Azərbaycan Ordusu öz tarixi missiyasını şərəflə yerinə yetirdi

İkisahil.TV-nin bugünkü müsahibi Milli Məclisin deputatı Vüqar İskəndərovdur

-Bu gün Azərbaycan cəmiyyəti Qələbə sevincini yaşayır. Bildiyimiz kimi, dekabrın 10-da Bakıda Zəfər paradı keçirildi. Bu möhtəşəm tədbir cəmiyyətimizdə böyük ruh yüksəkliyi ilə qarşılanıb. Zəfər paradının əhəmiyyətini necə dəyərləndirirsiniz?

-Sentyabrın 27-də işğalçı Ermənistanın ölkəmizə qarşı həyata keçirdiyi növbəti hərbi təxribat düşmən ölkənin acınacaqlı və biabırçı məğlubiyyəti ilə başa çatdı. Belə ki, bu təxribata cavab olaraq Ali Baş Komandan İlham Əliyevin rəhbərliyi ilə Azərbaycan Ordusunun apardığı 44 günlük Vətən müharibəsi Ermənistan ordusunun darmadağın olması və işğalçı ölkə üçün kapitulyasiya aktı kimi dəyərləndirilən üçtərəfli Bəyanatın imzalanması ilə nəticələndi. Beləliklə, Azərbaycan 30 ilə yaxın davam edən münaqişəni həll etdi, özü də buna güc yolu və siyasi vasitələrlə nail oldu. Yəni, Azərbaycan öz gücü hesabına, hərbi-siyasi yolla bu problemi həll etdi və ATƏT-in Minsk qrupunun həmsədrlərinin mandatının əsasını təşkil edən BMT Təhlükəsizlik Şurasının qətnamələrini yerinə yetirdi. Bu savaş ilk gündən Azərbaycan Ordusunun qüdrətini, əsgər və zabitlərimizin yüksək döyüş ruhunu nümayiş etdirdi. Silahlı Qüvvələrimizin şəxsi heyəti Vətən müharibəsində qəhrəmancasına döyüşərək düşmənə sarsıdıcı zərbələr endirdi. İllər ərzində Ermənistanın işğal altındakı torpaqlarımızda qurduğu və möhkəmləndirdiyi, minaladığı mürəkkəb konstruksiyalı mühəndis-istehkam qurğuları və digər müdafiə sistemləri ordumuz tərəfindən ilk həmlədə yarıldı. Beləliklə, Azərbaycan Ordusu gücü və qüdrəti barədə söylənən fikirləri ilk gündən döyüş meydanında sübuta yetirdi. Birinci vitse-prezident Mehriban xanım Əliyevanın rəsmi «Instagram» səhifəsində etdiyi paylaşımda da vurğulandığı kimi, «Hər birimiz bu Zəfərin nəyin bahasına qazanıldığını yadda saxlamağa borcluyuq! Biz Vətən müharibəsi şəhidlərini heç vaxt unutmayacağıq. Onlar bizim qəlbimizdə daim yaşayacaq».

Göründüyü kimi, şəhidlərimizin qanı yerdə qalmadı, onların uğrunda savaşdıqları müqəddəs torpaqlarımız indi düşmən tapdağından azaddır. Dekabrın 10-da Bakıda, «Azadlıq» meydanında keçirilən Zəfər paradı öz haqq mübarizəsindən qalib çıxan Azərbaycanın Qələbəsinin, Türkiyə-Azərbaycan əbədi qardaşlığının bütün dünyaya nümayişi idi. Azərbaycan xalqı ilk növbədə tarixi ədalətin bərpa edilməsini bayram edərək mövcud olduğu illər ərzində qaandığı ən böyük zəfərini beynəlxalq ictimaiyyətə rəsmən elan etdi. Bu hərbi parad Azərbaycanın həm tərəfdaşları, həm də rəqibləri üçün böyük və əhəmiyyətli siyasi mesaj idi. Belə ki, hər zaman qonşuların ərazi iddiaları nəticəsində suverenliyimiz və müstəqilliyimiz təhdid altında olsa da, Azərbaycan xalqı bir yumruğa çevirilib erməni qəbskarlarının layiqli cavabını verə bildi. Prezident İlham Əliyevin də dediyi kimi, bizim dəmir yumruğumuz həm birliyimizi, həm də gücümüzü təcəssüm etdirir. Bu dəmir yumruq düşmənin belini qırdı, düşmənin başını əzdi və bu gün biz qəhrəman xalq kimi bu bayramı qeyd edirik. Azərbaycanın müzəffər Ordusu öz tarixi missiyasını şərəflə yerinə yetirdi.

-30 ilə yaxın yarıtmaz fəaliyyəti ilə gündəmdə olan ATƏT-in Minsk qrupunun həmsədrləri regiona səfər etdilər. Sizcə, Minsk qrupuna bundan sonra ehtiyac varmı?

- ATƏT-in Minsk qrupu ötən 28 il ərzində münaqişənin həllində heç bir rol oynamadı. Əslində, vasitəçilik problemi həll etməyə yönəlmiş fəaliyyətdir. Beynəlxalq hüquqda problemin həlli üçün hamı tərəfindən qəbul olunmuş konkret normalar var. Bu, ilk növbədə hər bir ölkənin tanınmış sərhədləri çərçivəsində suverenliyinin bərpası məsələsidir. İkincisi, Azərbaycanın ərazi bütövlüyünü dəstəkləyən və ermənilərin Azərbaycan torpaqlarını işğal etməsi faktının qeyd olunduğu digər başlıca sənədlər BMT Təhlükəsizlik Şurasının (TŞ) qəbul etdiyi 4 qətnamədir. Vasitəçilər isə "Siz nəyə razılaşsanız, biz onu qəbul edəcəyik" kimi neytral, yaxud laqeyd mövqe nümayiş etdirirdilər. Vasitəçilik missiyası və vəzifəsi özündə BMT TŞ-nin 4 qətnaməsinin tələblərinin yerinə yetirilməsini ehtiva etməli idi. Təəssüf ki, biz həmsədrlərin fəaliyyətində bunu görmədik. Hələ bu günədək biz bir dəfə də rast gəlmədik ki, Minsk qrupunun həmsədri olan ölkələr tələb etsinlər ki, bu problemin həlli yolu BMT TŞ-nin qəbul etdiyi qətnamələrdən keçir. Bu günə qədər hərbi təcavüzün ortada olmasına, torpaqlarımızın bir hissəsinin işğal olunmasına, 1 milyon insanın öz vətənində məcburi köçkün vəziyyətinə düşməsinə baxmayaraq, Minsk qrupu təcavüzkarın adını indiyə kimi çəkməmişdir.

Azərbaycan Prezidenti İlham Əliyev dekabrın 12-də ATƏT-in Minsk qrupunun həmsədrlərini qəbul edərkən bildirdi ki, Minsk qrupunun ideyalarla çıxış etmək və yaradıcı olmaq istiqamətində müəyyən fəaliyyəti olsa da, bunlar heç bir nəticə verməmişdir. Reallıq bundan ibarətdir. Əgər həqiqətən də onlar problemin sülh yolu ilə həllinin tərəfdarı olsaydılar o zaman bitərəf mövqe sərgiləyərdilər. Zaman göstərdi ki, onların fəaliyyəti bəzi Avropa ölkələri, təşkilatları kimi ikili standartlara söykənib. Onların səriştəsiz fəaliyyəti nəticəsində torpaqlarımız illərdir ki, işğal altında qaldı. Artıq məlum olduğu kimi, onlar, sadəcə, mövcud vəziyyəti olduğu kimi saxlamaq istəyirdilər. Bunun əksinə olaraq isə Azərbaycan dövləti hərbi-siyasi yolla öz torpaqlarını işğaldan azad etdi, Ermənistanı döyüş meydanında məğlub edərək, işğalçının məğlubiyyətini etiraf etməsinə nail olduq.

-Təəssüf hissi ilə qeyd edilməlidir ki, uzun müddət bəzi beynəlxalq təşkilatlar təcavüzkarı öz adı ilə çağırmaq, işğalla bağlı qəbul edilmiş sənədlərdə işğalçının kim olduğunu göstərmək istəmirdilər. Sizcə, tarixi ədalətin bərpa olunmasını şərtləndirən amillər hansılardır?

- Düz vurğuladınız, uzun illər işğalçının haqlı tərəf kimi tanıdılması vaxt apardı. Dövlətimizin başçısı düşünülmüş diplomatik addımları ilə bütün dünyada Azərbaycana qarşı obyektiv rəy formalaşdırmağa, beynəlxalq təşkilatlarda ədaləti, beynəlxalq hüququ tanıyan, əks etdirən qərar və qətnamələr qəbul etdirməyə müvəffəq oldu. Eyni zamanda, Azərbaycan informasiya müharibəsində də qələbə qazandı, Xocalı soyqırımı haqqında dünyaya müfəssəl məlumat verməyə müvəffəq oldu. Belə ki, «Xocalıya ədalət!» kampaniyası, 10-dan çox ölkə tərəfindən Xocalı soyqırımının tanınması demək olar ki, münaqişə ilə bağlı həqiqəti əks etdirən mənzərəni formalaşdırdı və dünya ictimaiyyətinə çatdırdı.

«Human Rights Watch»un hesabatı ermənilər üçün gözlənilməz olub. Belə ki, «Human Rights Watch» insan haqları təşkilatı dekabrın 15-də «Ermənistan Azərbaycana qarşı klastr bombalarından istifadə edib» adlı hesabat yayıb. Təşkilatın hesabatından da göründüyü kimi, Azərbaycan Ordusundan fərqli olaraq, Ermənistan hərbi birləşmələri arsenalında olan «Toçka-U» və «İskəndər» ballistik raketləri, «Smerç» və Çin istehsalı olan “WM-80” yaylım atəşi sistemlərindən istifadə etməklə, altı həftəlik müharibə dövründə Azərbaycanda əhalinin sıx yaşadığı yaşayış məntəqələrinə dəfələrlə klastr bombaları atıb. Onların mülki əhaliyə qarşı belə qəddar formada rəftarı, əlbəttə, beynəlxalq təşkilatların da gözündən yayınmadı.

Təşkilatın araşdırmaçıları bu ilin noyabrında Azərbaycana səfərləri zamanı üç rayona klastr bombaları ilə dörd hücumun gerçəkləşdirildiyini sənədləşdiriblər. Sənəddə qeyd olunub ki, bu hücumlarda ikisi uşaq olmaqla azı yeddi mülki şəxs öldürülüb, iki uşaq daxil 20 nəfər yaralanıb. «Human Rights Watch» II Qarabağ müharibəsində Azərbaycanın da dörd hücumda klastr sursatlara əl atdığını sənədləşdirdiyini, hücumlardan üçünün Xankəndiyə, birinin Hadruta endirildiyini bildirib. Ermənistandan fərqli olaraq bu silahlarla yalnız hərbi hədəflər vurulub. Bizim ordu mənfur düşmənlərimiz kimi ləyaqətsiz deyil ki, mülki insanları hədəf alsın. Biz haqq savaşında yalnız hərbi birləşmələrə, terrorçulara qarşı vuruşmuşuq və onları torpaqlarımızdan qovmuşuq.

-Göründüyü kimi, Cənubi Qafqazda siyasi oyunlar qurmaqla öz maraqlarını həyata keçirmək istəyənlərin planları dövlət başçımız tərəfindən kökündən məhv edildi…

- Prezident İlham Əliyev Azərbaycanın ərazi bütövlüyünü bərpa etməklə həm də regionda tamamilə yeni bir reallıq yaratdı. Fransanın və qərəzli mövqe nümayiş etdirən digər dairələrin mövcud münaqişədən istifadə edərək Cənubi Qafqazda siyasi oyunlar qurmaqla öz maraqlarını təmin etmək istiqamətində qurduqları planları alt-üst etdi. Bu baxımdan da yaranmış yeni reallıqlar fonunda Fransa da mövcud vəziyyətlə barışmalı, Ermənistanı da bu reallıqlarla barışmağa çağırmalıdır. Fransa Cənubi Qafqazın inteqrasiyasına və xalqların ümumi rifahına töhfə verməyə yönələn addımlar atmalıdır. Görünür ki, nizamlama prosesindən kənarda qalan Fransa Rusiya və Türkiyənin münaqişənin həlli ilə bağlı atdıqları nəticəyönümlü addımları həzm edə bilmir. Hesab edirəm ki, zaman keçdikcə buna da alışacaqlar.

Şəmsiyyə Əliqızı

İki sahil.- 2020.- 17 dekabr.- S.9.