Şəhidlər ölməz, Vətən bölünməz!

20 Yanvarın ən yeni tariximizə qara hərflərlə yazılan qəhrəmanlıq səhifəsi olduğunu yaşından asılı olmayaraq hər kəs dərk edir

Hər il bu tarix təkcə Azərbaycanda deyil, dünyanın bir çox ölkələrində yaşayan soydaşlarımız tərəfindən milli hüzn kimi qeyd olunur, şəhidlərimizin xatirəsi ehtiramla anılır. Amma bir həqiqəti unutmamalıyıq ki, 20 Yanvar Azərbaycan xalqının tarixində, sadəcə, ağrı və acı ilə xatırlanacaq gün deyil. 20 Yanvar xalqımızın həm də şərəf günüdür. Unutmamalıyıq ki, həmin gün küçələri boyamış şəhid qanları bir anlamda milli məfkurəmizin oyanan günəşinin qırmızı şəfəqini simvolizə edirdi. Məhz həmin hadisələr bilavasitə nümayiş etdirdi ki, Azərbaycan xalqı azadlıq mübarizəsinə qalxmaq, pozulmuş hüquqlarının, suverenliyinin bərpa olunması uğrunda savaşmaq əzminə sahibdir.

...28 il bundan əvvəl sovet imperiyası keçmiş SSRİ-nin rəzil rəhbəri Qorbaçovun, onun komandasında təmsil olunan Yazovun, Bakatinin birgə hazırladıqları planlar əsasında Bakıda qanlı qırğınlar törətdi. İmperiya qaniçənləri insanların azadlıq, istiqlaliyyət, müstəqillik səslərini güllələrin dili ilə susdurmağa çalışdılar. Amma unutdular ki, zalımın zülmü olsa da, haqqın da bükülməz qolu, dönməz üzü vardır. Canlı sipər çəkməklə tankların qarşısını kəsən, düşmənə meydan oxuyan oğullarımız ölümləri ilə imperiyanın gücsüzlüyünü göstərdilər.

Bu qanlı qırğına qarşı ilk etirazını bildirən, o zaman Moskvada yaşayan xalqımızın müdrik oğlu, Vətənini, xalqını canından artıq sevən Heydər Əliyev təhdid və təzyiqlərdən çəkinməyərək Azərbaycanın Moskvadakı səfirliyinə gedərək 20 Yanvar qırğınlarını ölkəmizin suverenliyinə qarşı törədilmiş zorakılıq, təcavüzkarlıq adlandırdı. Ulu Öndər faciə ilə bağlı Azərbaycan xalqına teleqram göndərərək insanları belə ağır məqamlarda birliyə, həmrəyliyə çağırdı. Şəhidlərimizin tökülən qanlarına bais olanların mütləq cəzalandırılacağını bildirdi. Belə ağır günlərdə xalqı ilə bir olduğunu bildirən Ulu Öndərin müraciətini gizlədən nakəslər günahsız insanları qırğına verdikləri üçün vicdan əzabı çəkmədilər. 19 yanvarda Azərbaycan televiziyasının enerji blokunu dağıtmaqla əsl həqiqətləri xalqdan, dünya ictimaiyyətindən gizlədənlər vəhşiliklərini ört-basdır etmək üçün haqqını tələb edən vətənpərvərlərə ekstremist adı verməkdən belə çəkinmədilər.

Amma imperiyanı, dağılmaqda olan Sovet İttifaqını qoruyub saxlamaq istəyən, sələfləri Pyotrun “parçala, hökm et” vəsiyyətinə sadiq qalanlar üçün SSRİ-nin “qardaşlıq ailəsi”ndə zorla saxlanılan xalqların azadlıq, müstəqillik çağırışları kabus kimi qorxulu idi. Xüsusilə təbii sərvətləri ilə zəngin olan Azərbaycanı itirmək imperiyanın şah damarının kəsilməsi idi. Buna görə də nəyin bahasına olursa olsun Bakıdan yüksələn azadlıq səslərini susdurmaq əmri verilmişdi.

28 il bundan əvvəl törədilən qırğınlar məhz bu məqsədlə həyata keçirilsə də, Azərbaycan xalqını güllələrin səsi ilə inamından dönməyə cəhd edən, diz çökdürməyə çalışanlar niyyətlərinə çata bilmədilər. Unutdular ki, üstünə tanklar yeritdikləri bu qəhrəman vətən övladları heç vaxt düşmənə arxa çevirməmiş, sıralarını, səflərini pozmamışlar. 20 Yanvar qırğınlarında Vətən yolunda qurban gedən şəhidlərimiz ölümləri ilə cəlladlarına qəhrəmanlıq dərsi öyrətdilər. Əbədiyyətə qovuşmaqla ölməzliyin zirvəsinə qalxaraq Azərbaycan xalqının qəhrəmanlıq tarixinə yeni səhifələr yazdılar. Bu gün həmin tarixi anları bütünlükdə Azərbaycan xalqı üçün müqəddəs olan Şəhidlər xiyabanında sıralanan məzar daşları yaşadır. Bakının ən yüksək, müqəddəs məkanında uyuyan qəhrəmanlarımız daşlaşmış şəkillərinin dili ilə onları ziyarət edən soydaşlarımıza, qonaqlara “biz varıq, olacağıq, həmişə qalacağıq” deyirlər.

Qədirbilən Azərbaycan xalqı Vətəni, azadlıq uğrunda qurban gedən şəhidlərimizi unutmur. Çünki bu xalqın insanlara dəyər verən, onların xatirəsini həmişə əziz tutan Heydər Əliyev kimi ümummilli lideri var idi. Günahsız şəhidlərimizin tökülən qanları üçün cavabdeh olanların ədalət, qanun arşısında cavab vermələrini, hadisələrə hüquqi, siyasi qiymət verilməsini tələb edən də ümummilli lider Heydər Əliyev idi. Şəhid ailələrinə ilk təsəlli verən də, onlar üçün imtiyazların verilməsini rəsmiləşdirən, Milli Qəhrəman adına layiq görən də Azərbaycanın müstəqilliyini tarixi nailiyyət adlandıran, suverenliyimizin əbədiliyini qoruyan da Ulu Öndər oldu. Dahi liderin ənənəsini davam etdirən, bu müqəddəs məkanı daim ziyarət edən Prezident İlham Əliyevin şəhid ailələrinə göstərdiyi diqqət və qayğıya davamlı olaraq yeni imtiyazlar əlavə olunur.

Artıq 20 Yanvar faciəsinin törədilməsindən 28 il ötür. İllər keçsə də ölümsüzlüyə qovuşmaqla xalqımızın təfəkkürünə əbədi mübarizlik, xoşbəxt gələcək naminə mübarizədə qətiyyətli olmağı öyrədən şəhidlər istək və arzuları ilə həmişə sıralarımızdadırlar. Azərbaycanın qazandığı bütün uğurlarda onların da payı var. Beynəlxalq aləmdə yüksək nüfuz qazanan Azərbaycanın sivilizasiyalararası dialoq məkanı kimi tanınması, tədbirlərdə iştirak edən qonaqların ilk olaraq şəhidlərimizin uyuduğu müqəddəs məkanı ziyarət etmələri, onların ruhları qarşısında baş əymələri də qanları ilə qəhrəmanlıq dastanları yazanların əbədiyaşarlığının nümunəsidir. Şəhidlər ölməz, Vətən bölünməz! Tanrı bütün şəhidlərimizə rəhmət eləsin! Amin!

Mənsumə Babayeva

İki sahil.- 2018.- 11 yanvar.- S.14.