Ulu Öndər müstəqilliyimizin əbədiliyini təmin etdi

Bu gün Yeni Azərbaycan Partiyası (YAP) Səbail rayon “Botanik” ərazi ilk partiya təşkilatında (AMEA-nın Botanika İnstitutu) 18 oktyabr – Dövlət Müstəqilliyi Günü münasibətilə yığıncaq keçirilib.

Əvvəlcə tədbirdə Azərbaycanın dövlət müstəqilliyinin bərpasının 27-ci ildönümünə həsr olunmuş videofilm nümayiş olunub. Botanika İnstitutunun direktoru akademik Validə Əlizadə 1991-ci ildə Azərbaycanın dövlət müstəqilliyinin bərpasını yeni siyasi tariximizin ən əlamətdar hadisəsi kimi qiymətləndirib. O, dövlət müstəqilliyimizin möhkəmləndirilməsində ulu öndər Heydər Əliyevin misilsiz xidmətləri haqqında danışaraq qeyd edib ki, Ümummilli Liderin əsasını qoyduğu uzaqgörən siyasət və bu siyasi kursu uğurla davam etdirən ölkə başçısı cənab İlham Əliyevin praqmatik idarəçiliyi nəticəsində bu gün müasir müstəqil Azərbaycan dövləti dinamik şəkildə inkişaf edir. Bildirilib ki, Azərbaycan xalqının milli maraqlarına xidmət edən bu siyasəti dəstəkləmək və ölkəmizdə mövcud olan xalq-iqtidar birliyinin daimiliyini təmin etmək hər birimizin vətənpərvərlik borcumuzdur.

Milli Məclisin deputatı, YAP Səbail rayon təşkilatının sədri, professor Şəmsəddin Hacıyev dövlət müstəqilliyimizin bərpa olunmasının ilk illərində Azərbaycanda gedən gərgin, ziddiyyətli proseslər, ictimai-siyasi həyatın bütün sahələrini əhatə edən böhran və ulu öndər Heydər Əliyevin belə bir çətin vaxtda xalqın təkidli tələbi ilə ölkə rəhbərliyinə gəlməsi, Azərbaycanı tənəzzüldən qurtuluş yoluna çıxarması haqqında ətraflı danışıb. Bildirib ki, ulu öndər Heydər Əliyev Azərbaycanın müstəqilliyinin əbədi olması üçün ölkəyə rəhbərlik etdiyi 1993-2003-cü illər ərzində möhkəm siyasi və iqtisadi təməllər formalaşdırdı: “Azərbaycanın müstəqilliyinin əbədi olması üçün davamlı və dayanıqlı inkişafı təmin edən siyasi kurs müəyyənləşdirdi. Ulu Öndər bütün sosial-iqtisadi sahələrdə əsaslı və sistemli islahatlar həyata keçirdi, keçid dövrünün problemlərini həll etdi və Azərbaycan tənəzzüldən çıxaraq inkişaf, tərəqqi yoluna qədəm qoydu.

Ş.Hacıyev cənab Prezident İlham Əliyevin rəhbərliyi ilə son 15 il ərzində ölkə daxilində və beynəlxalq səviyyədə əldə olunan uğurlar, Azərbaycanda müşahidə olunan dinamik iqtisadi tərəqqi, ictimai-siyasi sabitlik və gündən-günə daha möhkəmlənən xalq-iqtidar-ordu birliyi haqqında geniş məlumat verib.

Sonda YAP sıralarına yeni qəbul olunmuş AMEA-nın Botanika İnstitutunun bir qrup əməkdaşına partiyanın üzvlük vəsiqələri təqdim olunub.

Cavid Əkbərov

İki sahil.- 2018.- 9 oktyabr.- S.7.