Bakı Ali Neft Məktəbinin məzunu ABŞ-ın 3 nüfuzlu universitetinin doktoranturasına

Bakı Ali Neft Məktəbinin (BANM) məzunu Məhəmməd Vəliyev ABŞ-ın 3 nüfuzlu universitetində oxumaq şansı qazanıb. Ali məktəbin magistratura pilləsində neft-qaz mühəndisliyi ixtisasının builki məzunlarından biri olan M.Vəliyev Cənubi Kaliforniya, Ostindəki Texas və Texas A&M universitetlərinin doktorantura pillələrinə tam təqaüdlə qəbul olub. Bakalavr təhsilini də fərqlənmə diplomu ilə bitirmiş BANM-in məzunu təhsilini Cənubi Kaliforniya Universitetində davam etdirməyi qərara alıb. AZƏRTAC Məhəmməd Vəliyev ilə müsahibəni təqdim edir.

-Qazandığınız uğura görə sizi təbrik edirik. Gəlin, sizi tanıyaq.

-1996-cı ildə Bakıda anadan olmuşam. İbtidai təhsilimi 2002-2006-cı illərdə Bakı şəhəri Yasamal rayonu 286 nömrəli tam orta məktəbdə almışam. 2006-2013-cü illərdə Nəsimi rayonu Texniki-Humanitar liseyində oxumuşam. 2013-cü ildə qəbul imtahanında 662 bal toplayaraq Bakı Ali Neft Məktəbinin neft-qaz mühəndisliyi ixtisasına qəbul oldum. Təhsil aldığım müddətdə universitetdə Neftçi mühəndislər, İntellektual oyunlar, Şahmat və Futbol klublarına üzv olub və bu klubların təşkil etdiyi bir çox tədbirlərdə fəal iştirak etmişəm. 2015, 2016, 2017-ci illərdə SOCAR, 2016-cı ildə Schlumberger, 2017-ci ildə isə BP şirkətinin təşkil etdiyi yay təcrübə proqramlarında iştirak etmişəm. Bundan əlavə, 2016-cı ildə sonradan ABŞ-da doktorantura pilləsinə qəbul olmağıma töhfə verən Neftçi Mühəndislər Cəmiyyətinin nəzdindəki Gənc İstedadlar Qrupuna qəbul olundum, burada 2 il ərzində neft sənayesində çalışan və könüllü olaraq tələbələrə dəstək olan mühəndislərdən dərs aldım. 2018-ci ildə bakalavr təhsilimi fərqlənmə diplomu ilə bitirərək, magistratura pilləsi üzrə Bakı Ali Neft Məktəbində neft-qaz mühəndisliyi ixtisası üzrə davam etdirdim. 2019-cu ilin yay aylarında BP şirkətində təcrübə keçdim. Bu il isə ABŞ-ın Cənubi Kaliforniya Universitetinin doktorantura pilləsinə 4 illik tam təqaüdlə qəbul olmuşam.

-Bu uğurunuza necə nail oldunuz?

-Bu, çox uzun proses idi. Zənnimcə, keyfiyyətli bakalavr və magistr təhsili, yerli və beynəlxalq şirkətlərdə qazandığım təcrübələr, iştirak etdiyim bir çox akademik və qeyri-akademik seminar və tədbirlər, təhsil aldığım universitetin rəqabətli və səmimi mühiti, hər zaman qərarlarıma hörmət edən və dəstək olan ailə üzvlərim, çalışqan, öyrənməyə açıq və ambisiyalı xarakterim və məqsədyönlü yanaşmam məni uğura apardı.

-Bakı Ali Neft Məktəbindəki təhsil gözləntilərinizi qarşılaya bildimi və məqsədlərinizə çata bildinizmi?

-XI sinifdə oxuyarkən təhsil alacağım universitetdən gözləntilərim bunlar idi: beynəlxalq standartlara cavab verən, ingilis dilində təhsil müəssisəsi olması, rəqabətli, intellektual və səmimi mühitin mövcudluğu, universiteti bitirdikdən sonra yalnız ölkə səviyyəsində deyil, beynəlxalq səviyyədə də rəqabətli ola biləcəyim bilik və bacarıqlara sahib olan şəxsiyyət kimi formalaşmaq və xarici ölkələrin də əmək bazarlarına rahatlıqla inteqrasiya edə bilmək. Beş il bakalavriat və iki il magistratura pilləsi üzrə təhsil aldıqdan sonra əminliklə deyə bilərəm ki, doğru seçim etmişəm və BANM mənim gözləntilərimi tam qarşılayan ali təhsil ocağı olub.

-BANM-də aldığınız təhsilin sizin Cənubi Kaliforniya Universitetinə qəbul olunmağınızda hansı rolu olub?

-BANM-də hazırlıq ilində (Foundation mərhələsi) öncə ingilis dili və kompüter biliklərinə yiyələnmişəm. Ali məktəbin Heriot-Vatt universiteti ilə əməkdaşlığı çərçivəsində bakalavriat (4 il) və magistratura (2 il) illərində neft-qaz mühəndisliyi üzrə çox keyfiyyətli təhsil almışam. Bundan əlavə, universitetin səmimi və intellektual mühiti, sosial bacarıqları inkişaf etdirən imkanları, universitetdə fəaliyyət göstərən klub və cəmiyyətlər də şəxsi inkişafımda ciddi rol oynayıb. Nəticədə BANM-dəki təhsil özünəinamı inkişaf etdirib və məni xaricdəki universitetlərə qədər aparıb.

-Doktorantura təhsili üçün niyə məhz Cənubi Kaliforniya Universitetini seçdiniz?

-Bakalavriat təhsilimin sonuncu ilində “Data Science” barədə eşitməyə başladım. Bir az araşdırdıqdan sonra maraqlarıma uyğunluğunu, eləcə də bu sahənin perspektivlərini nəzərə alaraq, bütün resurslardan istifadə etməyə başladım və gələcəkdə imkan olduğu halda bu sahəyə yönəlməyi qərara aldım. Bu il ABŞ-ın neft-qaz mühəndisliyi üzrə ən nüfuzlu universitetlərinə qəbul olsam da, Cənubi Kaliforniya Universiteti üzərində dayandım. Əsas səbəb “Data Science” sahəsinə olan marağımdır. Həmçinin universitetin Kaliforniyada yerləşməsi, kompüter elmləri üzrə ixtisaslaşmış və nüfuzlu olması, eləcə də çalışacağım professorun da mənimlə ortaq maraqları seçimimə ciddi təsir göstərdi.

-Doktorantura təhsilindən (PhD) sonra planlarınız nədir?

-Yaşadığımız dövr çox dinamik olduğundan, eləcə də son illərdə maraq dairəm sürətlə dəyişdiyindən formalaşmış konkret planım yoxdur. Hazırkı düşüncələrimə görə, böyük texnologiya şirkətlərində elmi fəaliyyətlə məşğul olmaq maraqlı gəlir. ABŞ-da bir qədər təcrübə qazandıqdan sonra Azərbaycana qayıtmaq və təcrübəmi ölkəmizdə bölüşmək başlıca prioritetlərimdəndir.

Zamin Məmmədov

İki sahil.- 2020.- 1 iyul.- S.11.