən Neftçala Sənaye məhəlləsində 9 müəssisə və 1 kiçik sahibkarlıq emalatxanası fəaliyyət göstərir. Sənaye məhəlləsinin iştirakçıları tərəfindən istehsal sahələrinin yaradılmasına 45,3 milyon manat investisiya yatırılıb. Bununla belə, iş adamlarının sənaye məhəlləsinə cəlb edilməsi istiqamətində tədbirlər davam etdirilir və tələbata uyğun olaraq məhəllənin ərazisi genişləndiriləcək. Sənaye Məhəlləsində ümumilikdə 474 daimi iş yeri yaradılıb.

Prezident İlham Əliyev Neftçala Sənaye Məhəlləsinin açılışındakı nitqində bildirdi ki, bu gün ölkəmizdə sənayeləşmə siyasəti uğurla aparılır: “Neftçala rayonunun inkişafında bu sənaye məhəlləsinin çox böyük rolu olacaq. Burada artıq bir neçə müəssisə fəaliyyətə başlayıb, bir neçə müəssisənin fəaliyyəti yaxın aylarda təmin ediləcəkdir. ...Bu sənaye məhəlləsinin fəaliyyəti həm rayonun iqtisadiyyatına, həm ölkə iqtisadiyyatına çox böyük təkan verəcək. Bu sənaye məhəlləsinin yaradılması əslində bu istiqamətdə görülmüş işlərin yeni mərhələsinin başlanmasıdır.”

Dövlətimizin başçısı vurğuladı ki, Bakı, Sumqayıt və Gəncə şəhərlərində böyük sənaye müəssisələri yaradılır. Mingəçevir şəhərində böyük sənaye zonası yaradılır və kiçik şəhərlərdə də belə layihələrin icrası çox əlamətdar hadisədir. Sevindirici haldır ki, böyük şəhərlərdən sonra ilk sənaye zonası Neftçala rayonunda yaradılıb, yaxın vaxtlarda əlavə iki sənaye zonası Masallı və Hacıqabul rayonlarında fəaliyyətə başlayacaq.

Respublikamızda sənaye parkları sırasında Balaxanı Sənaye Parkı da mühüm yer tutur. Bu parkın yaradılması ölkəmizdə yüksək texnologiyalar əsasında rəqabətqabiliyyətli sənaye məhsullarının istehsalının genişləndirilməsi, qeyri-neft sektorunun, o cümlədən “yaşıl iqtisadiyyat”ın inkişafı, əhalinin istehsal sahəsində məşğulluğunun artırılması, Bakı şəhəri və ətraf qəsəbələrdə ekoloji vəziyyətin yaxşılaşdırılması məqsədinə xidmət edir. Balaxanı Sənaye Parkının rezidentlərinə, digər sənaye parklarının rezidentləri kimi dövlət tərəfindən bir sıra güzəştlər edilib. Belə ki, rezidentlər 7 il müddətinə mənfəət, torpaq, əmlak vergisindən azad olunur, sənaye parkında istehsal sahəsinin qurulması və məhsul istehsalı məqsədilə idxal edilən texnika, texnoloji avadanlıq və qurğular ƏDV-dən və idxal rüsumundan azad edilir.

Qeyri-neft sektorunun, sənaye sahələrinin inkişafı istiqamətində atılan addımlar, sənaye parklarının açılması ilə bərabər aqroparkların yaradılması kompleks şəkildə gələcək üçün planlaşdırılmış layihələrdir. Azad sahibkarlığın formalaşması və inkişafı uzunmüddətli bir prosesdir və xeyli dərəcədə dövlət-hakimiyyət orqanları tərəfindən müəyyənləşdirilən iqtisadi, hüquqi, siyasi şəraitin əlverişlilik, səmərəlilik dərəcəsindən asılıdır.

Sadalananlardan da aydın görünür ki, regionlarda sahibkarlıq fəaliyyətinin genişləndirilməsi və yerli ehtiyatlardan səmərəli istifadə etməklə sənaye sahələrinin inkişafı baxımından sənaye zonalarının yaradılması mühüm önəm daşıyır.

Orxan Vahidoğlu.

İki sahil.- 2017.- 28 sentyabr.- S.10.