Həyat uğrunda mübarizənin önündə

“Bu gün bütün dünyada gözəgörünməz və təhlükəli bir düşmənlə - koronavirus yoluxucu xəstəliyi ilə mübarizə gedir. İnsanların əsas diqqəti dünya dövlətləri liderlərinin və hökumətlərinin gördüyü tədbirlərə yönəlib. Eyni zamanda bu sahədə hansı dövlətin, hansı hökumətin gördüyü qabaqlayıcı tədbirlər, onların nə dərəcədə səmərəli olduğu da diqqət mərkəzindədir. Dünya mətbuatı və televiziya kanalları, yerli kütləvi informasiya vasitələri COVID-19 virusu ilə ölüm-dirim mübarizəsindən, onun nəticələrindən yazır, habelə bu bəlanın doğurduğu sosial-iqtisadi fəsadların aradan qaldırılmasında hökumət və dövlət başçılarının müvafiq addımlarından bəhs edirlər. Əlbəttə, dünyanın bir parçası olan Azərbaycan da bu durumdan kənarda deyil.”

Bu fikirlləri Milli Məclisin deputatı Rəşad Mahmudov “İki sahil” qəzetinə açıqlamasında söyləyib.

R.Mahmudov bildirib ki, son həftələr ərzində ölkəmizdə də həyat əvvəlki normal axarı ilə getmir, ölümcül virus bizdən də yan keçməyib. İnsanlarımız yoluxurlar, həyatlarını itirirlər, yaşamaq uğrunda mübarizə aparırlar, sağalırlar. Nə yaxşı ki, başqa ölkələrlə müqayisədə bizim ölkədə statistika faciəli deyil: “Nəzərə alsaq ki, biz müharibə şəraitində yaşayırıq və torpaqlarımızın 20 faizindən çoxu düşmən tapdağı altındadır, onda bu mübarizənin nə qədər ağır və çətin bir proses olduğunu daha aydın dərk edərik. Bütün bunlara baxmayaraq, xüsusi qeyd etmək lazımdır ki, koronavirusla mübarizədə ölkə Prezidenti cənab İlham Əliyevin, eləcə də Birinci vitse-prezident Mehriban Əliyevanın vaxtında atdıqları ardıcıl, məqsədyönlü və qətiyyətli addımlar təqdirəlayiqdir və bunu artıq dünya mətbuatı da qeyd edir. Belə bir situasiyada Azərbaycan doğru və prinsipial mövqe nümayiş etdirdi və etdirir, dünyanı bürüyən ölümcül virusun insanlara gətirə biləcəyi həyati və iqtisadi təhlükələrin minimuma endirilməsi sahəsində təxirəsalınmaz və önləyici qərarlar qəbul etdi və bu qərarların təcili yerinə yetirilməsini təmin etdi.”

Deputat vurğulayıb ki, bu qərarların yerinə yetirilməsində, ölkə əhaləsinə göstərilən qayğı və diqqət sahəsində hökumətimizi və dövlətimizi dəstəkləyən öncüllər sırasında Heydər Əliyev Fondunu xüsusi qeyd etməliyəm: “Fondun hadisələrə çevik və peşəkar yanaşması, hökumət qərarlarını sürətlə və qüsursuz yerinə yetirməsi fəxarət doğurur. Heydər Əliyev Fondu bir daha sübut etdi ki, o, dövlətlə xalq arasında əlaqələrin daha sıx, daha möhkəm olmasına səy göstərir və əslində dayanıqlı körpü rolunu oynayır. Fond dövlətimizlə bərabər insanlarımızın yanındadır, sözün əsl mənasında həyat uğrunda mübarizədə öndə gedir.

Mübaliğəsiz və birmənalı şəkildə vurğulamaq istəyirəm: Azərbaycan Respublikasının Birinci vitse-prezidenti Mehriban xanım Əliyevanın rəhbərliyi ilə Heydər Əliyev Fondu ölkəmizdə COVID-19-la mübarizədə əvəzsiz töhfəsini verməkdədir. Hələ virusun yayılmağa başladığı ilk dövrdə cənab Prezidentimiz tərəfindən yaradılan və milli həmrəyliyimizi nümayiş etdirən Koronavirusla Mübarizəyə Dəstək Fonduna məhz Heydər Əliyev Fondu ilk olaraq 500 min manat vəsait köçürdü. Bu humanist addım virusun yayıldığı ilk vaxtlar çox vacib idi. Azərbaycan əhalisinin sağlamlığını əsas diqqət mərkəzində saxlayan Fondun professional işçi heyəti bütün dövlətlərin səfərbər olunduğu bir dövrdə süni tənəffüs aparatlarının çevik şəkildə xaricdən ölkəmizə gətirilməsi istiqamətində əvəzsiz dəstək göstərdi. Bu dönəmdə virusun ölkəmizdə sürətlə yayılmasının qarşısı erkən tədbirlərlə alındı, dünya standartlarına uyğun laboratoriyaların qurulması, laboratoriyaların ən müasir diaqnostik avadanlıqlarla təchiz edilməsi, dəqiq diaqnostikanın həyata keçirilməsi üçün reaktiv və kitlərin təmin olunması istiqamətində Fondun işçi heyəti səfərbər edildi və eyni zamanda səhiyyə sisteminin bu dövrdə xüsusilə gərgin işlədiyini nəzərə alaraq Fond müxtəlif tibb müəssisələrini maskalar, əlcəklər, qoruyucu eynəklər, tibbi geyimlər və dezinfeksiyaedici vasitələrlə təmin etdi. Bu istiqamətdə yardımlar hələ də davam etməkdədir.

Heydər Əliyev Fondu virusa yoluxmuş şəxslərin aşkarlanması, onların diaqnostikası və müalicəsi istiqamətində həkimlərin fəaliyyətinin stimullaşdırılması, beynəlxalq təcrübənin öyrənilməsi istiqamətində də əhəmiyyətli işlər görür. Fond Azərbaycanın regionlardakı xəstəxanalarında COVID-19-a qarşı mübarizə tədbirləri ilə əlaqədar əsas bacarıqları gücləndirmək üçün fəaliyyətə başlamış REACT-C19 layihəsinə də dəstək verib. Layihə çərçivəsində beynəlxalq ekspertlər tərəfindən seçilmiş pilot tibb müəssisələrində onlayn təlimlər keçirilmiş, həkimlərimizin bilik və bacarıqları təkmilləşdirilmişdir.

Qeyd edim ki, ölkəmizin birinci xanımı Mehriban Əliyeva körpə vətəndaşlarımızın sağlamlığını da unutmur, onları daim diqqət mərkəzində saxlayır. Məhz Mehriban xanımın tapşırığına əsasən, bu dövrdə Fond tərəfindən Bakıda və regionlardakı körpələr və uşaq evlərinə, internat məktəblərinə, Uşaq Psixonevroloji Mərkəzə dezinfeksiyaedici vasitələr, maskalar və digər qoruyucu vasitələrdən ibarət yardımlar edilib. Qeyd olunan müəssisələrdə dezinfeksiya işləri həyata keçirilib, həmçinin sosial təcrid rejiminin tətbiq olunması üçün zəruri təşkilati dəstək göstərilib.

Heydər Əliyev Fondu karantin rejimində əhali və dövlət arasında əlaqəni təmin etmək, əhalinin ehtiyaclarını qiymətləndirmək və düzgün məlumatlandırma aparmaq məqsədilə yaradılmış 1542 Çağrı Mərkəzini də psixoloji və poliklinik dəstək xətləri ilə təmin edib. Bundan başqa, Fond əhalinin həssas qruplarını daim diqqətdə saxlayan ölkə rəhbərliyinin mütəmadi tədbirlərinə dəstək verməklə bir sıra addımlar da atmışdır. Fondun təşkilatçılığı ilə xüsusi risk qrupunda olan ahıl vətəndaşlarımızın məskunlaşdığı Pensiya yaşına çatmış şəxslər üçün sosial xidmət müəssisəsində xidməti personalın kənar mühitlə təmasını maksimum məhdudlaşdırmaq üçün uzunmüddətli növbəli sistem yaradılmışdır.

Karantin dövründə Heydər Əliyev Fondu əhalinin zəruri qida vasitələrinə ehtiyaclarını nəzərə alaraq, sosial müdafiəyə ehtiyacı olan vətəndaşlara yardım etmək və milli birliyimizi nümayiş etdirmək məqsədilə “Biz birlikdə güclüyük!” şüarı ilə 100 mindən artıq sovqatın paylanılması üçün sosial aksiyaya başlamış və bugünədək aksiya çərçivəsində minlərlə aztəminatlı ailəyə yardım göstərilmişdir.

Heydər Əliyev Fondu Nazirlər Kabineti yanında Operativ Qərargahın həyata keçirdiyi hər bir layihədə də aktiv iştirak edir. Bu sahədə tədbirlər davam edir.”

Rəşad Mahmudov xüsusi qeyd edib ki, ölkəmizdə mövcud vəziyyət düzgün qiymətləndirilir və daim nəzarətdədir: “Buna heç kimin şübhəsi olmasın, ölkə Prezidenti tərəfindən sistemli şəkildə atılan addımlar xalqımızı bu bəladan az itkilərlə çıxmağa imkan verəcək. Bu baxımdan ölkədə bütün qurumların imkanları səfərbər edilmişdir. Əminəm ki, Azərbaycan bu sınaqdan da ən az zərərlə çıxacaq, dövlətimizin və xalqımızın tam təhlükəsizliyi və rahatlığı bundan sonra da təmin ediləcək.”

İki sahil.- 2020.- 9 may.- S.13.