AMEA Naxçıvan Bölməsinin Əlyazmalar Fonduna qədim kitablar təqdim olunub

Naxçıvan Bölməsinin Əlyazmalar FonduNaxçıvan Muxtar Respublikasının Mədəniyyət və Turizm Nazirliyi tərəfindən Məmmədhəsən Mollazadeyi Şəkəvi tərəfindən tərcümə edilən və 1908-ci ildə Tiflis şəhərində “Qeyrət” nəşriyyatında çap olunan “Qurani Kərim:təfsir əl bəyan”, 1922-ci ildə Bakıda birinci hökümət mətbəəsində nəşr edilən Cami Cəbrailbəylinin “Elmi heyvanat” dərsliyi və 1907-ci ildə Bakı şəhərində çap olunan “Kərbəla faciəsi”, ümumilikdə 18 kitab və əlyazma AMEA Naxçıvan Bölməsinin Əlyazmalar Fonduna təqdim olunub.

Naxcivantv.az xəbər verir ki, təqdimat mərasimində AMEA Naxçıvan Bölməsinin sədri, akademik İsmayıl Hacıyev qeyd edib ki, Əlyazmalar Fondu 2005-ci ildən fəaliyyətə başlayıb. Müxtəlif şəxslər və təşkilatlar tərəfindən fonda verilən qədim çap kitablarının və əlyazmaların sayı təxminən 400-ə çatıb.

Tədbirdə mədəniyyət və turizm naziri Natəvan Qədimova deyib ki, muxtar respublikamızda muzey fondlarının zənginləşdirilməsi, onların yeni eksponatlarla təmin olunması daim diqqət mərkəzində saxlanılır. Bu prosesdə muzey əməkdaşları və muxtar respublika sakinləri yaxından iştirak edirlər. Ötən il muzeylərə 1500-dən çox, bu ilin 9 ayı ərzində isə 993 eksponat daxil olub.

Əlyazmalar Fondunun əməkdaşları hazırda Naxçıvan əlyazmalarının toplanılması, sistemləşdirilməsi, katoloqlaşdırılması və tədqiqi ilə məşğuldurlar,-- deyən Əlyazmalar Fondunun direktoru, filologiya üzrə elmlər doktoru Fərman Xəlilov bildirib ki, onlar qədim kitab və əlyazmalar üzərində tədqiqatlar aparır, nəticələr müxtəlif elmi jurnallarda və kitablarda nəşr edilir.

Sonda tədbir iştirakçıları fonddakı qədim kitab və əlyazmalarla tanış olublar.

Əbülfəz Dünyamalıyev

İki sahil.- 2018.- 4 aprel.- S.17