Dağlıq Qarabağ Azərbaycan ərazisinin bir hissəsidir

Almaniyadan dövlətimizin haqq işinə tam dəstək: Dağlıq Qarabağ Azərbaycan ərazisinin bir hissəsidir

Bu günlərdə Almaniya bundestaqının sağçı radikal AfD fraksiyasının Almaniya Federativ Respublikası (AFR) hökumətinə göndərdiyi “Almaniya-Ermənistan münasibətləri” mövzusunda kiçik sorğusunda Dağlıq Qarabağla bağlı bəzi suallar da öz əksini tapıb .

Almaniya mətbuatında yer alan xəbərlərə görə, AFR hökumətinin sözügedən sorğuya cavabının girişində qeyd edilib: “AFR hökuməti xüsusi olaraq vurğulayır ki, “Almaniya-Ermənistan münasibətləri” anlayışı ilə AFR və Ermənistan arasındakı münasibətlər başa düşülməlidir. AFR hökuməti Ermənistan silahlı qüvvələrinin nəzarət etdiyi yerləşən Dağlıq Qarabağ regionu və yeddi ətraf rayonu Azərbaycanın bir hissəsi hesab edir. AFR hökuməti qondarma “Dağlıq Qarabağ Respublikası”nı tanımır.”

Hökumət sorğunun müvafiq bəndlərinə (Dağlıq Qarabağda insan hüquqlarının, mətbuat azadlığının, azlıqların vəziyyəti, orada yaşayan almanların sayı və s.) dair cavabında bu qeydinə istinad etməklə kifayətlənib.

Həmçinin sorğuda yer alan “AFR hökuməti Dağlıq Qarabağın beynəlxalq hüquqi statusunu necə qiymətləndirir?” sualını hökumət “Dağlıq Qarabağ bölgəsi Azərbaycan Respublikasının ərazisinin bir hissəsidir” şəklində cavablandırıb.

Bu fakt beynəlxalq arenada Azərbaycanın haqq işinə tam dəstək verildiyinin növbəti göstəricisidir. Bu isə Azərbaycan dövlətinin və Prezidentinin son 15 il ərzində apardığı məqsədyönlü siyasətin nəticəsində mümkün olmuşdur. Prezident İlham Əliyev çıxışlarında dəfələrlə Azərbaycanın öz haqq işi uğrunda prinsipial və ardıcıl şəkildə bütün səylərini səfərbər etdiyini vurğulayır: “Bizim dünyadakı mövqelərimiz möhkəmlənir, Azərbaycan çox müsbət beynəlxalq reputasiyaya malik olan bir ölkədir. Bizə qarşı dünya birliyi tərəfindən böyük rəğbət, dəstək var, biz bunu hiss edirik və əldə edilmiş nəticələr, qəbul edilmiş qərarlar bunu bir daha təsdiqləyir. Biz son 15 il ərzində beynəlxalq təşkilatlar çərçivəsində çox fəal iştirak etmişik, bundan sonra da fəal iştirak edəcəyik. Beynəlxalq təşkilatlar Azərbaycanın mövqeyini dəstəkləyir, xüsusilə Ermənistan-Azərbaycan, Dağlıq Qarabağ münaqişəsinin həlli ilə bağlı bizim ədalətli mövqeyimizi dəstəkləyir. Dünyaya bir daha sübut edə bilmişik ki, biz haqlıyıq. Bizim diplomatik və siyasi uğurlarımız öz nəticəsini verməkdədir”.

Sevinc Abdullayeva

İki sahil.-2018.- 11 oktyabr.- S.10.