Naxçıvan bizim əziz diyarımızdır, Heydər Əliyevin Vətənidir - Prezident İlham Əliyev

«Hesab edirəm ki, bu səfərin çox böyük rəmzi mənası var. Qeyd etdiyim kimi mən 15-ci dəfədir ki, Naxçıvana gəlirəm. Amma ilk dəfə mayın 10-da Naxçıvandayam. Bu doğum günündə mütləq burada olmalıydım”» söyləyən dövlət başçımızın səfər çərçivəsində açılışında iştirak etdiyi obyektlərin hər biri Ulu Öndərin ad gününə töhfə idi

Prezident İlham Əliyevin Naxçıvan Muxtar Respublikasına on beşinci səfəri tarixiliyi baxımından ata-baba yurduna əvvəlki gedişlərindən fərqləndi. Tarixi İpək Yolunun üstündə yerləşən, geostrateji əhəmiyyətə malik, türk dünyasının birliyi və həmrəyliyində oynadığı rolu ilə fərqlənən bu qədim diyar inkişafının intibah dövrünü yaşayır. Dahi şəxsiyyət Heydər Əliyevin Naxçıvanın təhlükəsizliyinin qorunması naminə göstərdiyi fədakarlığı davam etdirən Prezident İlham Əliyevin Ulu Öndərin doğum günündə Naxçıvana səfəri , muxtar respublikanın iqtisadiyyatı üçün mühüm əhəmiyyətə malik bir sıra obyektlərin açılışında iştirakı da təsadüfi deyil. Prezident İlham Əliyevin Ermənistan üzərində tarixi Qələbəmizdən sonra söylədiyi «Mən bu gün ulu öndər Heydər Əliyevin məzarını ziyarət etdim, onun ruhu qarşısında baş əydim. Ürəyimdə dedim, xoşbəxt adamam ki, ata vəsiyyətini yerinə yetirdim. Şuşanı azad etdik! Bu, böyük Qələbədir! Bu gün şəhidlərimizin, Ulu Öndərin ruhu şaddır! Gözün aydın olsun Azərbaycan! Gözünüz aydın olsun dünya azərbaycanlıları!» sözlərinin davamı olan «Tarixi Zəfərdən sonra bu, atamın birinci doğum günüdür. Ona görə mən hesab etdim ki, ənənəvi olaraq onun məzarını ziyarət edəndən sonra onun Vətəninə – Naxçıvana gəlim. Hesab edirəm ki, bu səfərin çox böyük rəmzi mənası var. Qeyd etdiyim kimi, mən 15-ci dəfədir ki, Naxçıvana gəlirəm. Amma ilk dəfə mayın 10-da Naxçıvandayam. Bu doğum günündə mütləq burada olmalıydım”» söyləyən dövlət başçımızın səfər çərçivəsində açılışında iştirak etdiyi obyektlərin hər biri Ulu Öndərin ad gününə töhfə idi.

Prezident İlham Əliyevin «Bu gün burada olmağımın xüsusi rəmzi mənası var. Naxçıvan bizim əziz diyarımızdır, Heydər Əliyevin Vətənidir. Hər bir azərbaycanlı üçün əziz, doğma diyardır və Naxçıvanın inkişafı, çiçəklənməsi artıq reallıqdır. Bu reallığı biz özümüz yaratmışıq. Bu gün Ulu Öndərin xatirəsinə göstərilən ən böyük diqqət məhz özünü, bax, bu inkişafda təcəssüm etdirir» sözləri Ulu Öndərin Naxçıvandan başlanan islahatlar siyasətinin uğurlu davamının təsdiqidir.

Doğma torpağa bağlı olan naxçıvanlıların gərgin əməyi sayəsində ildən-ilə gözəlləşən, yenidən qurulan, müasirləşən muxtar respublikada insanların həyat səviyyəsi də yüksəlir. Dövlət başçımızın muxtar respublikaya səfəri çərçivəsində Naxçıvan Beynəlxalq Hava Limanının yeni uçuş-enmə zolağının təqdimatı, Əlahiddə Ümumqoşun Ordunun hərbi aerodromunun açılışı, «ASAN xidmət”» mərkəzinin binasının tikintisi, «Azərxalça»” ASC-nin Naxçıvan filialının, Süni Mayalanma Mərkəzinin və Naxçıvan Qarnizonu Mərkəzi Hospitalının, Culfa-Ordubad magistral avtomobil yolunun istifadəyə verilməsi ilə muxtar respublikanın iqtisadiyyatı daha da güclənəcək. Dövlət başçımızın Ordubad Su Elektrik Stansiyasının tikintisi, dəmir yolu stansiyasında aparılan yenidənqurma işləri ilə maraqlanması, Ordubad rayon mərkəzi və ətraf kəndlərinin içməli su təchizatı və kanalizasiya sistemlərinin yenidən qurulması” layihəsinin açılışında iştirakı bu qədim diyarda son illərdə aparılan kompleks quruculuq işlərinə artan diqqətin ifadəsidir.

Prezident İlham Əliyevin «Naxçıvan sürətlə inkişaf edir. Bütün sahələr üzrə işlər müsbət istiqamətdə gedir. Bu gün bir neçə infrastruktur layihəsinin açılışında iştirak etmişəm, o cümlədən Ordubad şəhərində içməli su və kanalizasiya layihəsinin istifadəyə verilməsini qeyd etmişik. Yollarla, elektrik təchizatı, qazlaşdırma ilə bağlı – bütün istiqamətlər üzrə muxtar respublikada görülən işlər məni çox sevindirir. Təkcə onu demək kifayətdir ki, qazlaşdırmanın səviyyəsi artıq 100 faizə çatıb. Elektrik enerjisi ilə təchizat 100 faizə çatıb və Naxçıvanda çox böyük enerji potensialı yaradılıb. Vaxtilə Naxçıvanda işıq yox idi, enerji yox idi. Azərbaycandan gələn xətlər də Ermənistan tərəfindən kəsilmişdi. İndi isə Naxçıvan özünü elektrik enerjisi ilə tam təmin edir və bərpaolunan mənbədən istifadə edir. Bu, çox önəmlidir. Çünki bu, Naxçıvanın gözəl təbiətinə və ekoloji vəziyyətinə töhfə kimi qəbul edilməlidir» sözləri muxtar respublikanın inkişafına verdiyi qiymətdir.

Muxtar respublikada yol-nəqliyyat infrastrukturuna göstərilən diqqət sayəsində ən ucqar kəndlərə belə rahat yolların çəkilişi, magistral yolların ən müasir səviyyədə təmir və bərpa olunması insanların

həyat şəraitini yaxşılaşdırmaqla, azad rəqabətin, investisiya mühitinin sağlamlaşdırılmasına, sahibkarlığın inkişafına göstərilən dəstəkdir. Muxtar respublikada fəaliyyət göstərən müəssisələrdə 127 növdə, 608 çeşiddə ərzaq, 257 növdə, 925 çeşiddə qeyri-ərzaq olmaqla, ümumilikdə 384 növdə, 1533 çeşiddə məhsul istehsal olunur. 108 növdə ərzaq, 242 növdə qeyri-ərzaq olmaqla, 350 növdə məhsula olan tələbatın tamamilə yerli istehsal hesabına ödənilməsi idxaldan asılılığın ciddi şəkildə azaldılmasına, əhalinin tələbatının keyfiyyətli məhsullarla ödənilməsinə şərait yaradıb. Sahibkarlığın inkişafına göstərilən diqqətin nəticəsidir ki, son illərdə 1529 layihə dövlət tərəfindən maliyyələşdirilib, iş adamlarına 169 milyon manatdan çox güzəştli kreditlər ayrılıb. Muxtar respublikada sürətlə artan ümumi daxili məhsul istehsalında sahibkarlıq subyektlərinin 88 faizi təşkil etməsi, istehsal proseslərində müasir texnologiyaların tətbiqi məhsuldarlığın keyfiyyətini də yüksəldir. Muxtar respublikada fəaliyyət göstərən 40-a yaxın ixrac potensiallı müəssisədə hazırlanan ekolji baxımdan daha keyfiyyətli məhsulların ABŞ, Çin, BƏƏ, Rusiya, Türkiyə, İran, Ukrayna, Qazaxıstan, Türkmənistan kimi ölkələrə göndərilməsi muxtar respublikanın xarici ticarət əlaqələrinin coğrafiyasını da genişləndirib. Ümumi daxili məhsul istehsalı 10 dəfədən çox artan muxtar respublikada sənayenin inkişafı, eyni zamanda yeni iş yerlərinin açılması deməkdir. Süni Mayalanma Mərkəzinin açılması ilə aqrar sektorun inkişaf etdiyi Naxçıvanda əhalinin süd və süd məhsulları ilə təchizatında heç bir problem qalmayacaq. Sosial siyasət və pensiya təminatı sahələrində növbəti uğurlu addım milli brendimiz olan «ASAN xidmət» və DOST layihələrinin muxtar respublikada da tətbiqidir. Böyük turizm potensialına malik Naxçıvan aeroportunda yeni uçuş-enmə zolağının açılışı bu sahənin inkişafı üçün yeni imkanlar yaradacaq. İşğalçı Ermənistanın sahib olmaq istədiyi Naxçıvanın təhlükəsizlinin təminatı istiqamətində görülən işləri müsahibəsində diqqətə çatdıran Prezident İlham Əliyevin vurğuladığı kimi, Azərbaycanın Şərqə açılan qapısı olan Naxçıvanın müdafiə potensialının möhkəmlənməsi hər zaman diqqətdə saxlanılıb: «Əlbəttə ki, Naxçıvan Ümumqoşun Əlahiddə Ordunun döyüş qabiliyyəti də yerindədir və uğurlu Günnüt əməliyyatı - üç il bundan əvvəl keçirilmiş əməliyyat bunun bariz nümunəsidir. O əməliyyat Ermənistanda hakimiyyət dəyişikliyinə təsadüf etdi, ona görə, hakimiyyətə gəlmiş yeni iqtidar bunu bir növ ört-basdır etməyə çalışdı. Biz də heç üstünü vurmadıq. Çünki bizə hansısa təbliğat yox, real iş lazımdır. Biz çox önəmli strateji yüksəklikləri Ermənistan ordusundan təmizlədik, o yüksəklikləri əldə etdik. Bu yüksəkliklər imkan verdi ki, biz artıq strateji kommunikasiyalara tam nəzarət edirik və Ermənistandan Dağlıq Qarabağa gedən yola da nəzarət edirik.» Günnüt əməliyyatı Naxçıvan Ümumqoşun Əlahiddə Ordunun potensialını göstərdi. İkinci Qarabağ müharibəsində böyük təcrübəyə malik Naxçıvan hərbçiləri, xüsusi təyinatlılar fədakarlıq göstərmiş və şəhidlər vermişlər,

Azərbaycanın ən inkişaf etmiş bölgələrindən olan Naxçıvanın liderliyini bundan sonra da saxlayacağını Azərbaycan Televiziyasına müsahibəsində bildirən Prezident İlham Əliyevin vurğuladığı kimi, Zəngəzur dəhlizinin açılması muxtar respublikanın inkişafına daha böyük töhfələr verəcək. Ötən il noyabrın 10-da imzalanmış üçtərəfli birgə Bəyanata Zəngəzur dəhlizi ilə bağlı bəndin salınması Azərbaycanın siyasi , iqtisadi uğuru olmaqla, muxtar respublikanın Avropaya açılan qapı statusunu gerçəkləşdirir, türk dünyasının birlik və həmrəyliyinə etibarlı zəmin yaradır. Zəngilan-Ordubad dəmir yolu xətti və bütövlükdə, Zəngəzur dəhlizinin açılması artıq reallıqdır. Bu yolun açılması Ermənistanın revanşist əhval-ruhiyyəli qüvvələrinin sərsəm ideyalarının sonu olmaqla, Azərbaycanın «dəmir yumruğ”u»nun güc və qüdrətinin də ifadəsidir. Müsahibəsində regional əhəmiyyətli və türk dünyasının birliyini təmin edəcək və Azərbaycan üçün mühüm əhəmiyyətə malik Zəngəzur dəhlizi ilə bağlı fikirlərini açıqlayan Prezident İlham Əliyevin «Mən təsadüfən Ordubad dəmir yolu stansiyası ilə tanışlığa gəlməmişəm. Çünki bunun da çox böyük rəmzi mənası var. Bu yaxınlarda buradan təqribən 50-60 kilometr uzaqlıqda yerləşən Mincivan qəsəbəsinin ermənilər tərəfindən dağıdılmış dəmir yolu stansiyasında baxış keçirdim. Orada dəmir yolu mövcud deyil. Mənfur düşmən bütün dəmir yolu infrastrukturunu dağıdıbdır, talan edibdir. Orada bir mərkəz olacaq, burada bir mərkəz olacaq. Zəngilanı Naxçıvanla ayıran cəmi 40 kilometrlik Zəngəzur dəhlizidir, hansı ki, açılmalıdır və açılacaqdır» sözləri Ermənistana daha ciddi xəbərdarlıqdır.

Müzəffər Ordumuzun Ali Baş Komandanı kimi Dağlıq Qarabağ münaqişəsinin artıq həll olunduğunu, Fransa və Kanadanın Xarici İşlər Nazirliklərinin Azərbaycanın daxili işlərinə qarışmasına qəti etirazını bildirən Prezident İlham Əliyevin «Gedin, öz işlərinizlə məşğul olun» xəbərdarlığı, « Orada bir muxtariyyət versin, ya müstəqillik versin. Amma Azərbaycanda yox. Azərbaycanda bu, olmayacaq. Kim nə deyirsə desin. Ona görə məsləhət görürəm ki, bizi əsəbiləşdirməmək və münasibətlərimizi gərginləşdirməmək üçün nə status haqqında, nə münaqişə haqqında hər hansı bir açıqlama verilməsin. Veriləcəksə, cavablarını alacaqlar» sözləri revanşist düşüncələrə birdəfəlik son qoyur: «Onlar bizim yumruğumuzu görüblər. Bu yumruq yerindədir. Heç kim bizim qabağımızda dura bilməz. Əgər biz zərrə qədər təhlükə görsək, - zərrə qədər, - onları dərhal məhv edəcəyik. Elə yerindəcə məhv edəcəyik. Onlar da bunu bilirlər. Gücümüz də var, iradəmiz də var, cəsarətimiz də var.»

Bu sözləri ilə daşnak ideologiyasının «Naxçıvan siyasəti»nə əbədilik son qoyan Prezident cənab İlham Əliyevin muxtar respublikadan ermənipərəst qüvvələrə ünvanlanan mesajları qüdrətli dövlət başçısının, Ali Baş Komandanın siyasi iradəsinin, qətiyyətinin, erməni faşizmi üzərində Qələbəsinin əbədiyyət rəmzidir.

Xuraman İsmayılqızı

İki sahil.- 2021.- 19 may.- S.4.