Azərbaycan hərbi sahədə lider olduğunu dünyaya nümayiş etdirdi

Qüdrətli respublikamızın təcrübəsi və müstəqilliyin ilk illərində yaşanan tarixin acı dərsləri göstərdi ki, güclü milli ordu ölkəmizin təhlükəsizliyinin, müstəqilliyinin və ərazi bütövlüyünün qarantıdır. 1993-cü ilin sonlarından başlayaraq ölkəmizdə ordu quruculuğu dövlətin prioritet vəzifələrindən birinə çevrildi. Müasir hərb nəzəriyyəsinin və praktikasının tələblərinə cavab verən güclü Azərbaycan Silahlı Qüvvələri quruldu, zamanla sistemli, davamlı və dinamik şəkildə inkişaf etdirildi. Ən müasir texnikanı idarə etməyi bacaran peşəkar hərbçi kadrlar yetişdirildi. Azərbaycan Ordusunun nəzəri biliklərə sahib zabit-əsgər heyətinin formalaşmasında qardaş Türkiyənin hərb sahəsindəki təhsilinin, təcrübəsinin rolunu xüsusi qeyd etmək yerinə düşər. Azərbaycan Ordusu 1994-cü ildən NATO ilə Sülh Naminə Tərəfdaşlıq Proqramı çərçivəsində əməkdaşlığa başladı. Azərbaycan Sülhməramlı Qüvvələri Kosovoda, Əfqanıstanda və İraqda beynəlxalq əməliyyatlarda iştirak etdi.

Azərbaycan Prezidenti, Ali Baş Komandan İlham Əliyevin rəhbərliyi ilə dövlətimizin inkişaf strategiyası böyük iqtisadi layihələrə, beynəlxalq və regional platformalara hədəfləndi. Azərbaycanın iqtisadi qüdrətinə paralel şəkildə diplomatik müstəvidə də uğurlarımız artdı. Bütün bunlar hərbi sahədə əməkdaşlığa, ordunun ən müasir, innovativ texnika ilə təmin olunmasına zəmin yaratdı. Azərbaycan Prezidenti, Ali Baş Komandan İlham Əliyevin qeyd etdiyi kimi, hərbi xərclərimiz büdcə xərcləri arasında ön plana keçdi. Təsadüfi deyil ki, 2003-cü ildə Azərbaycanın hərbi büdcəsi 115 milyon manat olduğu halda, 2010-cu ildə artıq 2,2 milyard manat idi.

30 illik münaqişə, 26 illik atəşkəs xalqın qəlbindəki Vətən həsrətini səngidə bilmədi. Azərbaycan Ordusu Aprel və Tovuz döyüşlərində, Günnüt əməliyyatında işğalçılıq siyasətinidən əl çəkməyib yeni ərazilər işğal etmək istəyən azğın düşmənin təxribatlarının qarşısını aldı. Əsgərlərimiz yüksək vətənpərvərlik nümayiş etdirdi, mübarizəmizin yeni səhifələrini tarixləşdirdi. Bu döyüş salnamələri Ermənistana, beynəlxalq təşkilatlara, o cümlədən ATƏT-in Minsk qrupuna göstərdi ki, Azərbaycan xalqı torpaqlarının işğal faktı ilə barışmayacaq.

Düşmən Azərbaycan Ordusundan aldığı zərbələrdən lazımi nəticələr çıxarmadı, hərbi təxribatlarına son qoymadı. Ermənistanın sentyabrın 27-də növbəti hücumu işğalçı ölkənin hərbi və siyasi rəhbərliyinin beynəlxalq hüquq normalarına məhəl qoymamasının növbəti təzahürü, işğalçılıq siyasətinin yeni ifadəsi idi. Belə bir vaxtda düşmənin hücumuna cavab olaraq, dövlətimizin BMT-nin Nizamnaməsinə uyğun özünümüdafiə hüququndan istifadə etməsi və əks-hücum əməliyyatına başlaması zərurəti yarandı. Sosial, siyasi statusundan asılı olmayaraq, hər kəs-bütün xalq Prezidentimizin, Ali Baş Komandanın ətrafında birləşdi. Ali Baş Komandanımızın söylədiyi kimi, məhz birlik, əzm, iradə – güc böyük Qələbəmizi reallaşdırdı. Silahlı Qüvvələrin Ali Baş Komandanı İlham Əliyevin rəhbərliyi ilə Azərbaycan Ordusunun əsgər və zabitləri 44 gün davam edən müharibədə hərb tariximizin yeni şanlı səhifələrini yazdılar. Beynəlxalq təşkilatların 30 il ərzində edə bilmədiklərini qüdrətli, müzəffər Azərbaycan Ordusu qısa müddətdə gerçəkləşdirdi. Müzəffər ordumuz ölkəmizin ərazi bütövlüyünü bərpa edərək regionun ən güclü ordusu olduğunu sübut etdi. Azərbaycan Ordusu göstərdi ki, qoşun növləri potensial rəqiblə effektiv mübarizə aparmaq iqtidarındadır. Müzəffər ordumuz sübut etdi ki, dünya güclərinin regiondakı reallıqlarla hesablaşacağı, təkcə iqtisadi cəhətdən deyil, həm də hərbi-siyasi yöndən güclü Azərbaycan var.

Azərbaycan 44 günlük müharibə dövründə Ermənistana elə bir sarsıdıcı zərbə vurub ki, artıq işğalçı dövlətin mövcudluğu sual altındadır. Belə ki, Ermənistanın hərbi məğlubiyyəti onun iqtisadi çöküşü ilə nəticələnib. Hazıra işğalçı dövlətin iqtisadiyyatı tənəzzülə uğramaqla yanaşı, xarici borclarının həcminin də artması müşahidə olunur. Öz iqtisadiyyatının böyük hissəsini Dağlıq Qarabağ hesabına formalaşdıran Ermənistan artıq bu imkanlardan məhrum edilib. Heç şübhəsiz ki, Ermənistanın ağır iqtisadi vəziyyəti sosial və siyasi müstəvidə də özünü büruzə verir. Məhz bu səbəbdən ölkəni etiraz aksiyalar bürüyüb, Ermənistanı tərk edənlərin sayı yüzminlərlə ölçülür. Ermənistan dövlət kimi məhv olmaq yolunu özü seçib, bu ölkənin inkişaf perspektivləri Azərbaycandan asılı olduğu halda düşmənçilik mövqeyi sərgiləyib. Azərbaycana əsassız olaraq torpaq iddiası irəli sürən, üstəlik torpaqlarımızı illərlə işğal altında saxlayan Ermənistan nəticə etibarilə bütün regional və beynəlxalq layihələrdən kənarda qalıb. Bununla kifayətlənməyərək ölkəmizə qarşı yeni ərazi iddiasını nümayiş etdirərək hərbi təxribata əl atan Ermənistan bununla da öz sonunu gətirdi. Ermənistan silahlı qüvvələrinin hücumlarını dəf edən rəşadətli Azərbaycanın Ordusu işğalçı ölkəni diz çökdürdü.

Bu zəfər Aprel, Günnüt, Tovuz zəfərlərinin məntiqi davamı, Silahlı Qüvvələrimizin inkişafı ilə bağlı son illərdə həyata keçirilən hərbi siyasətin döyüş meydanında təcəssümü idi. Bu qələbə xalqımızın əzmini, qəhrəmanlığını, vətənsevərliyini bir daha bütün dünyaya nümayiş etdirdi. PUA-sız, topsuz, mərmisiz Azərbaycan əsgərlərinin igidliyi, mərdliyi ilə Şuşanın azadlığı əməliyyatı Qarabağ müharibəsi tarixinin şərəfli bir səhifəsinə çevrildi. Tanksız, topsuz, artilleriyasız, pilotsuz kamikadzelərin müşayiəti olmadan 1500-1800 metr yüksəklikdə döyüşlər apararaq bu qala şəhərini işğalçılardan təmizləmək Azərbaycan əsgərlərinin cəsarəti, gücü, qüdrəti hesabına gerçəkləşdi.

Hərbi ekspertlərin də fikirlərinə görə, heç şübhəsiz ki, Azərbaycan Ordusunun yüksək peşəkarlıqla reallaşdırdığı işğaldan azadetmə əməliyyatı dünya hərbində müharibələrin aparılması doktrinasında ciddi dəyişikliklərə səbəb olacaq. İkinci Qarabağ müharibəsinin qalibiyyət səbəbləri, zəfərimizin ən real şərhini müdrik dövlət başçımız, Müzəffər Ali Baş Komadanımız ifadə edib: “Biz qələbə əldə etmək üçün bu illər ərzində məqsədyönlü şəkildə güc topladıq. Qələbəmizi şərtləndirən əsas amillər iqtisadi müstəqillik, güclü müasir ordu, milli həmrəylik və beynəlxalq səviyyədəki uğurlarımızdır”.

Nigar Orucova

İki sahil.- 2020.- 4 dekabr.- S.15.