İtaliyanın daha üç bələdiyyə şurası Azərbaycana dəstək ifadə edib

İtaliyanın Avellino əyalətinin Montoro bələdiyyə şurası, Kataniya əyalətinin Qravina bələdiyyə şurası və İserniya əyalətinin Rokkasikura bələdiyyə şurası Ermənistanın Azərbaycana qarşı hərbi təcavüzü, etnik təmizləmə, soyqırımı siyasətini pisləyən və Azərbaycan xalqı ilə, xüsusilə də Ermənistanın hərbi təcavüzü nəticəsində həyatını itirən və yaralanan Gəncə, Bərdə və digər rayonların sakinlərinin ailə üzvləri ilə həmrəylik nümayiş etdirən sənədlər qəbul ediblər.

AZƏRTAC xəbər verir ki, sənədlərdə Dağlıq Qarabağ münaqişəsinin Ermənistanın Azərbaycana qarşı təcavüz siyasəti və ərazi iddialarından irəli gəldiyi, bu təcavüz və etnik təmizləmə siyasəti nəticəsində Dağlıq Qarabağ və ətraf yeddi rayon da daxil olmaqla, Azərbaycan ərazisinin 20 faizinin işğal olunduğu, Avropa İnsan Hüquqları Məhkəməsinin 2015-ci il tarixli “Çıraqov və digərləri Ermənistana qarşı işi” ilə bağlı qərarında da Azərbaycanın Dağlıq Qarabağ bölgəsinin və ətraf rayonlarının Ermənistan tərəfindən işğal edildiyinin təsdiqləndiyi, həmin ərazilərdə yaşayan 1 milyondan çox azərbaycanlının qaçqın və məcburi köçkün vəziyyətinə düşdüyü, azərbaycanlılara qarşı çoxsaylı müharibə cinayətləri, o cümlədən Xocalı soyqırımının törədildiyi bildirilib.

Sənədlərdə 30 ilə yaxın müddətdir ki, Azərbaycanın danışıqların uğurla nəticələnməsinə və ATƏT-in Minsk qrupunun vasitəçiliyi ilə diplomatik yollarla regiona sülh gətirməyə yönəlik səylərinə baxmayaraq, Ermənistanın bəyanatları, təxribat xarakterli hərəkətləri və destruktiv siyasəti nəticəsində Dağlıq Qarabağ münaqişəsinin həlli istiqamətində danışıqların bloklandığı, Azərbaycan xalqının böyük ədalətsizliklə üzləşdiyi və 1 milyondan çox azərbaycanlı qaçqın və məcburi köçkünün öz yurd-yuvalarına qayıtmaqdan məhrum olduqları, ailə üzvlərinin məzarlarını belə ziyarət edə bilmədikləri vurğulanıb.

Sənədlərdə son aylarda Ermənistanın məqsədyönlü şəkildə silah və hərbi texnika idxalını əhəmiyyətli dərəcədə artırdığı, yeni müharibəyə hazırlaşmaq üçün hava hücumu sistemini intensiv şəkildə genişləndirdiyi və nəticədə 27 sentyabr tarixindən etibarən Azərbaycana qarşı yeni hərbi təcavüzə başladığı, qəsdən mülki obyektləri və mülki şəxsləri hədəfə aldığı diqqətə çatdırılaraq 94-dən çox mülki şəxsin ölməsi, 407-dən çox insanın yaralanması ilə nəticələnən Gəncə, Bərdə və sair şəhərlərin bombalaması qəti şəkildə pislənilib.

Sənədlərdə münaqişə ilə bağlı BMT TŞ və Baş Assambleyasının qətnamələrinin Azərbaycanın suverenliyi, ərazi bütövlüyü və beynəlxalq səviyyədə tanınmış sərhədlərinə dəstək verərək Dağlıq Qarabağı Azərbaycanın ayrılmaz tərkib hissəsi kimi tanıdığı, Ermənistan silahlı qüvvələrinin işğal olunmuş həmin ərazilərdən dərhal çıxarılmasının, azərbaycanlı qaçqın və məcburi köçkünün öz yurd-yuvalarına qayıtmaq hüququnun təmin edilməli olduğu, 10 noyabr tarixində Azərbaycan Prezidenti, Ermənistanın baş naziri və Rusiya Prezidentinin imzaladıqları Bəyanatın məhz münaqişəyə son qoymaq məqsədi daşıdığı vurğulanıb.

Sənədlərdə Azərbaycan Prezidenti İlham Əliyevin cari ilin fevral ayında İtaliyaya dövlət səfəri çərçivəsində imzalanmış “İtaliya Respublikası ilə Azərbaycan Respublikası arasında Çoxölçülü Strateji Tərəfdaşlığın gücləndirilməsinə dair Birgə Bəyannamə”yə istinad edilərək rəsmi İtaliyanın davamlı olaraq Azərbaycanın ərazi bütövlüyünü dəstəklədiyi diqqətə çatdırılıb.

Qeyd edək ki, bundan öncə oxşar sənədlər İtaliyanın Kataniya şəhər Şurası, Neapol şəhərinin Ottaviano və Liveri bələdiyyələri, Kaserta əyalətinin Santa Maria a Viko, Draqoni, Qalluççio və Presenzano bələdiyyələri və Kampobasso əyalətinin Sepino və San Culiano del Sannio bələdiyyələri, İtaliyanın Milan şəhərinin Korbetta Bələdiyyə Şurası tərəfindən də qəbul edilib. Habelə İtaliya Deputatlar Palatasının xarici əlaqələr komissiyası Azərbaycan Prezidenti, Ermənistanın baş naziri və Rusiya Prezidenti tərəfindən imzalanmış Bəyanatın müddəalarının yerinə yetirilməsinə çağıran qətnamə qəbul edib.

İki sahil.- 2020.- 16 dekabr.- S.19.