Neft-qaz sənayesinə həsr

edilmiş mənalı ömür

Söhrab Salmanov – 80

Dekabrın 31-də Azərbaycan neft sənayesinin tanınmış simalarından olan məhrum Söhrab Salmanovun 80 yaşı olur.

S.Salmanov uzun illər Azərbaycan neft-qaz sənayesinin inkişafı naminə çalışmış, bu sahədə böyük əmək sərf etmiş neftçi mütəxəssislərdən biri idi.

Söhrab Salmanov Odessa Dəniz Donanması Mühəndislər İnstitutunun Bakı filialında təhsil almaqla yanaşı, gənc yaşlarından “Paris Kommunası” və “Vano Strua” adına gəmi təmiri zavodunda çilingər şagirdi, çilingər və qaynaqçı kimi çalışmışdır. Sonrakı illərdə Azərbaycan Neft Sənayesi Nazirliyinin Gəmi təmiri zavodunda usta, sex rəisi, şöbə rəisi, baş mühəndis vəzifələrində işləmiş, əməksevərliyi, təşkilatçılıq bacarığı, bilik və təcrübəsi ilə nüfuz qazanmışdır. 1970-1980-ci illərdə respublikamızın və keçmiş İttifaqın qabaqcıl müəssisələrindən olan Gəmi təmiri zavodunun direktoru olmuşdur.

Mənalı və şərəfli həyat yolu keçən S.M.Salmanov 1980-1989-cu illərdə “Xəzərdənizneftqaz” İstehsalat Birliyi Baş direktorunun müavini, SOCAR-da idarə rəisi olmuşdur. Azərbaycan və SSRİ-dən kənarda da dünya səviyyəli neftçilər kimi tanınmış Süleyman Vəzirov, Sənan Əlizadə, Xoşbəxt Yusifzadə, Qurban Abbasovla birlikdə çalışmışdır. S.M.Salmanov neft sənayesi sahəsində məhsuldar fəaliyyət göstərmiş, ölkə əhəmiyyətli mühüm vəzifələrin həllində yaxından iştirak etmişdir. Bütün həyatını Azərbaycan neft sənayesinin inkişafına həsr etmiş Söhrab Salmanov özünü yüksək səviyyəli mütəxəssis, bacarıqlı rəhbər kimi göstərmişdir. Neft-qaz, tikinti, digər istehsalat sahələrinin maddi-texniki təchizatının təşkili, dəniz neft donanmasının maddi-texniki bazasının gücləndirilməsi, nəqliyyat vasitələrinin istismarında səmərəliliyin artırılması və neftçilərin sosial məsələlərinin həllində onun böyük rolu olmuşdur. S.M.Salmanov yorulmaz fəaliyyəti, çalışdığı sahədə peşəkarlığı ilə daim diqqət mərkəzində olmuş, əməyi yüksək qiymətləndirilmiş, xeyli orden və medallara, Azərbaycan Respublikası Ali Soveti Rəyasət Heyətinin Fəxri Fərmanı və “Azərbaycan SSR neft və qaz sənayesinin əməkdar işçisi” fəxri adına layiq görülmüşdür.

Ümummilli lider Heydər Əliyev ona yüksək etimad göstərərək 26 yanvar 1994-cü il tarixli 52 nömrəli Sərəncamı ilə Söhrab Məhəmməd oğlu Salmanovu Azərbaycan Respublikası Dövlət Neft Şirkətinin maddi-texniki təchizat, nəqliyyat və sosial inkişaf üzrə vitse-prezidenti təyin etmişdi. O, təqaüdə çıxanadək bu vəzifədə çalışmışdı. S.Salmanovun ölkə parlamentində, xarici dövlətlərdə, KİV-də təmkinli, məntiqli çıxışları, mətbuat işçiləri ilə keçirdiyi çoxsaylı görüşləri yaddaşlardadır.

Təqaüdə çıxandan sonra da “Azəri Mİ Drillinq Fluids” şirkətində baş məsləhətçi-müşavir vəzifəsində bilik və təcrübəsini daim gənc mütəxəssislərlə bölüşmüşdür.

Azərbaycan Prezidenti İlham Əliyev 2011-ci il 27 dekabr tarixli Sərəncamı ilə ölkənin neft və qaz sənayesi sahəsində səmərəli fəaliyyətinə görə Söhrab Salmanovu "Şöhrət" ordeni ilə təltif etmişdir.

70 illik yubileyi münasibətilə SOCAR-ın prezidenti Rövnəq Abdullayev dövlət rəhbərimizin tapşırığı ilə S.Salmanova bu yüksək mükafatı təqdim edərkən onun ümummilli lider Heydər Əliyevin işləyib hazırladğı, Prezident İlham Əliyevin müasir reallıqlara uyğun bacarıqla reallaşdırdığı dövlət neft strategiyasının yerinə yetirilməsində səmərəli fəaliyyətindən danışaraq, bütün neft-qaz sənayesi işçiləri adından onu səmimi qəlbdən təbrik edərək ən xoş arzularını çatdırmışdı.

S.Salmanov həmin görüşdə yüksək dövlət mükafatına layiq görüldüyü üçün Prezident İlham Əliyevə dərin minnətdarlığını bildirərək demişdi: - “Əsası ulu öndər Heydər Əliyev tərəfindən qoyulmuş və bu gün də dövlətimizin müdrik rəhbəri İlham Əliyevin başçılığı ilə uğurla davam etdirilən Azərbaycanın neft strategiyasının qələbələri uğrunda çalışmaqdan, bu şərəfli işin reallaşmasına töhfə verməkdən qürur duyuram. Vətənimizin iqtisadi qüdrətinin durmadan artırılması, respublikamızın çiçəklənməsi naminə yorulmaz fəaliyyətində dövlətimizin başçısına daha böyük nailiyyətlər arzulayıram. Dövlət Neft Şirkəti mənim üçün çox əzizdir, orada olduqca yüksək peşəkarlar çalışır, bütün mənalı ömrümü burada keçirməkdən qürur duyuram. Bu gün ARDNŞ istər ölkə daxilində, istərsə də xaricdə regional və beynəlxalq əhəmiyyətli nəhəng layihələr həyata keçirir. Mən təqaüddə olsam da, şirkətimizin fəaliyyətini yaxından izləyir, onun hər bir uğuruna sevinirəm. Bu uğurların daha da genişlənməsi naminə şirkətin rəhbərliyinə və onun çoxminli kollektivinə yeni-yeni əmək nailiyyətləri diləyirəm.”

2020-ci ilin 44 günlük qalibiyyətli Vətən müharibəsində Müzəffər Ali Baş Komandan İlham Əliyevin rəhbərliyi ilə Qarabağ torpaqlarının azad edilməsinə ən çox sevinənlərdən biri Söhrab müəllim olmuşdu. Vətənsevər insan bu sevincini çoxsaylı Qarabağlı, Şərqi Zəngəzurlu qohumları ilə bölüşməkdən, onlara gözaydınlığı verməkdən yorulmurdu.

S.Salmanov bu il avqustun 27-də 80 illik yubileyinə az qalmış vəfat etmişdir.

Zəngin təcrübəyə, yüksək təşkilatçılıq bacarığına və insani keyfiyyətlərə malik rəhbər işçi, peşəsinin vurğunu kimi neftçilərin dərin rəğbətini qazanmış Söhrab Salmanovun əziz xatirəsi bütün neft-qaz sənayesi işçilərinin və onu tanıyanların qəlbində daim yaşayır.

Zamin Məmmədov

İki sahil.- 2021.- 31 dekabr.- S.26.