Sözün qüdrəti “Səs”in sədasında

Bu gün respublikanın çoxsaylı mətbu orqanları arasında səsi, sorağı, dəst-xətti ilə seçilən “Səs” qəzetinin oxucuları ilə ilk görüşündən 27 il keçir. Mətbuat orqanı üçün bu müddət o qədər böyük dövr sayılmasa da qəzetin kollektivi Azərbaycan mətbuatının inkişafında, söz və fikir azadlığının müdafiəsində, vətəndaşların hüquq və azadlıqlarının qorunmasında öz sözünü deyə bilib. Ötən ilin müşahidələri göstərir ki, infomasiyaların ictimaiyyətə qərəzsiz, obyektiv çatdırılmasında “Səs”in çox böyük rolu və təcrübəsi var. Təbii ki, Azərbaycanın ictimai-siyasi həyatında kifayət qədər rolu və xidmətləri olan mətbu orqanların hər birinin mövqeyi, cəmiyyətdəki yeri oxucularının sayı ilə bəlli olur. Bu baxımdan “Səs”i öndə gedən qəzetlərdən saymaq olar.

Söz, mətbuat azadlığının davamlı inkişafda olduğu, KİV-ə dövlət dəstəyinin artdığı müasir dövrümüzdə ölkəmizdə kifayət qədər mətbu orqan olsa da, “Səs” bu bolluqda imzasına sadiq qəzetlərdən olduğunu oxucularının rəğbətini qazanmaqla təsdiqləyir. Yaşı az, təcrübəsi çox olan bu qəzet cəmiyyətdə öz mövqeyi, operativliyi, jurnalist peşəsinə verdiyi, informasiyaları üçün daşıdığı məsuliyyəti ilə seçilir. İllərdən bəri maraqlı, oxunaqlı yazıları ilə insanların diqqətini cəlb edən, ictimai tribuna adını qazanan qəzetin əhatə dairəsi ildən-ilə genişlənir, oxucu auditoriyası artır.

1990-cı illərin əvvəllərində, müstəqilliyimizin təhlükə altında olduğu, suverenliyimizi istəməyən, daxili və xarici qüvvələrin təxribatlarının davam etdiyi vaxtlarda əsl vətəndaşlıq mövqelərini ortaya qoyaraq daxili və xarici bədxahlara qarşı sözün qüdrəti ilə mübarizə apararaq təxribat törədənlərin əsl niyyətlərini ictimaiyyətə çatdıran qəzetin hər bir əməkdaşı peşəkarlıqlarını cəsarətli mövqeləri ilə bildirmiş, ümumxalq mənafeyini əks etdirən yazıları ilə diqqət çəkmişlər. Dövlətimiz və xalqımız üçün taleyüklü bir dövrdə əsası qoyulmuş bu mətbu orqan daim cəmiyyətin aktual problemlərini qətiyyətlə ictimai müzakirəyə çıxarmış, bir növ ziyalılarımızın, mütəxəssislərimizin, siyasi şərhçilərimizin cəmiyyəti düşündürən ayrı-ayrı prioritet məsələlər üzrə dialoq platformasına çevrilmişdir.

Həmkarlarımız üçün əlamətdar gün olan bu günü öz bayramları hesab edən “İki sahil” qəzetinin kollektivi ideya və əqidəsinə sadiq “səsçilər”in sevincinə şərik olur. Bu səmimiyyət o ağır illərdə hadisələrə eyni mövqedən yanaşan, əqidəsinə sadiqliyini dövlətçilik mənafeyini əks etdirən yazıları ilə bildirən hər iki qəzetə eyni münasibət göstərən ulu öndər Heydər Əliyev müstəqil qəzet kimi fəaliyyət göstərən “Səs” və “İki sahil” qəzetlərinin kollektivlərinin xidmətlərini yüksək dəyərləndirib: “İki sahil” qəzeti də bizim çoxdankı qəzetlərimizdəndir. Yenə də o dövrdə biz Naxçıvanda blokada şəraitində yaşadığımız dövrdə bu qəzetin indiki redaktoru Vüqar Rəhimzadə tez-tez Naxçıvana gələrdi və hələ partiya yaranandan xeyli əvvəl Naxçıvanın işləri haqqında materiallarımızı dərc edərdi. İndi o bizim Yeni Azərbaycan Partiyasının qəzetidir. Çox inkişaf edib, böyüyüb, genişlənib və güman edirəm ki, bu yolla gedərsə, daha da güclü qəzet olacaqdır.”

“Səs”in fəaliyyətini yüksək qiymətləndirən ulu öndər Heydər Əliyevin bu sözləri də qəzet kollektivinin əməyinə verilən böyük dəyər idi: “Səs” qəzeti artıq tarixə düşmüş qəzetdir. “Səs” qəzeti mənim üçün çox əziz qəzetdir. 1990-cı ilin fevral ayında Azərbaycanda kommunist hakimiyyəti dövründə mən Ali Sovetdə çıxış edəndən sonra mənim çıxışım- xatirinizdədir, o vaxt mənim çıxışımı hörmətdən salmağa çalışdılar, onu dərc etmək də istəmirdilər, amma mənə lazım idi ki, o dərc olunsun, - “Səs” qəzetində dərc edildi. Mən Naxçıvanda işləyərkən bizim bir neçə tədbirlərimiz barədə yazıları “Səs” qəzetində dərc edə bildik. Nəhayət, “Səs” qəzeti “91-lər”in müraciətini dərc edib, mənim cavabımı dərc edibdir. Ona görə “Səs” qəzeti bizim partiyanın tarixində ən mötəbər yer qazanmış bir qəzetdir. Görürəm ki, son vaxtlar özünün xüsusiyyətini itirmədən modernləşir, yaxşılaşır. Arzu edirəm ki, daha da modernləşsin və yaxşılaşsın.”

Qəzetin bu gün nail olduğu uğurlar göstərir ki, Ümummilli Liderin qeyd etdiyi kimi, dünya mətbuatının tələblərinə uyğun inkişaf yolu keçmiş “Səs” həqiqətən ulu öndər Heydər Əliyevin tövsiyə etdiyi səviyyəyə çatıb.

O zamanlar Naxçıvan MR Ali Məclisinin sədri vəzifəsində işləyən ümummilli lider Heydər Əliyevin Azərbaycan, azarbaycançılıq, müstəqillik naminə göstərdiyi tarixi xidmətləri oxuculara çatdıranlar arasında əqidələrinə sadiq “səs”çilər var idi. Bu gün oxucuları ilə daha geniş çoğrafiyada görüşən “səs”çilər informasiyalarını “Səs” Media Qrupuna daxil olan “Səs” İnformasiya Agentliyi, “Səs” TV internet televiziyası vasitəsilə də çatdırır. “Səs” İnformasiya Agentliyinin balansında bir neçə portal da fəaliyyət göstərir.

Bu gün Azərbaycanın bütün dünyada qüdrətli dövlət kimi tanınmasında, ölkədə aparılan quruculuq işlərinin, mətbuatın üzərinə düşən maarifçilik ideyalarının təbliğində yaxından iştirak edən bu qəzet əsl mənada dövlətçiliyin möhkəmlənməsində, sağlam vətəndaş cəmiyyətinin formalaşmasında ümumxalq rəyinin ifadəsinin əsl tribunasına çevrilmişdir.

Azərbaycan mətbuatının inkişafında, söz və fikir azadlığının müdafiəsində, vətəndaşların hüquq və azadlıqlarının qorunmasında öz sözünü deyən qəzetin hər bir əməkdaşı çalışdığı mətbu orqanın mövqeyinə sadiq qalaraq, Azərbaycanın milli maraqlarının qorumasında maarifçilik ideyalarının təbliğində yaxından iştirak edir. Bu baxımdan Azərbaycanın bütün bölgələrində “Səs”in sədasına ehtiyac var.

“Səs” bu gün da yolunu uğurla davam etdirir. 27 illik təcrübəsinə əsaslanaraq fəaliyyətini müasir dövrün , dünya mətbuatının tələblərinə uyğun təkmilləşdirərək oxucularını yeni, maraqlı informasiya və quruculuq işləri ilə tanış edir, bir məktəb formalaşdırır. Qəzet əməkdaşlarının təşəbbüsü kimi yüksək dəyərləndirilən və mütəmadi olaraq keçirilən “dəyirmi masa”larda müzakirəyə çıxarılan mövzular aktuallığı ilə diqqəti çəkməklə oxuculara bələdçilik funksiyasını da ləyaqətlə yerinə yetirir.

Qəzet xarici ölkələrdə yaşayan hər bir azərbaycanlının tribunasına çevrilməklə soydaşlarımızın həyatı, fəaliyyəti barədə də maraqlı yazıları ilə diqqət çəkir. Əsas işi xəbər yaymaq olsa da, milliliyi, azərbaycançılığı başlıca prinsip olaraq təbliğ edən qəzet vətəndaşlıq mövqeyinin daşıyıcısı kimi də respublikamızın həyatında fəal mövqedə dayanan informasiya vasitəsidir.

Xəbər çatdırmaq ənənələrinin formalaşmasında mühüm rol oynayan “Səs”in əsas prinsipi Azərbaycan mediasının tanınmış üzvlərindən biri kimi oxucu rəğbəti qazanmaq, çətinlikləri birgə əməyin qüdrəti ilə aradan qaldırmaq, başqalarının getmədiyi və sonu uğurla nəticələnən bir yolla irəliləmək, ardıcıllarına nümunə olmaqdır.

Əminliklə demək olar ki, “Səs”in milli mətbuat tarixində xüsusi yeri, çəkisi var. Fəaliyyətində peşəkarlığı, obyektivliyi, qərəzsizliyi başlıca meyar olaraq götürmüş qəzet daim dövlətçilik və azərbaycançılıq mövqeyindən çıxış edir. Arxada qalan illər ərzində bir məktəb kimi formalaşan, illərin sınağından layiqincə çıxan qəzetin vətəndaş cəmiyyətinin inkişafına böyük töhfələri bu gün də hiss olunur.

“Səs” fəaliyyətə başladığı gündən cəmiyyətdə baş verən hadisələri işıqlandırmaqla kifayətlənməmiş, həm də öz prinsipial mövqeyi, vətənpərvərlik və dövlətçilik xətti, milli maraqlarımıza sadiqlik və təəssübkeşlik mövqeyi ilə geniş oxucu kütləsinin rəğbətini qazanmışdır. Bildiyimiz kimi, hal-hazırda yaşadığımız XXI əsr informasiya əsri kimi xarakterizə olunur. Bu baxımdan, istər qəzet, istərsə də İnformasiya Agentliyi kimi “Səs” Media Qrupuna daxil olan strukturların milli informasiya ehtiyatlarının formalaşması, cəmiyyətin operativ, obyektiv və dolğun informasiya ilə təmin olunması və milli informasiya təhlükəsizliyimizin təminatı istiqamətindəki fəaliyyəti təqdirəlayiqdir. Eyni zamanda, bu mətbu orqan yaradıcı gənclərin üz tutduğu tribuna kimi xeyirxah münasibətini dövlət gənclər siyasətinin əhəmiyyətini işıqlandırmaqla da bildirir. Yaradıcı gəncləri və onların əsərlərini cəmiyyətə təqdim edən mətbuat orqanı kimi fərqlənir, fəaliyyəti dövründə cəmiyyətdə söz və fikir azadlığının gerçəkləşdirilməsində rolu əvəzedilməzdir. Bu qəzet Azərbaycan mətbuatının bir nümunəsi kimi dünya mətbuatının ümumi inkişaf xəttinə uyğun şəkildə inkişaf edir. Eyni zamanda, səhifələrində Azərbaycan jurnalistikasının özünəməxsus ənənələrini layiqincə davam etdirir. Çoxlu sayda kütləvi informasiya vasitəsi - qəzetlər, informasiya agentlikləri, internet portalları, elektron KİV-lər və jurnallar qeydiyyatdan keçsə də, ictimai rəğbət qazanan KİV-lər sırasında “Səs”in də payı var. “Səs” sabit oxucu bolluğuna malik, insanlarla müntəzəm təmasda olan qəzetdir.

İllərdən bəri maraqlı, oxunaqlı yazıları ilə insanların diqqətini cəlb edən qəzetin əhatə dairəsi ildən-ilə genişlənir, oxucu auditoriyası artır. Ulu öndər Heydər Əliyevin rəhbərliyi ilə təsis olunan Yeni Azərbaycan Partiyasının məqsəd və məramının, Proqram və Nizamnaməsinin təbliğində, partiyanın yerli təşkilatlarının formalaşıb, sayının artmasında qəzetin misilsiz xidmətləri danılmazdır.

Qəzet cəmiyyətin aynasıdır. Bu mənada “Səs” ictimaiyyətdə yaratdığı nüfuza sahib olan, kifayət qədər ədalətli mövqeyi ilə seçilən, informasiyaları qərəzsiz çatdıran mətbuat orqanlarından biri kimi tanınır. Çünki qəzetin yaradıcı kollektivi ölkəmizdə baş verən tərəqqini, bütün məsələləri kifayət qədər obyektiv, dövlətçilik baxımından işıqlandırır. Bir həqqətdir ki, mətbuat öz ömrünü işi, hadisələrə baxışı, təhlili araşdırmaları, ən başlıcası isə oxucunun istəyinə uyğun yolu düzgün seçməklə yaşada bilir. Bu baxımdan “Səs” qəzetinin uzunömürlü olacağına şübhə yoxdur. Oxucu rəyi belədir ki, Azərbaycanın bütün bölgələrində “Səs”in sədasına ehtiyac var.

Xuraman İsmayılqızı

İki sahil.- 2018.- 11 yanvar.- S.11.