Sənayeləşmə iqtisadiyyatın əsas prioritetlərindəndir

Prezident İlham Əliyevin rəhbərliyi ilə son illərdə ölkəmizdə qeyri-neft sektorunun əsas istiqaməti kimi sənayeləşmə siyasəti geniş miqyasda həyata keçirilib, yüzlərlə sənaye müəssisəsi inşa edilib, bu sahədə güclü potensial yaradılıb. Sənayeləşmə iqtisadiyyatın əsas prioritetlərindən birinə çevrilib.

Ölkəmizdə aparılan genişmiqyaslı köklü islahatlar iqtisadiyyatın bütün sahələrində olduğu kimi, sənayenin də dirçəlişinə ciddi təkan verib. İstehsal sahələrinin inkişaf etdirilməsi, yeni müəssisələrin yaradılması, xüsusən də ölkənin neft-qaz sənayesinin sürətli inkişafı ümumi daxili məhsulun strukturunda sənaye istehsalının payının getdikcə artmasına gətirib çıxarıb.

Prezident İlham Əliyev 2018-ci il aprelin 18-də andiçmə mərasimində bildirib ki, iqtisadiyyatımız son 15 il ərzində 3,2 dəfə artıbdır: “Bu çox böyük göstəricidir. Əlbəttə ki, bu göstəricinin tərkibində neft amili xüsusi yer tutur. Ancaq bununla bərabər, bizim qeyri-neft ixracımız 15 il ərzində dörd dəfədən çox artıb. Bu onu göstərir ki, islahatlar böyük səmərə verir. Sənaye istehsalı 2,6 dəfə artıb. Valyuta ehtiyatlarımız 24 dəfə artıb. Bu gün bu ehtiyatlar 44 milyard manat təşkil edir. Ölkəmizə 231 milyard dollardan çox sərmayə qoyulub. Davos Dünya İqtisadi Forumu rəqabətqabiliyyətliliyinə görə ölkəmizi 35-ci yerə layiq görüb”.Qeyri-neft sektorunun davamlı inkişafını təmin etmək və əhalinin istehsal sahəsində məşğulluğunu artırmaq məqsədi ilə sənaye parkları və sənaye zonalarının yaradılması davam etdirilir. Hazırda ölkəmizdə Sumqayıt Kimya Sənaye, Balaxanı Sənaye və Qaradağ Sənaye parkları fəaliyyət göstərir. Sumqayıt Sənaye Parkında istehsal olunacaq məhsullar daxili bazarın tələbatını ödəməklə yanaşı, “Made in Azerbaijan” brendi ilə xarici bazarlara da ixrac ediləcək. Artıq Sənaye Parkının rezidenti olan “Azertexnolayn” müəssisəsi istehsal etdiyi məhsulun 52 faizini ixrac edib. Sumqayıt Kimya Sənaye Parkında həyata keçirilən ən böyük layihələrdən olan “SOCAR Polimer”də istehsal olunacaq polipropilen və yüksək sıxlıqlı polietilen ixrac olunmaqla yanaşı, yerli müəssisələrin xammala olan tələbatını ödəyəcək. Gəmiqayırma sahəsində ixtisaslaşmış Qaradağ Sənaye Parkına indiyədək 470 milyon dollar investisiya qoyulub ki, bu, 2000 nəfərin daimi işlə təmin olunmasına imkan verir.Mingəçevir Sənaye Parkında yüngül sənaye məhsulları, o cümlədən ayaqqabı, tibbi kosmetika, iplik, boyama, toxuma, tikiş və corab istehsalı üzrə 9 fabrikin yaradılması yeni iş yerlərinin açılması baxımından mühüm əhəmiyyət kəsb edir. Parkda yaradılacaq müəssisələr üçün xammal bazası, o cümlədən pambıq mahlıcı yerli məhsullar hesabına təmin ediləcək. Bütün bunlar ölkədə ilk dəfə olaraq yüngül sənaye sahəsində klaster yanaşmasının geniş tətbiqinə imkan verəcək. Pirallahı Sənaye Parkında artıq 2 dərman zavodunun təməli qoyulub.Göründüyü kimi, sənayeləşdirmə siyasətinin uğurla həyata keçirilməsi nəticəsində yeni sənaye müəssisələrinin, texnoparkların, ixracyönümlü sənaye məhsulları istehsal edən emal müəssisələrinin, böyük sənaye komplekslərinin yaranması qeyri-neft sektorunun inkişafını daha da gücləndirəcək, neft-qaz amilindən asılılığı daha da azaldacaq, yeni iş yerlərinin açılmasına, əhalinin məşğulluq səviyyəsinin yüksəlməsinə, ölkə iqtisadiyyatının dayanıqlı inkişafına böyük töhfələr verəcəkdir.

Zahid Rza

İki Sahil.- 2018.- 1 iyun.- S.17.