Aparılan islahatlar, görülən işlər

bir çox uğurların əsasını qoyacaq

Müsahibimiz Milli Məclisin deputatı Aydın Mirzəzadədir

- Yanvarın 10-da Nazirlər Kabinetinin 2016-cı ilin yekunlarına və qarşıda duran vəzifələrinə həsr olunan iclasında ölkəmizin başçısı İlham Əliyev giriş nitqində bildirdi ki, 2016-cı il bütün dünyada münaqişəli il kimi yadda qaldı. Bu fonda Azərbaycanda sabitlik hökm sürdü, inkişaf davam etdi. İstərdik bu fikirdən çıxış edərək ötən ilin uğurları haqqında fikirlərinizi bölüşəsiniz.

- Bəli, cənab Prezidentin də söylədiyi kimi, ötən il uğur, islahatlar ili oldu. Konstitusiyamızda dəyişiklik etdik, Azərbaycanın maliyyə sektorunda xeyli struktur dəyişikliyi oldu ki, bu da öz nəticəsini göstərəcək, bir sıra dövlət orqanlarına hüquqi şəxs statusu verildi, yeni iş yerləri, xidmət obyektləri açıldı. Azərbaycan Ordusu aprel ayında böyük uğurlar qazandı, torpaqlarımızın bir hissəsini işğaldan azad etdik. Azərbaycan neftinin qiymətinin müəyyən qədər azalması iqtisadiyyatımıza təsir etdi. Amma hesab edirəm ki, 2016-cı ildə aparılan islahatlar, görülən işlər bu il bir çox uğurlarımızın əsasını qoyacaq.

- Aydın müəllim, aprel döyüşlərinə toxundunuz. Necə düşünürsünüz, ötən il 20 ildən artıq davam edən Ermənistan-Azərbaycan, Dağlıq Qarabağ münaqişəsinin həllində hansı naliyyətləri qazandıq?

- Ümumən götürəndə, Azərbaycan Silahlı Qüvvələri bu gün regionun ən güclü, müasir ordusu olduğunu sübut edib. Dövlət ordunun təchizatına, döyüş hazırlığına böyük diqqət yetirir. Bu, göz qarşısındadır. Digər tərəfdən, Azərbaycan əsgəri torpağı uğrunda vuruşur. Ermənistan ordusunun əsgəri isə özgə torpağındadır və kiminsə siyasi ambisiyalarının qurbanı olduğunun fərqinə varır. Bu baxımdan aprel döyüşlərində təkcə silahımızla deyil, eyni zamanda, döyüş ruhumuzla da üstün olduğumuzu göstərdik. Bu gün Ermənistan artıq Azərbaycanın ərazi bütövlüyü məsələsində haqlı olduğunu qəbul etməyə məcburdur. Ermənistan çıxılmaz vəziyyətdə olduğunu qəbul etməzsə, onun üçün ağır nəticələr ola biləcəyinin fərqindədir. Bunu əvvəllər sadəcə olaraq bəzi erməni politoloqları səsləndiriblərsə, indi erməni ictimaiyyəti birmənalı olaraq Dağlıq Qarabağ problemini Ermənistan dövlətinin inkişafına böyük problem yaratdığını tez-tez səsləndirir.

- Bildiyiniz kimi, 2016-cı il ölkəmizdə “Multukulturalizm ili” elan olundu. Bu barədə fikirlərinizi bilmək istəyərdik.

- Biz cəmiyyətimizin multikultural bir cəmiyyət olduğunu, muxtəlif mədəniyyətlərin, baxışların, dinlərin harmonik şəkildə yanaşı yaşadığını və biri-biri ilə zənginləşdiyinin gözəl nəticəsini bir daha dünyaya göstərdik. Dünya bu gün etnik, dini, irqi qarşıdurmadan əziyyət çəkir. Dünya bu gün qaçqın faktorundan əziyyət çəkir. Azərbaycanda isə harmonik bir cəmiyyət yaranıb. Azərbaycanda müxtəlif millətlərin, xalqların nümayəndələri yüz illərdir yaşayır. Açıq cəmiyyət olduğumuz üçün biznes, təhsil üçün Azərbaycana gələnlər də çoxdur. Azərbaycanda digər millətlərə tolerant yanaşmanın, təhlükəsiz bir həyat yaşatdığımızın fərqindədirlər. 2016-cı il, əlbəttə, multikultural il kimi tarixdə qalacaq və mədəniyyətimizin gözəl bir göstəricisi olacaqdır.

- Ötən ilin ən yaddaqalan məqamlarından biri ölkəmizdə çoxsaylı beynəlxalq tədbirlərin keçirilməsi oldu...

- Çox maraqlı bir məqama toxundunuz. Bu gün bu və ya digər ölkələrin dünyada nüfuzu beynəlxalq tədbirlərin sayı və reytinqi ilə ölçülür. Azərbaycan açıq bir cəmiyyətdir. Azərbaycan beynəlxalq birliklə sıx işləyən bir ölkədir. Bu baxımdan vaxtaşırı müxtəlif tədbirlərə, idman yarışlarına ev sahibliyi edir. Artıq Azərbaycan vətəndaşını onlarla təəccübləndirmək mümkün deyil. 2015-ci il möhtəşəm birinci Avropa Oyunlarını keçirməyimiz, daha əvvəl “Eurovision” mahnı müsabiqəsinin Azərbaycanda keçirilməsi bir daha göstərdi ki, Azərbaycan bu sahədə artıq dünyada nümunə göstərilə bilər. 2016-cı il Rio Yay Olimpiadasında qazandığmız medalların sayına görə yüksək pillələrdən birini tutduq. Azərbaycan güclü idman ölkəsi olduğunu bir daha göstərdi. Formula-1 yarışına gəldikdə isə, çox reytinqli olan bu yarış hər ölkədə keçirilmir. Bir çox ölkələrin müraciətinə rədd cavabı verilib. Azərbaycan ilk növbədə infrastrukturunun hazırlığına görə bu yarışları keçirə bildi. Bakının həm tarixi, həm müasir yerlərində marşurtun salınması dünyanın Bakını, Azərbaycanı bir daha tanımasına səbəb oldu. Qeyd edim ki, 2017-ci il İslam Həmrəylik Oyunlarına da Azərbaycan çox ciddi şəkildə hazırlaşır. İdmançılar 60-a yaxın idman növündə öz güclərini sınayacaqlar. Ev sahibi kimi bu yarışların yüksək səviyyədə keçirilməsi ilə Azərbaycan xalqı fəxr edəcək. Digər tərəfdən isə, milli idmançılarımızın da bu idmanlarda yüksək yer qazanacağına ümidimiz və inamımız böyükdür.

- Bəs nəinki idman uğurlarına, ümumilikdə iqtidarın həyata keçirdiyi bütün işlərə kölgə salmağa çalışan müxalifətin fəaliyyəti nədən ibarətdir?

- Siyasətin bir qızıl qaydası var. Müxalifət o vaxt güclü olur ki, iqtidar zəif olur, üzərinə götürdüyü vəzifəni yerinə yetirə bilmir. Problemlər arta-arta gedir və vətəndaş problemlərinin həllini artıq müxalifətdə axtarır. Ancaq Azərbaycan iqtidarı öz üzərinə götürdüyü öhdəlikləri yerinə yetirdiyinə görə onun sosial bazası həddən artıq böyükdür. Müxalifət isə bir qrup narazı adam və yaxud fərqli düşünən insanlardır. Demokratik ölkə olduğumuza görə onların bir qayda olaraq tənqidləri ancaq günün hansısa bir hadisəsinə görə olur. Bu isə onun hazırlıqsız olduğunu göstərir. Azərbaycanın müxalifəti bu gün kabinet müxalifətidir. O regionlarla, ölkələrlə işləmir. Onun Azərbaycan coğrafiyası üzrə təsir etməyə nə marağı, nə təşkilati imkanları var. Həmçinin Azərbaycanın qarşısında duran məsələlər üzrə hansısa bir proqram irəli sürməkdənsə birmənalı olaraq məsələlərin üzərində dayanır. Ya da elə məsələlərə müxaliflik etməyə çalışır ki, o ümummilli maraq daşıyır və həmin məsələlərə müxaliflik etmək düşmən dəyirmanına su tökməkdir. Əsas məsələ ondan ibarətdir ki, Azərbaycan cəmiyyəti müxalifətin bu cür təbliğatına inanmır, ona dəstək vermir. Bu baxımdan hesab edirəm ki, Azərbaycan daim problemlərinin həll edildiyi, strateji məsələlərin gündəmə gətirildiyi bir iqtidara malikdir. Azərbayacan bundan sonra da apardığı siyasətlə daha qüdrətli və daha güclü olacaq.

- Ötən ilin sonunda Milli Məclisdə 2017-ci ilin dövlət büdcəsi layihəsi müzakirə olundu. Bu il vətəndaşın sosial həyatı hansı səviyyədə olacaq?

- 2016-cı ildə neftin qiymətinin kəskin düşməsi, həmçinin Amerika dollarının uçuş dərəcəsində qalxması bir çox ölkələrin milli valyutasına təsir etdi. Bu proses Azərbaycandan da yan ötmədi. Ancaq aparılan siyasətin təsiri ilə onun minimuma enməsinə səbəb oldu. 2017-ci ildə ilk növbədə pensiya və təqaüdlərin, dövlət qulluğunda çalışanların əmək haqlarının vaxtında verilməsi, eyni zamanda yeri gəldikcə artırılması gözlənilir. Aparılan siyasət qeyri-neft sektorunun genişlənməsinə, yeni iş yerlərinin yaradılmasına gətirib çıxarır. Ötən il bizim qəbul etdiyimiz əsas qərarlardan biri də Vergi Məcəlləsində əsaslı dəyişikliklərin olmasıdır. Bu, sahibkarın fəaliyyətinə geniş şərait yaradır. Onun vergi yükünü azaltmaqla daha çox iş yerinin açılmasına gətirib çıxarır. Bildiyiniz kimi, ötən il cənab Prezident İlham Əliyev pambıqçılığın inkişafına dövlət dəstəyini elan etdi. Bu isə yerli istehsalın artmasına səbəb olacaq. Azərbaycanda turizmin inkişafı istiqamətində atılan addımlar 2016-cı ildə öz nəticəsini verdi. Azərbaycana gələn turistlərin sayı dəfələrlə artıb. Təkcə turizimdən Azərbaycana 700 milyon dollar əlavə gəlir gətirilib. Bu da onu göstərir ki, Azərbaycanda istehsal dəyərinin artırılması, yeni iş yerlərinin açılması üçün kifayət qədər potensial var. Bütün bu məsələlər 2017-ci il büdcəsində öz əksini tapacaq. Heç şübhəsiz ki, 2017-ci ildə insanların sosial vəziyyətinin yaxşılaşdırılması, istehsalın genişlənməsi, sahibkarlığın artırılması üçün bir çox yeni addımlar atılacaq.

- Əlinizdə erməni dilində Azərbaycan həqiqətlərindən bəhs edən kitab görürük...

- Ötən ilin noyabr ayında Rusiyanın Sankt-Peterburq şəhərində mənim “Dağlıq Qarabağ” adlı kitabım erməni dilində çap olunub. Azərbaycan tarixşunaslığında birinci dəfədir ki, azərbaycanlı tədqiqatçının erməni dilində Dağlıq Qarabağla bağlı təbliğat əsəri ortaya çıxdı. Kitab 2012-ci ildə Azərbaycan, 2014-cü il Türkiyədə türk, ötən il isə erməni dilində nəşr olundu. Bu il, eyni zamanda, onun Polşada polyak dilində çıxması gözlənilir. İmkan olduqca bu kitabı ayrı-ayrı ölkələrdə, başqa dillərdə də çap etdirəcəyəm. Kitab 400 səhifədən ibarətdir, içində yeddi tarixi xəritə var. Həmçinin Dağlıq Qarabağ probleminə dair 35 şəkil, Xocalı soyqırımına aid şəkillər və bir çox müqayisəli şəkillər verilib. Ağdam şəhər qəbirstanlığının ermənilər tərəfindən dağıdılmış şəkilləri göstərilib. Şuşada dağıdılmış məscid və Bakıda salamat qalan erməni kilsəsinin şəkilləri var. Bu kitab artıq satışa çıxarılıb. Eyni zamanda internetdə yerləşdirilib. Hesab edirəm ki, biz erməni auditoriyasını da bu məsələ ilə bağlı müəyyən qədər məlumatlandıra biləcəyik. Eyni zamanda, bu kitabın erməni dilində buraxılması gələcəkdə digər tədqiqatçılarımızın bu çapa istinadən hansısa bir material üzərində işləməsinə şərait yaradacaq. Dağlıq Qarabağ probleminə dair faktlar, həqiqətlər Azərbaycan tədqiqatçıları tərəfindən öyrənilir, bütün dünyaya yayılır.

Şəmsiyyə Əliqızı,

Şəfiqə Dadaşova

İki sahil.- 2017.- 18 yanvar.- S.12.