Zəfərlə zinətlənmiş şanlı ildönümü

SSRİ-nin süqutundan sonra fürsətdən istifadə edərək hakimiyyətə yiyələnmək uğrunda öz aralarında daxili çarpışmaya qalxan üzdəniraq siyasətbazların bəd və son dərəcə təhlükəli əməlləri illər boyu ölkəmizə qarşı ərazi iddiası ilə alışıb-yanan, “böyük Ermənistan” dövləti yaratmaq kimi iyrənc xülyaya düşən bədnam qonşumuz Ermənistanın, həmçinin ərazimizdə yuva salmış seperatçı silahlı erməni birləşmələrinin fəallaşmasına səbəb oldu. Azərbaycanın dövlət müstəqilliyi təhlükə ilə üz-üzə qalmışdı.

Nəhayət, 1993-cü ilin iyun ayında daxili çarpışma və vətəndaş müharibəsi həddinə çatmış ölkəmizin taleyi çoxmilyonlu xalqımızın təkidli tələbi ilə Ulu Öndərə etibar edildi. İdarəçiliyi kökündən qopmuş Azərbaycan məhz Ümummilli Liderini müdrik, uzaqgörən siyasəti, zəngin idarəetmə bacarığı sayəsində getdikcə qəddini düzəltməyə başladı. İlk öncə cəmiyyətdə hökm sürən iqtisadi-siyasi, mənəvi-psixioloji gərginliyi aradan qaldıran Ulu Öndər dövlət və ordu quruculuğunun gücləndirilməsinin zəruriliyini şərtləndirdi. Eyni zamanda, ölkə daxilində möhkəm və etibarlı sabitliyin yaradılması, demokratik islahatlar prosesinə başlandı. Bütün qanunvericilik və idarəetmə strukturlarında ədalət pirnsipinə söykənən demokratik islahatlar vüsət aldı. Ədliyyə, məhkəmə, prokurorluq, həmin qurumların tərkib hissəsi olan notariat, vətəndaşlıq vəziyyətinin qeydə alınması orqanlarının maddi-texniki bazaları möhkəmləndirilməklə, insan hüquq və azadlıqlarının etibarlı qorunması və müdafiəsi məqsədi ilə yeni qanunvericilik aktları qəbul edildi.

Ulu Öndərin beynəlxalq müstəvidə nüfuzunun getdikcə yüksəlməsi dünyanın bir sıra ölkələrinin Azərbaycana marağını artırdı. Bu islahatların ilkin nəticəsi olaraq 1994-cü ilin sentyabrında məhz Heydər Əliyevin müəllifi olduğu nəhəng neft müqaviləsi- «Əsrin müqaviləsi» imzalandı. Bununla da Azərbaycan son dövlətçilik tarixində ilk dəfə olaraq öz sərvətlərinin əsl sahibi kimi çıxış etdi.

Ölkəmizin müstəqilliyini və ərazi bütövlüyünü təmin etmək, qüdrətli dövlət yaratmaq arzusunda olan Ümummilli Liderin yarımçıq qalmış müqəddəs ideyalarını məhz 2003-cü ildə xalqımızın mütləq əksəriyyətinin səs çoxluğu ilə hakimiyyətə gələn möhtərəm Prezidentimiz İlham Əliyev sədaqətlə davam etdirmək yolunu seçdi. Əsrin əvvəlindən qaynaqlanan dövlətçilik siyasətimizi, ədliyyə, məhkəmə, prokurorluq, hüquq-mühafizə, qanunverici və icraedici strukturların hüquq-mühafizə orqanlarının fəaliyyətinin daha da təkmilləşdirilməsi və Azərbaycanın regionda hüquqi-dimokratik dövlət kimi möhkəməlnməsi yolunda inamlı addımlar atdı. Lakin bu illər ərzində əldə olunan uğurlara baxmayaraq xalqımızın Qarabağ dərdi qalmaqda idi. Düzgün, düşünülmüş və balanslaşdırılmış daxili və xarici siyasəti ilə dünya arenasında nüfuzu artan ölkə başçısı fəaliyyətinin əsas prioritetini ərazi bütövlüyümüzün təmin olunmasına yönəltməklə durmadan iş aparırdı. Cənab Prezident və ölkəmizin Birinci vitse-prezidenti Mehriban xanım Əliyeva rəsmi xarici səfərlərdə, beynəlxalq səviyyəli və diplomatik korpuslarda güclü siyasi iradə, qətiyyət və cəsarət göstərir, ali kürsülərdən mənfur Ermənistanın iç üzünü, işğalçı və təcavüzkar siyasətini ifşa edir, dünya ictimaiyyətini Ermənistan rəhbərliyinin avantürist və qeyri-konstruktiv mövqeyini pisləməyə çağırırdılar. Lakin demokratiyadan dəm vuran və ikibaşlı siyasət yeridən bir sıra Avropa ölkələri, xüsusilə münaqişənin dinc yolla, ədalətli həllinə bilavasitə cavabdehlik daşıyan BMT Təhlükəsizlik Şurası, Avropa Şurası, ATƏT-in Minsk qrupu seyrçi mövqeyində durur, ərazilərmizin 20 faizindən çoxunu işğal altında saxlayan düşmənin xain əməllərinə göz yumurdular. Artıq səbir kasası daşmış möhtərəm Prezidentimiz İlham Əliyev ölkəmizin sərhədlərini intensiv olaraq silahlı təxribatla kobud şəkildə pozmaq kimi iyrənc xislətindən əl çəkməyən düşmənin sonu görünməyən təxribatlarının qarşısını almaq məqsədi ilə 2020-ci il sentyabrın 27-də əks-hücuma, İkinci Qarabağ savaşına başlamaq haqqında əmr verdi. Həmin gündən Ali Baş Komandan cənab İlham Əliyevin «dəmir yumruğu» ətrafında birləşən ordu və xalq torpaqlarımızın işğaldan azad olunması uğrunda müharibəyə başladı. Qüdrətli, yenilməz və güclü Milli Ordumuzun hər bir generalı, zabiti və əsgəri bütün cəbhə boyu cəsurluq, qəhrəmanlıq, cəngavərlik, misli görünməmiş mərdlik və rəşadət göstərərək düşmənin keçilməz istehkamlarını, mühəndis-texniki qurğularını, hücum və müşahidə məntəqələrini, tülkü kimi gizləndikləri yeraltı bunker və tunelləri darmadağın edərək cəmi 44 ərzində 30 ilə yaxın işğal altında inləyən müqəddəs torpaqlarımızı azad edib, üçrəngli bayrağımızı doğma Qarabağımızda dalğalandırdılar.

Yağı düşmən üzərində möhtəşəm Qələbəmizin şanlı ildönümünü, Dövlət Bayrağı Günümüzü böyük təntənə, əsl el bayramı kimi qeyd etdiyimiz bir vaxtda onu da qürurla vurğulamağa dəyər ki, bütün rəsmi dövlət orqanları kimi, çalışdığım Ədliyyə Nazirliyinin bütün strukturları da gecələrini gündüzə qataraq 44 günlük Vətən müharibəsi dövründə Ermənistanın müharibə cinayətlərinin, qeyri-insani əməllərinin beynəlxalq ictimaiyyətin diqqətinə daha dolğun çatdırılmasında, həmçinin xarici ölkələrin ədliyyyə nazirlərinə xüsusi müraciətlər ünvanlanmasında xidmətləri ilə Qələbəmizə öz töhfələrini vermişlər.

Mən bir ədliyyə işçisi, bir ziyalı, bir Azərbycan qadını olaraq Zəfərlə zinətlənmiş şanlı Qələbəmizin ildönümü günündə sonsuz qürur hissi keçirir, xalqımıza dünya səviyyəsində baş ucalığı gətirən, başda möhtərəm Prezidentimiz, Silahlı Qüvvələrin Ali Baş Komandanı, yenilməz və Müzəffər Sərkərdə cənab İlham Əliyev olmaqla cəbhə bölgəsində canını-qanını və həyatını Vətənə qurban verməyə hazır olanların qarşısında baş əyir, şəhidlik zirvəsinə yüksəlmiş ərənlərimizə Tanrıdan rəhmət diləyirəm.

Nə xoş ki, artıq Dövlət Bayrağı Gününü, şanlı Qələbəmizin ildönümünü və qarşıdan gələn 22 noyabr – Ədliyyə Nazirliyinin yaranmasının 103-cü ildönümü- peşə bayramı günümüzü hüznlü, qəmli, sönük notlarla deyil, böyük könül xoşluğu ilə qeyd etmək nəsibimiz oldu. Zəfər bayramın mübarək, Vətənim! Qələbə bayramın mübarək, xalqım! Gözün aydın,Azərbaycan!

Gülyanaq Baxışova,

Yevlax rayon 1 nömrəli

Notariat ofisinin notariusu

İki sahil.- 2021.- 13 noyabr.- S.18.