Qələbəmizin rəhni: Güclü

iqtisadiyyat, qüdrətli ordu

Qırx dörd gün davam edən və 2020-ci il noyabrın 10-da başa çatan Vətən müharibəmiz xalqımızın 30 ilə yaxın davam edən torpaq həsrətinə son qoymaqla yanaşı, Azərbaycanda illərdir güclü dövlət quruculuğu istiqamətində aparılan strategiyanın və müəyyən hədəflərə hesablanmış ağıllı siyasətin məntiqi nəticəsi oldu.

Birinci Qarabağ müharibəsindən ağır itkilərlə çıxan Azərbaycanda ötən 27 il ərzində güclü dövlət quruculuğu həyata keçirildi. Bu da təbiidir. Birinci Qarabağ müharibəsindəki məğlubiyyətin əsas səbəblərindən biri orduda vahid komandanlığın olmaması idisə, digəri isə ölkədə mövcud olan özbaşınalıq səbəbindən iqtisadi inkişaf üçün heç bir əsaslı addımın atılmaması idi. Yəni, heç bir dövlətçilik anlayışı olmayan təsadüfi şəxslərin hakimiyyətə gəlmələrinin acı nəticəsi olaraq torpaqlarımızın 20 faizi işğal edildi, ölkə isə məhv olmaq təhlükəsi ilə üz-üzə qaldı. Xalqın təkidli tələbi ilə hakimiyyətə gələn ulu öndər Heydər Əliyev isə məhz “İqtisadiyyatı güclü olan dövlət hər şeyə qadirdir” prinsipi əsasında dövləti əsaslı şəkildə yenidən qurmağa başladı. Müharibədən yenicə çıxmış bir ölkənin 1994-cü ildə - atəşkəsin əldə olunmasından bir neçə ay sonra “Əsrin müqaviləsi” kimi önəmli bir sazişin imzalanmasına nail olması təbii ki, Azərbaycanın qüdrətli dövlətə çevrilməsi yolunda atılan ən önəmli addım idi. Bununla yanaşı, Ermənistan istisna olmaqla bütün qonşu ölkələrlə, digər xarici dövlətlərlə və təsisatlarla qarşılıqlı iqtisadi maraqlara əsaslanan əməkdaşlıq əlaqələri quruldu ki, bu da zamanla ölkəmizin siyasi maraqlarının beynəlxalq miqyasda təmin olunmasında mühüm rola malik oldu. Beləliklə, Ermənistanın iqtisadi blokadasının və gələcək hərbi məğlubiyyətinin təməli elə birinci Qarabağ müharibəsindən dərhal sonra qoyulmuş oldu.

Əgər 1993-2003-cü illər Azərbaycanın güclü dövlət qurmaq yoluna ilk addımları kimi qiymətləndirilirsə, sonrakı 17 il ərzində ölkəmiz Prezident İlham Əliyevin rəhbərliyi ilə beynəlxalq münasibətlər sisteminin fəal aktorlarından birinə çevrildi. Azərbaycanın bir başa təşəbbüsü və iştirakı ilə həyata keçirilən neft, qaz və nəqliyyat layihələri nəinki ölkəmizin, həmçinin regionun iqtisadi qüdrətini artırdı, buna paralel olaraq isə bütün bu fürsətlərdən kənarda qalmış Ermənistanın iqtisadi blokadasını daha da gücləndirdi və işğalçı ölkənin onsuz da məhdud olan iqtisadi imkanlarının üzərindən tamamilə xətt çəkmiş oldu.

Təbii ki, artan iqtisadi imkanlar artıq ordu quruculuğuna daha böyük vəsaitlərin ayrılmasına, hərbi arsenalımızın ən müasir texnikalarla təchiz edilməsinə böyük imkanlar açırdı. Ötən illər ərzində məhz hərbi məqsədlər üçün hər il əvvəlkilərdən daha böyük məbləğlərdə vəsaitlər ayrıldı, bir çox hallarda Silahlı Qüvvələrimizə ayrılmış xərclər Ermənistanın bütün dövlət büdcəsindən təxminən 2 dəfə çox olurdu. Bununla yanaşı, peşəkar hərbçilərin hazırlanması istiqamətində də böyük işlər görüldü. Hərbçilərin beynəlxalq təlim və kurslarda iştirakları təmin edildi, vətənpərvərlik ruhu ən yüksək səviyyədə təbliğ olundu. Ən önəmlisi isə Azərbaycan Ordusu dünyanın ən güclü 50 ordusundan birinə çevrildi. Beləliklə, iqtisadiyyatı güclü olan dövlət bir neçə il ərzində işğal olunmuş ərazilərini cəmi 44 gün müddətində azad etməyə qadir oldu.

"Biz iqtisadiyyatı gücləndirməli idik və yaxşı başa düşürdük ki, buna nail olmasaq biz düşməni torpaqlarımızdan qova bilməyəcəyik." Bu sözləri Azərbaycan Prezidenti, Silahlı Qüvvələrin Ali Baş Komandanı İlham Əliyev noyabrın 8-də Şuşada hərbçilər qarşısında çıxış edərkən deyib. Dövlət başçısı vurğulayıb: "İlk növbədə iqtisadi müstəqillik təmin edilməli idi. Çünki əgər biz asılı vəziyyətdə olsaydıq, hansısa başqa böyük dövlətlərdən asılı olsaydıq, heç vaxt bizə imkan verməzdilər ki, biz bu şərəfli missiyanı yerinə yetirək. Ona görə Prezident kimi ilk günlərdən iqtisadi müstəqilliyə hesablanmış bütün lazımi addımlar atıldı və qısa müddət ərzində biz buna nail olduq. Bu gün dünya miqyasında iqtisadi potensial baxımından və iqtisadi sabitlik baxımından Azərbaycan birinci sıralardadır".

Artıq Ermənistan başa düşür ki, Azərbaycanla hesablaşmaqdan başqa yolu qalmayıb. Ermənistan rəhbərliyi də etiraf edir ki, onlar illər ərzində bütün sahələrdə, xüsusilə də iqtisadi sahədə Azərbaycandan qat-qat geridə qalmışdılar. Güclü iqtisadiyyatı, qüdrətli Ordusu sayəsində Azərbaycanın qazandığı Qələbə ilə “Dağlıq Qarabağ münaqişəsi” ifadəsi artıq tarixə qovuşub.

Sevinc Azadi

İki sahil.- 2021.- 12 noyabr.- S.16.