ÜST Azərbaycanda görülmüş işlərə yüksək qiymət verir

Ötən həftə Azərbaycan Prezidenti, Türkdilli Dövlətlərin Əməkdaşlıq Şurasının sədri İlham Əliyevin təşəbbüsü ilə keçirilən Türk Şurasının videokonfrans vasitəsilə fövqəladə Zirvə görüşü türk xalqları arasında əməkdaşlığın bir daha dostluq və qardaşlıq təməlləri əsasında qurulduğunu təsdiqlədi. Türk Şurasının COVID-19 pandemiyasına həsr olunmuş fövqəladə Zirvə görüşünə türkdilli dövlət başçıları ilə yanaşı, Ümumdünya Səhiyyə Təşkilatının (ÜST) baş direktoru Tedros Adhanom Qebreyesus da qatılmışdı.

Zirvə görüşündə də dönə-dönə vurğulandığı kimi, Türkdilli Dövlətlərin Əməkdaşlıq Şurasına sədrliyi dövründə Azərbaycan üzv ölkələr arasında əməkdaşlıq əlaqələrinin möhkəmləndirilməsi istiqamətində xeyli səylər və təşəbbüslər göstərmişdir. Belə ki, pandemiyanın mənfi təsirlərinə baxmayaraq, Azərbaycan Türkiyə və Mərkəzi Asiya arasında etibarlı tranzit-logistika mərkəzi kimi öz roluna məsuliyyətlə yanaşaraq, tranzit yüklərin daşınması üçün əlavə tədbirlər görüb həyata keçirmişdir. 2020-ci ilin ilk üç ayı ərzində türkdilli ölkələrdən 180 min tondan artıq yük Azərbaycan vasitəsilə daşınıb ki, bu da ötən ilin eyni dövrü ilə müqayisədə 40 min ton çoxdur.

Azərbaycanda iqtisadi sabitliyi təmin etmək, məşğulluqla bağlı problemləri həll etmək və həm də makroiqtisadi və maliyyə vəziyyətimizi sabit saxlamaq üçün 2,5 milyard manat və ya təqribən 1,5 milyard dollar vəsait ayrılmışdır. Həmçinin Azərbaycan koronavirus xəstəliyinin yayılmasının qarşısının alınması üçün çevik və zəruri qabaqlayıcı addımlar atıb. Nazirlər Kabineti yanında Operativ Qərargah yaradılıb, mart ayının 3-dən etibarən ölkə üzrə bütün təhsil müəssisələrində tədris prosesi mərhələli şəkildə aprelin 20-dək dayandırılıb, ölkə ərazisində keçirilməli olan bütün kütləvi tədbirlər təxirə salınıb və ya ləğv edilib. Martın 14-dən etibarən bir sıra sosial təcrid tədbirlərini əhatə edən xüsusi rejim, martın 24-dən isə xüsusi karantin rejimi tətbiq edilib.

Azərbaycan Respublikasının Prezidenti İlham Əliyevin təşəbbüsü ilə ölkədə Koronavirusla Mübarizəyə Dəstək Fondu təsis edilmişdir. Hazırda bu fonda köçürülmüş ianələrin həcmi 110 milyon manatdan və ya 65 milyon dollardan artıqdır. Dövlət vəsaiti ilə bərabər, ayrı-ayrı şəxslərin, sahibkarların və təşkilatların fonda könüllü ianəsi həm də böyük rəmzi məna daşıyır. Ölkə rəhbərinin qeyd etdiyi kimi, bu, Azərbaycan cəmiyyətində olan həmrəyliyin nümunəsidir. İlk günlərdən başlayaraq Azərbaycan qlobal həmrəylik nümayiş etdirərək koronavirusa qarşı mübarizədə Ümumdünya Səhiyyə Təşkilatına 5 milyon dollar könüllü maliyyə yardımı etmişdir.

Türk Şurasının fövqəladə Zirvə görüşündə çıxış edən Ümumdünya Səhiyyə Təşkilatının Baş direktoru Tedros Adhanom Qebreyesus Azərbaycan hökumətinə və xalqına verdikləri töhfəyə görə təşəkkür etmişdir. Pandemiyaya son qoymaq üçün əməkdaşlığı və qarşılıqlı fəaliyyəti genişləndirməyin vacibliyini bildirən UST-ün Baş direktoru demişdir: “Son 100 gündə COVID-19 göstərdi ki, hətta inkişaf etmiş, zəngin dövlətlər də zərər çəkiblər. Əlbəttə, görürük ki, əsas zərbə həssas ölkələrə dəyir. Belə olmaması üçün biz nə mümkündürsə edirik”.

ÜST-ün baş direktoru tərəfindən hələ ötən ay Azərbaycan Prezidentinə ünvanlanan məktubda virusla mübarizədə görülən işlər nümunəvi hesab olunub. Ümumdünya Səhiyyə Təşkilatının koronavirusla mübarizə sahəsində Azərbaycanda görülmüş işlərə yüksək qiymət verməsi bu sahədə görülən uğurlu işlərin nəticəsidir. Azərbaycan pandemiya dövründəki fəaliyyəti, həmçinin ÜST ilə əməkdaşlığı başqa dövlətlərə örnəkdir. Ölkə rəhbərliyinin təşəbbüsü ilə ÜST-ün nümayəndələri hələ martın əvvəllərində Bakıya dəvət olunmuşdular. Hələ o zaman koronavirusa qarşı birgə mübarizə məsələləri müzakirə edilmişdi. Ölkəmizə səfər edən ÜST-ün ekspert missiyasının hazırladığı hesabatda əksini tapmış tövsiyələr hal-hazırda aidiyyəti dövlət qurumları tərəfindən nəzərə alınır.

Nurəddin Ədiloğlu

İki sahil.- 2020.- 16 aprel.- S.11