Təcrübə proqramında iştirak edəcək ASAN könüllülərlə görüş

SOCAR 2016-cı ildən Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi ilə bağlanmış Əməkdaşlıq Sazişi əsasında “ASAN school” könüllülük proqramının tərəfdaşlarından biridir. ASAN Könüllülük Məktəbinin “Master-2” layihəsi çərçivəsində SOCAR-ın idarə və müəssisələrində 2018-ci ilin oktyabr-dekabr aylarında təcrübə keçəcək 18 nəfər könüllü ilə oktyabr ayının 5-ində Baş Ofisin İnsan Resursları Departamentində (İRD) görüş keçirilmişdir. Görüşdə SOCAR-ın Baş Ofisinin İRD-nin rəisi Asif Bəkirli, İRD-nin Təlim və inkişaf şöbəsinin rəisi Tural Məmmədov və şöbənin əməkdaşları, həmçinin Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin İnsan resursları və təlim şöbəsinin sektor müdiri Sahil Məmmədli və agentlik əməkdaşları iştirak etmişlər.

İRD-nin rəisi Asif Bəkirli təcrübə proqramına qoşulmaq üçün bütün mərhələləri uğurla keçmiş gəncləri təbrik edərək bildirmişdir ki, bu SOCAR ilə “ASAN xidmət”in əməkdaşlığı çərçivəsində 5-ci təcrübə qrupudur və indiyədək 5 qrup üzrə 384 müraciətdən 99 nəfər təcrübə üçün seçilmişdir. A. Bəkirli gənclərə test və İRD-nin mütəxəssisləri ilə müsahibə mərhələsindən keçərək seçilmələrinin onlar üçün uğurlu bir nəticə olduğunu, təcrübə müddəti boyunca da bu fürsəti dəyərləndirərək ixtisasları üzrə praktiki biliklərini artıraraq gələcəkdə əmək bazarında daha rəqabətqabiliyyətli kadr olacaqlarını vurğulamışdır. SOCAR-da İnsan resurslarının idarə edilməsi siyasəti və bununla bağlı həyata keçirilən yeni layihələr, şirkətdə gənc potensiallı mütəxəssislərə böyük ehtiyac olması, bu ehtiyacı ödəmək üçün görülən tədbirlərdən Daxili Təqaüd Proqramı və Ödənişli Yay Təcrübəsi proqramı haqqında könüllüləri məlumatlandıran İRD-nin rəisi “ASAN xidmət”lə əməkdaşlığın da bu layihələr arasında xüsusi yerini qeyd etmişdir. A.Bəkirli dövlətin gənclər siyasətinin davamı olaraq bu layihənin də gənclərin dəyərli insan kapitalı olaraq yetişməsində önəminə diqqət çəkmişdir. O, bildirmişdir ki, könüllülərin SOCAR-da qazanacaqları geniş bilik və təcrübə onların gələcəkdə tərcümeyi-hallarında əksini tapacaq və işə qəbul üçün müraciətləri zamanı onlara kömək edəcək, eyni zamanda, karyera inkişaflarında yardımçı olacaqdır. A. Bəkirli təcrübə müddəti boyunca yaranacaq bütün suallarını və əlavə təkliflərini İRD-yə çəkinmədən bildirə biləcəklərini qeyd edərək onlara uğurlar arzulamışdır.

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin nümayəndəsi Sahil Məmmədli çıxış edərək öz növbəsində SOCAR rəhbərliyinə və İRD-yə təcrübə proqramı üçün rahat şərait yaratdığı üçün təşəkkürlərini bildirmiş, ASAN könüllülər arasında SOCAR-da təcrübə keçmək üçün böyük marağın olduğunu qeyd etmişdir. Təcrübə proqramının gənclərin özlərini inkişaf etdirməsi baxımından, gələcəkdə iş müraciətlərində karyeraları yönündə üstünlükləri olduğunu bildirən S. Məmmədli könüllülərə müvəffəqiyyətlər arzulamış və fürsəti yaxşı dəyərləndirmələrini tövsiyə etmişdir.

Görüşün sonunda iştirakçılar xatirə şəkli çəkdirmişdirlər.

Zamin Məmmədov

İki sahil.-2018.- 9 oktyabr.- S.6.