Korrupsiya milli təhlükəsizliyə ciddi təhdiddir

Öz işinin öhdəsindən gələ bilməyən, xəbərdarlıqlardan nəticə çıxarmayan, xalqa və dövlətə xəyanət yolunu tutan məmurlar bundan sonra da cəzalandırılacaqlar

Müasir dövrün qlobal problemlərindən biri də korrupsiyadır. Danılmaz faktdır ki, korrupsiya səmərəli dövlət idarəçiliyini sarsıdır, bərabərlik və sosial ədalət prinsiplərini pozur, təmiz rəqabəti təhrif edir, iqtisadi inkişafı çətinləşdirir, qanunun aliliyinə, demokratiyaya, insan hüquqlarına, demokratik təsisatların sabitliyinə və cəmiyyətin mənəvi dəyərlərinə təhlükə yaradır. Bəşəri bəlaya çevrilən korrupsiya təbii ki, ölkəmiz üçün də narahatlıq doğurmaya bilməz. Müasir müstəqil Azərbaycan Respublikasında korrupsiyaya qarşı genişmiqyaslı mübarizə 1994-cü ildən başlanmışdır. Ötən müddət ərzində iqtisadiyyatın liberallaşdırılması, bürokratik əngəllərin aradan qaldırılması, məmur-vətəndaş münasibətlərinin sağlam zəmində qurulması, şəffaflığın və hesabatlılığın təmin edilməsi və digər bu kimi korrupsiyaya qarşı mübarizə tədbirlərinə əsaslanan ardıcıl hüquqi və institusional islahatlar həyata keçirilib və bu gün də keçirilməkdədir. Aparılan genişmiqyaslı islahatların nəticəsi kimi milyonlarla vətəndaşa xidmət göstərməklə dövlət qulluqçusu-vətəndaş münasibətlərində yeni yanaşmanın formalaşmasına mühüm töhfə verən, bürokratiya, süründürməçilik və korrupsiya hallarının aradan qaldırılmasında əhəmiyyətli rol oynayan “ASAN xidmət” mərkəzlərinin fəaliyyət coğrafiyasının daha da genişləndirilərək 16 mərkəzə çatdırılması, habelə yarandığı gündən keçən qısa müddət ərzində bu xidmətə 34 milyondan çox müraciət daxil olması, əhalinin məşğulluğu, əmək, sosial müdafiə və təminat sahələri üzrə 132 xidmətin “bir pəncərə”dən təqdim edilməsinə imkan verən nadir layihə kimi DOST mərkəzlərinin fəaliyyətə başlaması Azərbaycanda korrupsiyaya qarşı mübarizə sahəsində dövlət və cəmiyyət arasında olan həmrəyliyin bariz nümunəsidir. Prezident İlham Əliyevin rəhbərliyi ilə bir çox fərqli sahələri sistemli şəkildə əlaqələndirən islahatların müsbət nəticələri vətəndaş-məmur təmasında şəffaflıq, hesabatlılıq və rəqəmsallaşmanın genişlənməsi kimi korrupsiya riskini minimuma endirən indikatorlara öz töhfəsini verib, bununla da hüquqi şəxslərin dövlət qeydiyyatı, tikinti, elektrik, əmlakın qeydiyyatı, vergi, gömrük, xarici ticarət və dövlət satınalmaları kimi ayrı-ayrı sektorların yeni inkişaf müstəvisinə keçidi stimullaşdırılıb.

Lakin bütün bu nailiyyətlərə baxmayaraq, son zamanlar müşahidə edilən hadisələr, əsasən Azərbaycan Respublikasının Dövlət Təhlükəsizliyi Xidməti (DTX) tərəfindən Ağstafa, Yevlax, Biləsuvar, İmişli və Neftçala rayonlarında, Mədəniyyət Nazirliyində keçirilən əməliyyatlar nəticəsində üzə çıxan korrupsiya və rüşvətxorluq halları hiddət doğurmaya bilməz. Ölkəmizin pandemiya kimi qlobal bəla ilə mübarizə apardığı bir vaxtda vəzifəsindən sui-istifadə edən məmurların aşkarlanması və cinayət məsuliyyətinə cəlb olunması bu istiqamətdə həyata keçirilən islahatların davamlılığını bir daha sübut etdi. Prezident İlham Əliyev çıxışlarında hər zaman çağırışlar edərək məmurları düzgün, ədalətli olmağa çağırır. Bildirir ki, məmurun xəyanət yolunu seçməsi həm hüquqi, həm də mənəvi baxımdan bağışlanılmazdır. Mayın 7-də Bakıda modul tipli ilk xəstəxana kompleksinin açılışında çıxış edən ölkə başçısı deyib: “ ...əfsuslar olsun ki, biz bu vəziyyətdə milli xainlərin də üzünü gördük. Kasıbın malına, ərzaq payına göz dikən xaindir, bunun başqa adı yoxdur. Bu, oğurluq deyil, bu, kiçik bir cinayət deyil...Mən demişəm, bir daha demək istəyirəm ki, bir çoxları pandemiyanı müharibə adlandırırlar. Müharibə, əslində, göz qabağındadır. Bu şəraitdə belə adamlara nə ad vermək olar? Ona görə bu adamların cəzalandırılması qaçılmazdır. Eyni zamanda, indiki şəraitdə xüsusilə kasıb adamların maaşını mənimsəmək, ictimai işlərə cəlb edilən vətəndaşların ödəniş kartlarını götürüb ondan pul çəkmək, bu da xəyanətdir. Son müddətdə həbs olunan icra başçılarının beşi də bu bəd əməllərdə təqsirləndirilir. Son həbslər də onu göstərir. O icra başçılarının, onların yaxınlarının, köməkçilərinin iş otaqlarından yüzlərlə ödəmə kartı çıxıb, yüzlərlə. Mənə verilən məlumata görə, son tutulan icra başçısının iş otağından 140 ödəmə kartı çıxıb. Bu nədir? Biz bu kartı özünə iş tapa bilməyənlərə veririk. Əvvəl də verirdik. Biz ildə otuz min, qırx min belə adamı ictimai işlərə cəlb edirdik - hansısa binanın rənglənməsi, yaxud da ki, onların bağçaya xidmət etməsi və digər işlərə. Onlar minimum əməkhaqqı səviyyəsində maaş alırdılar, bu gün 250 manat. Amma onlara çatacaq kartlar icra başçıları tərəfindən götürülür, sonra o pullar mənimsənilir. Kasıb adamlar da işsiz və pulsuz qalır. Bu adi cinayətdirmi? Yox. Bu xəyanətdir. Bunun başqa adı yoxdur. İndiki şəraitdə də bunu davam etdirirlər. Bu adamlarda vicdan deyilən şey yoxdur, vicdanı tam itiriblər. Biz belə ünsürlərə qarşı bundan sonra da amansız mübarizə aparacağıq”.

Əlbəttə ki, daşıdığı məsul dövlət vəzifəsində özünü doğrultmayan məmurlara qarşı qanunlara uyğun şəkildə xəbərdarlıq tədbirləri görülür. Öz işinin öhdəsindən gələ bilməyən, xəbərdarlıqlardan nəticə çıxarmayan, xalqa və dövlətə xəyanət yolunu tutan məmurlar isə qanunvericiliyin tələblərinə uyğun olaraq müvafiq qaydada cəzalandırılırlar. Cəza tədbirləri məmurun vəzifəsinin böyüklüyündən asılı olmayaraq, ardıcıl nöqsanlara yol vermiş, dövlət maraqlarına xəyanət etmiş, xalqdan üz çevirmiş hər bir kəsə tətbiq olunur. Dövlət başçısı ölkə ictimaiyyətini bu sahədə yardımçı olmağa, neqativ hallarla bağlı müvafiq qurumlara müraciətlər etməyə, ayıq-sayıq olmağa çağırır. Prezident İlham Əliyevin korrupsiyaya və məmur özbaşınalığına qarşı mübarizəsinin geniş ictimaiyyət və xalq tərəfindən dəstəklənməsinin nəticəsidir ki, həyata keçirilən kadr dəyişiklikləri və islahatlar cəmiyyət tərəfindən daim müsbət qarşılanır və ölkə rəhbərinə olan etimadı daha da artırır.

Sevinc Azadi

İki sahil.- 2020.- 14 mart.- S.7.