"Skandinaviya - Azərbaycan əlaqələrində gənclərin rolu"

Bu gün Bakı Azərkitab Kitab Təbliğatı Mərkəzində "Skandinaviya - Azərbaycan əlaqələrində gənclərin rolu" mövzusunda konfrans keçirilib. SİA-nın verdiyi məlumata görə, tədbiri giriş sözü ilə açan Gənc Politoloqlar Mərkəzinin sədri İlkin Əliyev bildirib ki, Gənc Politoloqlar Mərkəzi 1998-ci ildə yaranıb. Keçən müddət ərzində təşkilatımız bir çox layihələr həyata keçirərək gənclərin dövlətçilik, milli-mənəvi dəyərlər və hərbi-vətənpərvərlik tərbiyəsində aktiv iştirak etmişdir. Bu müddət ərzində dövlət və qeyri-hökümət təşkilatları ilə sıx əməkdaşlıq edərək, Qeyri Hökümət Təşkilatlarına Dövlət Dəstəyi Şurasının və Gənclər Fondunun ayırdığı qrant layihələri əsasında respublikamızın ərazisində bir çox layihələr həyata keçiriblər”.

Prezident Administrasiyasının ictimai-siyasi məsələlər şöbəsinin sektor müdiri Qafar Əliyev çıxışında deyib ki, Umaf Gənclər Təşkilatının sədri Siavosh Derakhti və Gənc Politoloqlar Mərkəzinin sədri İlkin Əliyevin təşkilatçılığı ilə İsveç kralığında, Norveçdə və ABŞ-da yaşayan 20-dən çox gənc Azərbaycan Respublikasına səfərə gəlib: “Bu səfərin təşkilatçılarının əsas məqsədi ilk öncə, Azərbaycanı tanıtmaq, gənc və müstəqil dövlətin yeritdiyi daxili və xarici siyasətin mahiyyətini, onun iqtisadi, turizm potensialını, tarixini, mədəniyətini, idmanını, ən əsas isə gənclərin necə yaşamasını, təhsil almasını Avropa, Amerika və dünyanın başqa dövlətlərindən gəlmiş gənclərə öyrənməktən ibarətdir”.

Yeni Azərbaycan Partiyası Siyasi Şurasının üzvü, “İki Sahil” qəzetinin baş redaktoru Vüqar Rəhimzadə bildirib ki, 25 gəncin Azərbaycana səfər etməsi, burada iştirakı və ölkəmizdə görülən işləri öz gözləri ilə görməsi çox əhəmiyyətlidir: “Hesab edirəm ki, qarşılıqlı olaraq bizim gənclərin İsveçrəyə səfəri də çox əhəmiyyətli olacaq. Bu qarşılıqlı səfərlərin təşkil olunması gənclərin bilavasitə bu ölkələrlə daha yaxından təmasda olması, tanıması üçün əlverişli imkanlar yaradır. Düşünürəm ki, İsveçrədən gələn qonaqlar öz ölkələrinə Azərbaycanla bağlı xoş təəssüratla qayıdacaqlar. Hesab edirəm ki hər bir gənc orada Azərbaycanı təmsil edən gənclər kimi mühüm rol oynayacaqlar”.

“SƏS” Media Qrupunun rəhbəri, fəlsəfə üzrə fəlsəfə doktoru Bəhruz Quliyev isə nitqində Azərbaycanın inkişafı, mətbuat sahəsinə dövlətin göstərdiyi diqqət və qayğıdan danışıb: “Sovetlər dövründə mətbuat kommunizm ideologiyasına xidmət etsə də, Ümummilli Liderimiz Heydər Əliyevin Azərbaycanda rəhbərliyə gəlməsindən sonra mətbuatımız milli düşüncənin və milli şüurun inkişafında mühüm rol oynamağa başladı. 1991-ci ildə Azərbaycan öz müstəqilliyini bərpa etdikdən sonra isə mətbuatımızın inkişafında yeni mərhələ başlandı”.

Baş redaktor qeyd edib ki, Ulu Öndərimizin əsasını qoyduğu bu siyasət hazırda Prezident İlham Əliyev tərəfindən uğurla davam etdirilir. Prezident İlham Əliyevin mediaya xüsusi diqqətlə yanaşdığını deyən B.Quliyevin sözlərinə görə, bunun nəticəsidir ki, Azərbaycan mətbuatının inkişafına dəstək məqsədilə Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu yaradılıb. Fond ötən dövr ərzində mediaya dəstək verilməsi sahəsində mühüm işlər görüb.

Qurum rəhbəri əlavə edib ki, bu gün ölkədə söz və mətbuat azadlığı üçün heç bir maneə və təhlükə yoxdur, jurnalistlər istədikləri mövzunu açıq şəkildə cəmiyyətin diqqətinə çatdıra bilirlər: “Dövlətimizin başçısı son 15 ildə respublikada kütləvi informasiya vasitələrinin sərbəst fəaliyyət göstərməsi, jurnalistlərin öz iradələrini azad şəkildə ifadə etmələri üçün bütün zəruri imkanlar yaradıb. Ölkə Prezidenti həmçinin, jurnalistlərin sosial problemlərinin həllini, eləcə də, mətbuatın maddi-texniki bazasının gücləndirilməsini daim diqqət mərkəzində saxlayır. Jurnalistlərin mənzil-məişət şəraitinin yaxşılaşdırılması üçün təmənnasız olaraq yaşayış binalarının tikilib istifadəyə verilməsi, vaxtaşırı olaraq KİV-lərə maliyyə dəstəyinin göstərilməsi və s. faktlar fikrimizi sübut edir”.

Daha sonra digər çıxış edənlər Azərbaycan Respublikasının yeritdiyi daxili və xarici siyasəti, olkəmizdə mövcud olan dini tolerantlıq və multikulturalizm mühitini, aparılan uğurlu iqtisadi, siyasi və hüquqi islahatların, eləcə də gənclər siyasətinin, Dağlıq Qarabağ probleminin mahiyyətini və danışıqlar prosesinin gedişini İsveç Krallığında yaşayan gənclərə çatdırmaq məqsədi ilə 2018-ci il oktyabrın 28 dən noyabrın 4-nə qədər 20-dən artıq gənclər təşkilatçılar tərəfindən Azərbaycan Respublikasına dəvət olunmasını yüksək qiymətləndirib və belə tədbirlərin keçirilməsini dəstəklədiklərini bildiriblər.

Şəfiqə Dadaşova

İki sahil.- 2018.- 30 oktyabr.- S.15