Ulu öndər Heydər Əliyevin xilaskarlıq missiyası rənglərin dili ilə

Rəssam Məlik Məmmədxanovun Milli Qurtuluş Gününə həsr olunmuş fərdi sərgisində müəllifin Türkiyə-Azərbaycan qardaşlığını əks etdirən tablosunun təqdimatı keçirildi

Müstəqilliyimizin əbədiləşdirildiyi 15 İyun-Milli Qurtuluş Günü respublikamızda böyük təntənə ilə qeyd olunur. Xalqımızın xilaskarı , ulu öndər Heydər Əliyevin Azərbaycanda hakimiyyətə qayıdışı ilə əlamətdar olan həmin gün keçirilən bütün tədbrlərdə qeyd olunduğu kimi, AXC-Müsavat iqtidarının səbatsızlığı üzündən respublikada yaranan çətin vəziyyəti aradan qaldırmaqla xilaskarlıq missiyasını yerinə yetirən ulu öndər Heydər Əliyev müstəqilliyimizi əbədiləşdirməklə, respublikanı iqtisadi böhrandan çıxardı, genişmiqyaslı , uzun illər üçün nəzərdə tutulan inkişaf konsepsiyasını müəyyənləşdirdi, xalqımızda milli təfəkkürü formalaşdırdı, azərbaycançılıq ideyasını təkmilləşdirdi,

Ulu Öndərə ümumxalq məhəbbətini rənglərin dili ilə bildirən rəssam Məlik Məmmədxanovun 15 İyun- Milli Qurtuluş Gününə həsr olunmuş fərdi sərgisində nümayiş etdirilən əsərlərin hər birində dahi şəxsiyyət Heydər Əliyevin tarixi xidmətlərinin yaddaqalan məqamları əks olunub. Xilaskarımızın siyasi fəaliyyətinin, milli-mənəvi dəyərlərimizə göstərdiyi diqqət və qayğının əks olunduğu və tədbir iştirakçılarında xoş təəssürat yaradan əsərlərdə əsası ulu öndərlər Mustafa Kamal Atatürk və Heydər Əliyev tərəfindən qoyulan həmrəyliyi əks etdirən tablolar ən çox diqqəti cəlb edən əsərlərdən idi.

Rəssam Elnurə və Aygün İsgəndərovaların layihəsi olan və YAP Yasamal rayon təşkilatının dəstəyi ilə keçirilən tədbirdə qeyd olundu ki, hər il Milli Qurtuluş Günü ərəfəsində belə fərdi sərgilərin təşkilinin ənənəvi hal alması mədəniyyətin inkişafına qayğı göstərən Ulu Öndərə incəsənət nümayəndələrinin ehtiramı və hörmətidir.

Sərgini giriş sözü ilə açan Elnurə İsgəndərovanın vurğuladığı kimi burada nümayiş etdirilən 30-a yaxın əsərdə ümummilli lider Heydər Əliyevin dühası, əzəməti hiss olunur:

- İstedadlı rəssam Məlik Məmmədxanovun «Zəfərin mübarək, Azərbaycan» adlı sərgisi ikiqat əlamətdardır. 44 gün davam edən İkinci Qarabağ müharibəsindən sonra daha böyük təntənə ilə qeyd olunan Milli Qurtuluş Günü xüsusilə əlamətdardır. Müəllifin Azərbaycan- Türkiyə həmrəyliyini əks etdirən tablosu ilk dəfə tamaşaçılara təqdim olunur. Prezident İlham Əliyevin və Türkiyənin Prezidenti Rəcəb Tayyib Ərdoğanın qoşa çəkilmiş tablosu əsl mənada qardaşlığın əbədiyyət rəmzidir.

Fərdi sərginin müəllifi Məlik Məmmədxanov əsərləri haqqında məlumat verərək bildirdi ki, Ulu Öndərin dahiliyini, Vətən müharibəsindəki Qələbəmizi, Milli Ordumuzun Zəfərini rənglərin dili ilə tamaşaçılara çatdırdığım üçün özümü xoşbəxt sayıram: « Bundan sonra yaradıcılığımın əsas motivləri işğaldan azad olunmuş ərazilərimizdə aparılan quruculuq, abadlıq işləri olacaq, cənnətməkan Qarabağımızın gözəlliklərini tamaşaçılara çatdıracağam.

Sərgi, Məlik Məmmədxanovun yaradıcılığ ilə bağlı təəssüratlarını bölüşənlər arasında ölkəmizdə fəaliyyət göstərən diplomatik korpus təmsilçilərinin, hərbçilərin, incəsənət nümayəndələrinin, təhsil işçilərinin, müxtəlif yaş qruplarından olan tamaşaçıların iştirakı müəllifin geniş təfəkkür və hazırlığı ilə bağlıdır.

Şimali Kipr Türk Cümhuriyyətinin ölkəmizdəki nümayəndəliyinin rəhbəri Növber Ferit Vechi Türkiyə- Azərbaycan dostluğunu əks etdirən əsərlərdən məmnunluğunu, Meksikanın Azərbaycandakı səfiri Xuan Rodriqo Lubardini Flores bütün xalqların bir ailə kimi yaşadığı respublikamız haqqında xoş təəssüratlarını bildirdilər.

Milli Qurtuluş Günü münasibətilə tədbir iştirakçılarını təbrik edən «İki sahil» qəzetinin baş redaktoru Vüqar Rəhimzadənin vurğuladığı kimi, müasir Azərbaycan tarixinə parlaq səhifə kimi yazılan 15 İyun tarixi, eyni zamanda xalqımızın özünəqayıdışının, varlığının təsdiqi günüdür: «Azərbaycan Prezidenti, Ali Baş Komandan İlham Əliyevin rəhbərliyi ilə Milli Ordumuzun qazandığı Zəfər də xilaskarımız Heydər Əliyevin müəyyənləşdirdiyi, dövlət başçımızın uğurla davam etdirdiyi siyasətin Qələbəsidir.»

Sərgi haqqında təəssüratlarını bölüşənlər müəllifə bundan sonra da böyük yaradıcılıq uğurları arzuladılar. Sonda Məlik Məmmədxonova diplom təqdim olundu.

Daha sonra YAP Yasamal rayon təşkilatının sədri Tağı Əhmədov diplomatik nümayəndələri qəbul edib.

Xuraman İsmayılqızı

İki sahil.- 2021.- 12 iyun.- S.11.