Xətai rayonunda şəhidlərin xatirə lövhəsinin açılış mərasimi keçirildi

Müqəddəs ruhuna salam olsun, şəhidim!

İkinci Qarabağ müharibəsi dövründə peşəsindən asılı olmayaraq hər kəs müsəlləh əsgər oldu. 44 günlük Vətən müharibəsində şəhid olan və ya qazi kimi evə dönən hər bir igidimizin həyatı qəhrəmanlıq dastanıdır. Onlardan biri də haqqında danışacağımız Ülvi Rəfael oğlu Rəfiyevdir.

Gəlin, Ülvi Rəfael oğlu Rəfiyevin həyat kitabını vərəqləyək:

Ülvi Rəfiyev 16 avqust 1996-cı ildə Ordubad şəhərində dünyaya gəlib. Ülvi bütün qohumları, xüsusilə babası və nənəsi tərəfindən çox sevilirdi. Çünki adı kimi o qədər saf, təmiz, mehriban idi. 2013-cü ildə Bakı şəhəri Xətai rayonu 263 nömrəli orta məktəbi bitirib, Azərbaycan Dövlət Neft Akademiyasına qəbul olunub. Yaxşı oxumaqla bərabər, həm də universitetin ictimai həyatında fəal iştirak edib. Gələcəklə bağlı böyük arzuları var idi. Daha çox Azərbaycanı beynəlxalq festivallarda layiqincə təmsil etmək istəyirdi. Ali təhsilini bitirdikdən sonra hərbi xidmətə çağırılan Ülvi 2017-2018-ci illərdə Azərbaycan Silahlı Qüvvələrinin sıralarında müddətli həqiqi hərbi xidmətdə olub. Burada özünü nümunəvi hərbçi kimi göstərib. Ailəsinin və Vətəninin başını uca tutub. Mülki həyata qayıtdıqdan sonra həm sərbəst yaşamaq ,həm də ailəsinə dəstək olmaq üçün əmək fəaliyyətinə başlayıb. Evlənmək üçün planlar qurmağa başlayıb. Deyərdi ki, özümə elə bir möhtəşəm toy edəcəm və toyda Zeybək rəqsi oynayacağam.

2020-ci ilin Tovuz döyüşləri zamanı general-mayor Polad Həşimovun şəhid olmasından sonra öz istəyi ilə Xətai Rayon Hərbi Komissarlığına müraciət edib. Azərbaycan Ordusunun əsgəri olan Ülvi Rəfiyev 2020-ci il sentyabrın 27-də Ermənistanın növbəti təxribatına cavab olaraq Azərbaycanın ərazi bütövlüyü uğrunda başlanan Vətən müharibəsi zamanı Cəbrayılın və Füzulinin azad olunmasında gedən döyüşlərdə savaşıb. Hərbi əməliyyatların ilk günündən döyüşlərdə iştirak edən qəhrəmanımız onlarla düşməni məhv etməklə yanaşı, döyüş yoldaşlarını qoruyar, yaralı əsgərlərə köməyini əsirgəməzdi. Sentyabrın 20-də hərbi təlimlərə qatılan Ülvi Rəfiyevin döyüş yolu oktyabrın 25-də başa çatdı. Ülvi oktyabrın 25-i Qubadlının işğaldan azad olunduğu gün cəbhənin Füzuli və Cəbrayıl istiqamətlərində gedən ağır döyüşlərdə xüsusi qəhrəmanlıq göstərərək ömrünün 24-cü baharında özünün də arzuladığı kimi şəhidlik zirvəsinə ucaldı. Şəhid Ülvi Rəfiyev əsrlər boyu unudulmayacaq tarix yazaraq bu dünyadan köçdü və gələcək nəsillərə bütöv Azərbaycan əmanət etdi. Rəfiyev Ülvi Rəfael oğlu Prezident İlham Əliyevin sərəncamları ilə ölümündən sonra "Vətən uğrunda", "Xocavəndin azad edilməsinə görə" medalları ilə təltif olunub.

İkinci Qarabağ müharibəsi başlayanda artıq 3 ay olardı ki, sevdiyi xanımla nişanlanmışdı. Lakin məlum səbəblərdən toy yubanırdı. Hər ayın tamamında o, nişanlısına gül buketi hədiyyə edirdi. Həmin gün Ülvi ilə sevdiyi qızın nişanlanmasının 4-cü ayı idi. Oktyabrın 25-i Ülvinin arzuları, xəyalları, gənc ömrü kimi sevdiyi xanımına göndərəcəyi güllər də yarı yolda qaldı…

Ülvi həm də peşəkar rəqslə məşğul olurdu. İstedadlı rəqqas kimi beynəlxalq müsabiqələrdə uğur qazanan Ülvi, bu dəfə ən böyük qələbəsini döyüş meydanında qazandı. Avqustun 16-sı Vətən müharibəsi şəhidi Ülvi Rəfiyevin ad günüdür. Yaşasaydı 25 yaşı olacaqdı...

Bu gün Azərbaycan xalqı qəhrəmanlıqları ilə Vətənin başını uca edən igid oğulları ilə fəxr edir, sonsuz qürur duyur. Düşmənin canlı qüvvəsinin və döyüş texnikasının məhv edilməsində fədakarlıq və rəşadət göstərən, vəzifə borcunu ləyaqətlə və vicdanla yerinə yetirərək şəhidlik zirvəsinə ucalan igid oğullarımızın doğum və anım günləri vətənpərvərlik tədbirləri ilə qeyd edilir, onların məzarları ziyarət olunur, ailələrinə baş çəkilir, xatirələri ehtiramla anılır. Bu cür tədbirlərdən biri də avqustun 16-da Bakı şəhəri, Xətai rayonunda Qarabağ müharibələrinin şəhidləri Rəfiyev Ülvi Rəfael oğlu və Cəfərov Zaur Fuad oğlunun xatirəsinə həsr olunan lövhənin açılış mərasimi oldu.

Qeyd edək ki, Birinci Qarabağ müharibəsinin şəhidi Zaur Fərəcov 1974-cü il sentyabrın 2-də Bakıda dünyaya göz açıb. O, 1994-cü il yanvarın 28-də Xocavənd uğrunda gedən döyüşlərdə itkin düşüb. 1999-cu il sentyabrın 22-də Z.Cəfərova şəhid statusu verilib.

Tədbirdə çıxış edən Xətai Rayon İcra Hakimiyyətinin şöbə müdiri Pənah İmanov, "İki sahil" qəzetinin baş redaktoru Vüqar Rəhimzadə, Məşədi Dadaş məscidinin axundu, din xadimi Hacı Şahin, hər iki şəhidin ailə üzvləri, döyüş yoldaşları, rayon İcra Hakimiyyətinin nümayəndələri və digər ictimaiyyət üzvləri iştirak ediblər.

Mərasimdə Azərbaycan Respublikasının Dövlət Himni səsləndiriləndən sonra iştirakçılar bir dəqiqəlik sükutla şəhidlərin xatirəsinə ehtiramlarını ifadə etdilər.

Tədbiri giriş sözü ilə açan Xətai Rayon İcra Hakimiyyəti başçısı aparatının İctimai-siyasi və humanitar məsələlər şöbəsinin müdiri Pənah İmanov Prezident, Müzəffər Ali Baş Komandan İlham Əliyevin rəhbərliyi ilə qazanılan Qələbədə şəhidlərimizin şücaətindən danışdı, Vətən qarşısında öz borclarını ləyaqətlə yerinə yetirən igid vətənpərvər Azərbaycan oğullarının xatirəsinin xalqımız tərəfindən daim əziz tutulacağını söylədi: “Müzəffər Ali Baş Komandan, Prezident İlham Əliyevin rəhbərliyi ilə Azərbaycan Ordusunun İkinci Qarabağ müharibəsində iştirak edən hər bir əsgər və zabiti Böyük Zəfərimizin əldə olunmasında misilsiz xidmətlər göstərərək nəinki Azərbaycan, bütün dünya hərb tarixinə “44 günlük Vətən müharibəsi” başlıqlı şanlı səhifə yazdı. Əlbəttə ki, bütün bunlar Vətən uğrunda canını qurban vermiş igid oğullarımızın sayəsində gerçəkləşdi.

P.İmanov qeyd etdi ki, ənənəvi olaraq rayonumuzun ərazisində Birinci və İkinci Qarabağ müharibəsində öz canı bahasına Qələbəni bizə yaşadan şəhidlərimizin xatirələrini əbədiləşdirmək üçün tədbirlər keçiririk. Bu tədbirlərdən biri də şəhidimiz Rəfiyev Ülvi Rəfael oğlunun xatirəsini ehtiramla yad etmək üçün keçirilir. Əsas məqsədimiz şəhidimizin adını və xatirəsini əbədiləşdirmək, onun ailə üzvlərinə, yaxınlarına təskinlik vermək və qəhrəmanlığını gənc nəslə nümunə olaraq onların yaddaşlarına həkk etməkdən ibarətdir.

Daha sonra tədbirdə məktəblilər tərəfindən Vətənə, ordumuza, şəhidlərimizə həsr olunan şeirlər söylənildi, mahnılar oxundu. Şəhidin ibtidai sinif müəllimi Ülvinin məktəb xatirələrindən, nizam-intizamından, mehribanlığından, vətənpərvərliyindən bəhs etdi. Ülvi kimi igid oğulun müəlliməsi olduğu üçün çox qürur duyduğunu və Vətən qarşısındakı borcunu ləyaqətlə yerinə yetirmiş qəhrəman şagirdi ilə fəxr etdiyini bildirdi. İşğal altında olan torpaqlarımızı 30 illik həsrətdən sonra yenidən bizə qaytardıqları üçün başda Müzəffər Ali Baş Komandan olmaqla rəşadətli Azərbaycan Ordusuna, həmçinin Aşəhidlərimizə və qazilərimizə minnətdarlığını çatdırdı.

Ardınca isə mərasimdə hər iki şəhidin ailə üzvləri çıxış edərək onlarla bağlı xatirələrini bölüşdülər, onların Vətənə olan bağlılığından, torpaq sevgisindən söz açdılar. Vətən uğrunda canından keçən insanlara göstərilən diqqət və qayğıya görə Prezident İlham Əliyevə, Birinci vitse-prezident Mehriban Əliyevaya, eləcə də rayon ictimaiyyətinə minnətdarlıqlarını bildirdilər.

Tədbirdə çıxış edən "İki sahil” qəzetinin baş redaktoru Vüqar Rəhimzadə vurğuladı ki, bu gün qəhrəman şəhidlərimizin valideynlərinin qürur hissi keçirməyə tam mənəvi haqları var: “Çünki onların igid övladları Vətən uğrunda qəhrəmanlıq göstərərək canlarını fəda ediblər. Zənnimcə, Vətən uğrunda canını fəda etməkdən qürurlu heç nə ola bilməz. Azərbaycanın ərazi bütövlüyü uğrunda canından keçmiş Vətən oğulları təkcə öz valideynlərinin deyil, bütün xalqımızın övladı, qardaşı, əzizi və doğmasıdır. Qəhrəman şəhidlərimizin həyatı hər bir vətəndaş, o cümlədən Azərbaycan gənci, bir sözlə, bu günümüz, gələcəyimiz üçün bir örnəkdir.

Hər bir Azərbaycan vətəndaşı şəhidlərimizin qəhrəmanlıq yolunu öyrənməli, onların şücaətindən bəhrələnməli və bu rəşadəti öz həyatı üçün böyük amal hesab etməlidir. Şübhə etmirik ki, zaman keçdikcə şəhidlərimizin şanlı döyüş yolunun gənc nəslə çatdırılması üçün sanballı əsərlər yazılacaq, filmlər çəkiləcək. Xalqımıza Qələbə, Zəfər sevincini yaşatdıqlarına görə Müzəffər Ali Baş Komandan, Prezident İlham Əliyev başda olmaqla ordumuzun bütün əsgər və zabitlərinə ürəkdən minnətdarıq. Bütün şəhidlərimizin ruhu qarşısında baş əyir, onlara Allahdan rəhmət diləyirəm.”

Məşədi Dadaş məscidinin axundu, din xadimi Hacı Şahin əvvəlcə Xətai Rayon İcra Hakimiyyətinin rəhbərliyinə və aidiyyəti qurumlara belə silsilə anım tədbirlərini, abidə və bulaq açılış mərasimlərini təşkil etdikləri üçün təşəkkür etdi: “Mən hər şəhid məclisində deyirəm ki, ordumuz və şəhidlərimiz torpaqlarımızla yanaşı, qürurumuzu və heysiyyətimizi bizə qaytardılar. Bir xalqın ümidi özünə qayıdırsa, mənliyi özünə qayıdırsa, bu, ən böyük qələbə və uğurdur. Ona görə də şəhidlərin Vətən müharibəsi dönəmlərində bu xalqa xidməti heç nə ilə ölçülmür.”

Ehtiyatda olan kapitan, Qarabağ qazisi, Xətai Rayon İcra Hakimiyyətinin Vətən müharibəsi iştirakçıları və şəhid ailələri ilə işin təşkili şöbəsinin müdiri Anar Məmmədov bildirdi ki, qəhrəman oğullarımızın Azərbaycanın ərazi bütövlüyünün təmin olunmasında göstərdikləri şücaət, onların döyüş yolu gələcək nəsillər üçün nümunə olacaq, Vətən uğrunda canını fəda edən igidlərimiz əbədiyyətədək xalqımızın yaddaşında yaşayacaq, onların xatirəsi dövlətimiz tərəfindən daim uca tutulacaq: “44 günlük Vətən müharibəsi bir daha dünyaya sübut etdi ki, bizim xalqımız, ordumuz, Ali Baş Komandanımız həm döyüş meydanında, həm də siyasi müstəvidə öz sözünü deyir. Şəhid və qazilərimiz sayəsində bütün dünyaya haqq uğrunda mübarizədə qələbənin necə qazanılmasını göstərdik. Ali Baş Komandanın da vurğuladığı kimi, “dəmir yumruq”la düşmənin başını əzdik. Allah bütün şəhidlərimizə rəhmət eləsin, qazilərimizə cansağlığı versin. Allah xalqımızı qorusun. Ali Baş Komandanımızı bundan sonra da atacağı addımlarda Müzəffər eləsin.”

Tədbirin sonunda şəhidlərin xatirə lövhəsinin qarşısına tər güllər düzüldü.

Açılışda iştirak edənlər, şəhidin ailə üzvləri ürək sözlərini, qəhrəmanla bağlı xatirələrini “İki sahil”lə bölüşdülər:

Şəhid Ülvi Rəfiyevin anası Səyyarə Rəfiyeva bildirdi ki, oğlu ilə çox böyük qürur duyur: “Həqiqətən də o, qürur duyulası övladdır. Təkcə şəhidliyinə görə yox, Ülvi haqqında saatlarla danışmaq olar. O, hər kəsin xatirində çox yaxşı insan olaraq məskən saldı. Ülvi şəhidlik zirvəsinə layiq oğul idi. Əslində, mən istəyərdim ki, mikrofon mənə onun toy günündə, şadlıq məclisində uzadılsın, mənim xeyir-duamın alınması üçün təqdim olunardı. Qürur duyuram ki, bu gün mikrafonlar mənə şəhidimin qəhrəmanlığından, xatirəsindən danışmaq üçün təqdim olunur. Dalğalanan üçrəngli bayrağımıza baxanda düşünürəm ki, bütöv Azərbaycanın bayrağının bu gün belə məğrur dalğalanmasında mənim Ülvimin də zəhməti olub. Hər il onun doğum günü öncəsi ailəvi səhayət planlayırdıq. Axırıncı doğum gününü nişanlısıgillə ailəvi bağımızda qeyd etdik. O, 25 yaşının tamamında toy etmək istəyirdi. Nə etmək olar, görünür qismət belə imiş… Hər birinizə təşəkkür edirəm ki, bu gün Ülvi 25-ci yaş günündə, xatirə lövhəsinin açılışında iştirak etdiniz, bizləri tək qoymadınız. Onun qəhrəmanlığını, döyüş yolu haqqında xalqımızı, gənc nəsli məlumatlandırırsınız.”

Ülvinin atası Rəfael Rəfiyev isə qeyd etdi ki, Ülvinin 25-ci yaş gününü birgə keçirə bilmədik: “Mən oğlumla ölənə kimi fəxr edəcəyəm, qürur duyacağam. Hər zaman bir valideyn kimi mənim başımı necə uca etmişdisə, indi də Vətənimizin başını uca etdi. Mən fəxr edirəm ki, belə bir oğul yetişdirmişəm. Onlar həmişə qəlbimizdədir.Vətən müharibəsində şəhidlərimizin qanı, qazilərimizin canı bahasına, hərbçilərin rəşadəti sayəsində, dövlət başçımızın uzaqgörən siyasəti, diplomatik məharəti nəticəsində Azərbaycan tarixi Zəfər qazandı. Şəhidlərimizin ruhu şad olsun ki, torpaqlarımız azaddır. Allah Ülvinin timsalında bütün şəhidlərimizin ruhunu şad eləsin.”

Müqəddəs ruhuna salam olsun, şəhidim!

Məkanın cənnət, ruhun şad olsun ,şəhidim!

Cənnətdəki ilk doğum günün mübarək, şəhidim!”

Yaqut Ağaşahqızı

Nurlan Məlikzadə

İki sahil.- 2021.- 17 avqust.- S.13.