Korrupsiya Vətənə və dövlətə xəyanətdir

Korrupsiyaya qarşı mübarizənin yeni dalğası: Daha kimlər cəzalandırılacaq?

Prezident İlham Əliyevin qətiyyəti sayəsində Azərbaycanda korrupsiyaya qarşı mübarizənin yeni dalğası başlayıb. Xüsusilə mayın 1-də ölkə başçısının Azərbaycan Respublikasının yeni Baş prokuroru Kamran Əliyevi videoformatda qəbul zamanı səsləndirdiyi fikirlər cəmiyyətdəki korrupsionerlərə qarşı ciddi siqnaldır. Həmin qəbulda Prezident birmənalı şəkildə bildirdi ki, indi vacib vəzifələrdən biri korrupsiyaya və rüşvətxorluğa qarşı mübarizədir:

« Hesab edirəm ki, prokurorluq orqanları bu istiqamətdə daha fəal iş aparmalıdırlar. Bu xoşagəlməz hallara qarşı Azərbaycanda çox ciddi mübarizə aparılır. Mən bu məsələ ilə bağlı dəfələrlə öz fikirlərimi bildirmişdim. Bütün dövlət məmurlarını xəbərdar etmişdim və hətta demişdim ki, əgər hansısa dövlət məmuru öz işində düzəlişlər edə bilmirsə, yaxud da ki, istəmirsə, qoy özü könüllü şəkildə dövlət işindən istefa versin. Amma əfsuslar ki, mənim sözlərim bəziləri üçün dərs olmadı və bunun nəticəsində indi Dövlət Təhlükəsizliyi Xidməti bir neçə əməliyyat keçirərək rüşvətxorları, yüksək vəzifə sahiblərini ifşa etdi və onlar artıq cinayət məsuliyyətinə cəlb edilmişlər. Ağstafa, Biləsuvar, Yevlax, Neftçala rayonlarının icra başçıları həbs edilmişdir, ictimaiyyətə bu məsələ ilə bağlı ətraflı məlumat verilmişdir və bundan sonra da ətraflı məlumat veriləcəkdir.»

Prezident İlham Əliyev çıxışlarında dəfələrlə bildirmişdir ki, mən Prezident kimi xalqın xidmətçisiyəm. Bu, eyni zamanda, nazirlərə, yerli icra orqanlarının rəhbərlərinə, hər kəsə verilmiş bir mesaj idi ki, hər kəs yalnız dövlətin və xalqın mənafeyi uğrunda çalışmalıdır. Lakin Prezident İlham Əliyevin bu çağrışlarından nəticə çıxarmayan məmurların qanuni cəzalanması prosesi başlayıb. Cənab Prezident həbs olunan dövlət məmurlarının istintaqının getdiyini və bu yoldan bir addım da geri çəkilməyəcəyini bildirərək növbəti xəbərdarlığını etmişdir: «Həbs edilmiş icra başçılarının istintaqı gedir. Ancaq bu gün nümayiş etdirilən videokadrlar onu göstərir ki, rüşvətxorluq bu adamlar üçün əsas prinsip olmuşdur. Yəni, bütün aidiyyəti qurumlar bir qayda olaraq hər ay icra başçılarına və icra hakimiyyətinin digər nümayəndələrinə rüşvət verməli olmuşlar. Əfsuslar olsun ki, belə xoşagəlməz hallar digər rayonlarda da vardır. Bu haqda məlumat var və bir daha demək istəyirəm ki, heç kim məsuliyyətdən boyun qaçıra bilməyəcək. Heç kim qanundan üstün deyil və əgər kim fikirləşir ki, onun yaxınları, tanışları, qohumları, yüksək vəzifəli dostları ona kömək edəcəklər, səhv edir. Qanun qarşısında hamı bərabərdir, Azərbaycan cəmiyyətində korrupsiya və rüşvətxorluq olmamalıdır.»

Həbs olunan icra başçılarının və digər məmurların ən böyük xəyanəti isə odur ki, onlar dünyanın, o cümlədən ölkəmizin pandemiya ilə mübarizə apardığı ağır bir dövrdə dövlətə və xalqa xəyanət yolu tutublar. Belə ki, pandemiya ilə əlaqədar bu gün Azərbaycan dövləti bütün resursları səfərbər edib, ilk növbədə, vətəndaşları, onlara həyatını, sağlamlığını qorumaq üçün əlindən gələni edir. Hətta dövlətlə bərabər, ictimai təşkilatlar, ilk növbədə, Heydər Əliyev Fondu, ayrı-ayrı sahibkarlar, imkanlı adamlar öz təşəbbüsləri ilə paytaxtda və bölgələrdə kasıb insanlara yardım ediblər. Lakin bəzi şərəfsiz məmurlar bu yardımları mənsinməyə nail olublar. Prezident İlham Əliyev haqlı olaraq deyir: « Əgər indiki şəraitdə bunlar özlərini belə aparırlarsa, bundan daha ağır vəziyyət yaranarsa, onda bunlar nə edəcəklər? Bunun bir adı var – vicdansızlıq və xəyanət. Ona görə bundan sonra bu ünsürlərə qarşı mübarizə daha ciddi aparılmalıdır...»

Dövlət başçısının belə sərt ifadələr seçməsi, əlbəttə, təsadüfi deyil. Dəfələrlə xəbərdarlıq edilməsinə, bir neçə ildir sərt mübarizə tədbirləri həyata keçirilməsinə baxmayaraq, mərkəzi və yerli icra orqanlarında yüksək vəzifə tutan xeyli sayda məmur nəinki korrupsiyadan və rüşvətxorluqdan əl çəkir, hətta dövlətin əhalinin aztəminatlı təbəqəsinin sosial müdafiəsi üçün ayırdığı vəsaitləri, yardımları belə talamaqdan çəkinmirlər. Bu isə sadəcə cinayət deyil, həm də əhali arasında narazılıqları artırmağa yönəlmiş bu xəyanətdir. Onlar dövlətin hümanist siyasətinin əksinə getməklə hakimiyyəti xalqın gözündən salmağa çalışırlar. Xüsusən indiki ağır şəraitdə - dünyanı bürüyən koronavirus pandemiyasına görə ölkədə 100 minlərlə insanın iş yerlərini, gəlirlərini itirdiyi, imkanı çatan vicdanlı insanların başqalarına yardım etdiyi bir dövrdə vəzifəli şəxsin bu cür rəzil əməllərlə məşğul olmasına başqa ad tapmaq mümkün deyil.

Əvvəldə də qeyd etdyimiz kimi, Azərbaycan dövləti ölkə başçısının rəhbərliyi ilə dünyanı bürüyən COVID-19 pandemiyasına qarşı genişmiqyaslı tədbirlər həyata keçirir. Bu istiqamətdə görülmüş işlər, qəbul edilmiş qərarlar ölkəmizin bu bəladan minimum itkilərlə çıxmasına hesablanıb. Ancaq dövlət aparatında çalışan, nəinki iqtidara, eyni zamanda, dövlətçiliyə, xalqa xəyanət edən bir sıra insanların əməlləri aparılan siyasəti zərbə altında qoymağa xidmət edir. Bunu məqsədli şəkildə etdikləri, yoxsa bu adamların loru dildə desək, zatında imkansızın, kasıbın malına tamah salacaq qədər rəzilliyin olduğu yəqin ki, araşdırmalar zamanı ortaya çıxacaq...

Buradan aydın görünür ki, belə şərəfsiz məmurların əməlləri dövlət başçısının hələ 2016-cı il referendumundan sonra bəyan etdiyi, 2018-ci il prezident seçkilərindən sonra həyata keçirilməsinə başladığı yeni islahatlar kursunu iflasa uğratmağa, əhalidə dəyişikliklərə olan inamı sarsıtmağa, köhnə və biabrçı üsullarla işləməkdə israrlı olmağa yönəlib. Hətta həbslərə baxmayaraq, mərkəzi və yerli icra orqanları rəhbərliyində olan bəzi şəxslərin öz əməllərindən əl çəkməməsi, əksinə, Prezidentin göstərişi ilə aztəminatlı təbəqəyə, işsizlərə, pandemiyadan ziyan görən insanlara ayrılan vəsaitləri, yardımları mənimsəmələri bir daha göstərir ki, cənab Prezidentin də dediyi kimi, hakimiyyətdəki bəzi köhnə fikirlilər hələ də yeniliyi qəbul etmək istəmirlər. Dövlət, millət, hətta hakimiyyət qarşısında heç bir xidməti olmayan belə ləyaqətsiz insanların hakimiyyədəki «krişaları» da artıq anlayıblar ki, onların da sonu gəlib. Heç də təsadüfi deyil ki, Prezident İlham Əliyev də çıxışlarında həbs edilən icra başçılarının əməllərinin iqtidarın nüfuzuna zərbə vurmağa yönəldiyini bildirib. Bu isə ölkə rəhbərliyinin də, necə deyərlər, «oynanan oyunun» fərqində olduğunu və qarşısını almaq üçün ən sərt addımlardan çəkinməyəcəyini göstərir. Xüsusilə Prezident yalnız yerli icra orqanlarında deyil, nazirliklərdə, mərkəzi dövlət qurumlarında da bu cür halların olduğuna dair siqnallar aldığını, həbslərin miqyasının genişlənə biləcəyi mesajını verib: «Bu məsələ ilə bağlı bizim mövqeyimiz birmənalıdır. Korrupsiyaya və korrupsionerlərə qarşı amansız mübarizə aparılacaq. Onu da bildirməliyəm ki, bu hallar təkcə yerli icra orqanlarında müşahidə edilmir, mərkəzi icra orqanlarında da belə hallar, belə siqnallar var və bu siqnallar araşdırılır. Verilən məlumata görə, bəzi mərkəzi icra orqanlarında, bəzi nazirliklərdə, - hələ bu siqnallar araşdırılır, - vəzifəyə təyin olunmaq üçün insanlardan bəzi hallarda rüşvət tələb edilir. Bu, cinayətdir, bu, bizim cəmiyyətimizin əsaslarını sarsıdan addımlardır, çirkin addımlardır… Biz bu hallara qarşı amansız mübarizə aparacağıq.»

Müşahidələr göstərir ki, ötən ilin yayından başlayaraq, hüquq-mühafizə orqanlarında həyata keçirilən kadr islahatları da məhz buna hədəflənib: Azərbacan dövlətindəki və ümumilikdə cəmiyyətdəki bütün korrupsionerləri birdəfəlik süpürüb atmaq… Təsadüfi deyil ki, dövlət başçısı ötən həftə təyin olunan yeni Baş prokurorun qarşısında əsas vəziflərdən biri kimi məhz korrupsiya və rüşvətə qarşı mübarizəni qoydu.

Yəni, artıq ölkədə həm siyasi, həm də iqtisadi müstəvidə yeni münasibətlər sisteminin formalaşdırılmasına qərar verilib. Eyni zamanda, Prezident İlham Əliyevin korrupsiyaya qarşı mübarizəsində göstərdiyi qətiyyət həm ölkə xaricində, həm də cəmiyyətimizdə birmənalı olaraq yüksək qiymətləndrilir. Xalq bu qətiyyətli işdə Prezidentə uğurlar arzulamaqla kifayətlənmir, həm də dövlət başçısına dəstək verir.

Elçin Zaman

İki sahil.- 2020.- 5 may.- S.17.