Bakı Ali Neft Məktəbi ilə Pakistan universitetləri arasında əməkdaşlıq məsələləri müzakirə olunub

Bakı Ali Neft Məktəbinin (BANM) rektoru Elmar Qasımov Pakistan İslam Respublikasının Azərbaycandakı səfiri Bilal Haye ilə görüşüb.

Bu barədə AZƏRTAC-a BANM-dən məlumat verilib. Görüş zamanı Elmar Qasımov Azərbaycanın haqlı mövqeyinin hər zaman Pakistan tərəfindən dəstəkləndiyini, Vətən müharibəsində Pakistanın Azərbaycanın yanında olduğunu vurğulayıb.

Rektor ölkələrimiz arasında mədəni, iqtisadi, təhsil sahələrində əlaqələrin genişləndirilməsi üçün böyük potensial olduğunu diqqətə çatdırıb və bu istiqamətdə görülən işlərdən söz açıb. İki ölkə arasında mövcud əlaqələrdən bəhs edən Elmar Qasımov təhsil sahəsində əməkdaşlığın vacibliyini xüsusi olaraq qeyd edib. Rektor iki pakistanlı gəncə BANM-in təqaüdünün verilməsini təklif edərək, növbəti tədris ilindən etibarən həmin tələbələrin bu ali məktəbdə təhsil ala biləcəklərini bildirib.

Görüş zamanı Pakistanın ölkəmizdəki səfiri Bilal Haye səmimi qəbula görə rektora təşəkkürünü bildirib. Müzəffər Ali Baş Komandan İlham Əliyevin rəhbərliyi ilə Vətən müharibəsində qazanılmış şanlı zəfər ərəfəsində Azərbaycanda səfir kimi fəaliyyət göstərməyə başlamasından məmnunluğunu ifadə edib.

“Azərbaycanın çətin günlərində Pakistan əsl dost və qardaş ölkə olduğunu bir daha təsdiqlədi və biz bununla qürur duyuruq. İki ölkə arasında münasibətlər gündən-günə inkişaf edir və biz təhsil sahəsində də əməkdaşlığın daha da genişləndirilməsinin tərəfdarıyıq. Tədrisin keyfiyyətinə, nüfuzuna və reytinq göstəricilərinə, üstəlik yüksək ballı, rəqabətə davamlı tələbələrin sayına görə öndə olan Bakı Ali Neft Məktəbi ilə birgə mütəxəssis hazırlığına məmnun olarıq. Pakistanda 30-dan çox mühəndislik üzrə ali təhsil müəssisəsi fəaliyyət göstərir. Sizin ali məktəbdəki maddi-texniki təminat, tədris mühiti, əməkdaşların peşəkarlığı məni heyran etdi. BANM-in qısa müddətdə əldə etdiyi uğurları yüksək qiymətləndirirəm”, – deyə səfir qeyd edib.

Səfir iki ölkə arasında təhsil əlaqələrinin genişləndirilməsi istiqamətində səylə çalışdıqlarını bildirərək təqaüd təklifinin dəyərləndiriləcəyini qeyd edib.

Görüşdə Bakı Ali Neft Məktəbi ilə Pakistan universitetləri arasında təcrübə mübadiləsi, tədqiqat işləri üzrə əməkdaşlıq, birgə təlimlərin təşkili, Pakistan Mühəndislik Şurasına akkreditasiya məsələləri də müzakirə olunub.

İki sahil.- 2021.-12 mart.- S.11.