Doğma torpaqlara qayıdış Füzuli - Şuşa yolundan başladı

«Yenə də Azərbaycan vətəndaşları burada yaşayacaqlar, quracaqlar, yaradacaqlar» söyləyən Prezident İlham Əliyev Böyük Qayıdışın daha möhtəşəm olacağını bildirir

Belə bir deyim var: Ayaq basdığın yeri torpaq deyib keçmə, onu tanı, sev. Torpaqlarımız uğrunda vuruşmalarda şəhid, qazi olan igidlərimiz bu müdrik kəlamı Vətən uğrunda canlarından keçməklə daha da müqəddəsləşdirdilər.

İkinci Qarabağ müharibəsindəki tarixi qələbəmiz, torpaqlarımızın işğaldan azad olunması uğrunda aparılan müharibə, ən başlıcası isə üçrəngli bayrağımızın Azərbaycanın incisi, mədəniyyət mərkəzi Şuşada dalğalanması, Gövhərağa məscidində azan səsinin eşidilməsi düşmən üzərində qələbəmiz, bu müqəddəs ocaqda namaz qılınması xalqımızın özünəqayıdış müjdəsi idi. Bu qayıdışla sonrakı illərdə görüləcək işlərin ilk konturları müəyyənləşdirildi. Düşmən üzərində qələbənin əsas qəhrəmanı olan Prezident, Ali Baş Komandan İlham Əliyevin, Vətən uğrunda mübarizəyə qoşulan Milli Ordumuzun əsgər və zabitlərinin hər birinin bu şanlı qələbədə payı vardır. Azərbaycan xalqının zəfər salnaməsinin hər səhifəsində gərgin gedən döyüşlər, düşmənə ağır zərbə endirən, başını əzən ərənlərimizin Vətən sevgisi, torpağa bağlılığı görünməmiş bir qəhrəmanlıq dastanı kimi tarixə yazıldı. Ulu Dədə Qorquddan qalan birliyə çağırış rəmzi olan üç tonqalın yandırılması bugünkü nəslə də nəsib oldu.

Torpaqlarımızın erməni işğalçılarından azad olunması ilə xalqımızın Vətənə məhəbbət, torpağa bağlılıq duyğuları reallaşdı. Artıq Dədə Qorqudun həyat naminə başqa nəsihətlərinin yerinə yetirilməsi vaxtıdır: Torpağı qorumazsansa, əkib beçərməyinə dəyməz, əkib becərməzsənsə, qorumağına dəyməz. İllərdən bəri düşmənin murdar nəfəsindən çat-çat olan torpaqlarımızı canlandırmaq dövrü başlanır. Hər zaman düşünülmüş siyasəti ilə Azərbaycanı qüdrətli dövlətlərlə eyni sıraya qaldıran, nəyin nə zaman və necə həlli olunacağını dövlətçilik təcrübəsi ilə müəyyənləşdirən, qətiyyəti ilə düşmən üzərində tarixi zəfər çalan Prezident İlham Əliyev yenə də düzgün seçimi ilə xalqının etimad və etibarını qazanan lider olduğunu bildirdi.

Mədəniyyət yoldan başlanır. Bir də deyirlər ki, abad kənd yolundan bəlli olur. Həmişə xalqımızın milli-mənəvi dəyərlərinə hörmətlə yanaşan Prezident İlham Əliyev yenə də babalarımızın tarixin sınağından çıxmış müdrik deyimlərinə əməl etdi.

Bu günlərdə işğaldan azad olunmuş Füzuli və Cəbrayıl rayonlarında olarkən Füzuli- Şuşa avtomobil yolunun təməlqoyma mərasimində iştirak edən Prezident İlham Əliyevin bu addımı hələ də məğlubiyyətdən özünə gəlməyən, Cəbrayıla yol çəkdirmək istəyən Ermənistanın baş naziri, sərxoş Nikol Paşinyana daha bir zərbə idi. Yolun çəkilişi münasibətilə Azərbaycan xalqını təbrik edən cənab İlham Əliyevin «Şuşa, sən artıq azadsan, biz səni yenidən dirçəldəcəyik» çağırışı bu yolun çəkilişi ilə başlayır. «Çünki bu yol bizi Qarabağın tacı olan Şuşa şəhərinə aparır. Noyabrın 10-da düşmən faktiki olaraq kapitulyasiya aktını imzalamışdır. Şuşanın işğaldan azad edilməsi bizim gücümüzü göstərdi. Ordumuzun peşəkarlığını, hərbçilərimizin cəsarətini, qəhrəmanlığını göstərdi. Şuşanın götürülməsi çox böyük peşəkarlıq, cəsarət tələb edən əməliyyat idi. Əminəm ki, bu əməliyyat dünya tarixində xüsusi yer tutacaqdır. Çünki bu əməliyyatı yalnız yüngül silahlarla silahlanmış bizim qəhrəman hərbçilərimiz dağlardan, meşələrdən, cığırlardan keçərək icra ediblər» söyləyən Ali Baş Komandan İlham Əliyev həmin gün dövlət başçısı kimi qələbə günündən 8 və Ermənistanın kapitulyasiyasından 6 gün keçəndən sonra Füzuli –Şuşa yolunun çəkilməsinə başlanmasını işğal olunmuş ərazilərdə aparılan quruculuq işlərinin başlanğıcı adlandırır.

İşğal olunmuş ərazilərdə bütün infrastrukturun, evlərin dağıdılması, bəzi kəndlərin tamamilə yerlə-yeksan olunması, yandırılması bir həqiqəti dünyaya bəyan etdi ki, Azərbaycan özünü dünya ictimaiyyətinə məsum, məzlum xalq kimi təqdim edən, əslində isə vəhşi düşməndən də betər dağıdıcılıqla, qəddarlıqla məşğul olan Ermənistanla üz-üzəyə dayanaraq, haqq-ədalət uğrunda apardığı mübarizədə qalib gəlib.

İkinci Qarabağ müharibəsində Azərbaycan xalqı göstərdi ki, qəsbkarların, başqasının torpağına göz dikənlərin, təbiətə qarşı barbar münasibət göstərənlərin aqibəti mütləq rəzillik, məğlubiyyət, ədalətin zülm üzərində qələbəsidir. Bu baxımdan işğal olunmuş ərazilərdə aparılan quruculuq işlərinin təməli olan Füzuli-Şuşa yolu tarixi qələbənin Böyük Qayıdışa, abadlığa uzanan qoludur. «Bu gün bu gözəl təməlqoyma mərasimi böyük rəmzi məna daşıyır» söyləyən Prezident İlham Əliyev Şuşaya gedən bu yoldan onlarla şəhər və kəndin istifadə edəcəyini, bütünlükdə bölgənin inkişafı üçün böyük əhəmiyyət daşıdığını bildirir. «Sanki bu torpaqlardan bir vəhşi qəbilə keçib. Hər şeyi dağıdıb, talan edib, bizim mədəni, tarixi, dini irsimizi silmək istəyib, ancaq istəyinə nail ola bilməyib» sözləri ilə Böyük Qayıdışın bu yerlərə yeni həyat verəcəyini bildirən dövlət başçımız işğaldan azad olunan bütün torpaqlarda quruculuq, abadlıq işlərinin aparılacağını, düşmənin torpağımıza vurduğu yaraların sağalacağını diqqətə çatdırır. Viran qoyulmuş şəhər və kəndlərdə ürək ağrıdan mənzərə bir məsələyə də aydınlıq gətirir. Xunta rejimi ilə idarə olunan Ermənistanın «qüdrətli ordusu» dağıdıcılıqla, barbarlıqla, həyat qaynağı sayılan təbiətə, bütün canlılara , torpağa, suya, floraya, faunaya ziyan vurmaqla, Azərbaycan xalqına məxsus sərvətləri talamaqla məşğul olmuşdur. Dünyada çox müharibələr, toqquşmalar olub. Amma heç bir dövlət dağıdıcı, ziyanverici, barbar, vəhşi ermənilər kimi düşmənlə rastlaşmayıb. Azərbaycan xalqı bu cür yırtıcı düşmənə də qalib gəldi.

Cəbrayılda olarkən gördüyü mənzərəni ürək ağrısı ilə seyr edən Prezident İlham Əliyev şəhər və kəndlərin qısa müddətdə abadlaşdırılacağını bildirdi. Xalqımız əmindir ki, işğaldan azad olunmuş bütün torpaqlar yenidən canlanacaq. Hazırda dağıdılmış bütün şəhər və kəndlərə dəyən ziyanlar hesablanır. Sonrakı mərhələdə şəhərsalma üzrə yerli və xarici mütəxəssislərin birgə fəaliyyəti ilə kəndlərin, şəhərlərin infrastrukturu, ekologiyası bərpa olunacaq, yeniləcək. Bu vəhşilikləri üçün Ermənistan beynəlxalq məhkəmələrdə cavab verməli olacaq. Hazırlanacaq baş plana əsasən rayonlarda yeni inzibati, yaşayış binaları, məktəblər, səhiyyə ocaqları inşa olunacaq, parklar salınacaq, küçələr bərpa ediləcək. «Bütün şəhərlərdə qələbə abidələri ucaldılacaq və həyat qayıdacaq. Yenə də Azərbaycan vətəndaşları burada yaşayacaqlar, quracaqlar, yaradacaqlar. Amma bu günkü tarix heç vaxt silinməyəcək. Erməni vəhşiliyinin canlı şahidləridir bax, bu dağıdılmış evlər… Bərpa edəcəyik bunları hamısını bərpa edəcəyik. Azərbaycan xalqı bir daha öz böyüklüyünü göstərəcək» söyləyən Prezident İlham Əliyev bərpa işlərinin çoxşaxəli olacağını bildirir.

Xudafərin körpüsünü görərkən «Bu gün noyabrın 16-sı mənim həyatımda xüsusi tarix olaraq qalacaq» söyləyən Prezident İlham Əliyevin İranla Azərbaycan arasında dostluq körpüsü, memarlıq abidəsi olan Xudafərin üzərində Azərbaycan bayrağını qaldırması xalqımızın qürür mənbəyi olmaqla düşmən üzərində qələbəmizin önəmli məqamlarından birini də əbədiyyətə çevirdi.

Bəli, Azərbaycan düşmən üzərində siyasi, hərbi zəfər çaldı. Torpaqlarımız işğaldan azad olundu. Növbəti qələbəmiz isə bu torpaqlara yeni həyatın qayıtması, Vətən həsrətli insanların doğma evlərinə qayıdışı, «Qarabağ bizimdir, Qarabağ Azərbaycandır!» sözlərini gündəlik həyatlarında hiss etməsi olacaq.

Xuraman İsmayılqızı,

İki sahi.- 2020.- 19 noyabr.- S.10