Azərbaycanlı gənc memar beynəlxalq müsabiqədə dünya birincisi olub

Türkiyədə yaşayan həmvətənimiz, memar Aysel Abasova Britaniya Şurasının (British Council) keçirdiyi “Hədəf sıfır innovasiya” adlı beynəlxalq müsabiqədə dünya birincisi olub.

A.Abasovanın “İki sahil”ə verdiyi məlumata görə, iqlim dəyişikliklərinə həsr olunan və gənclərə yenilikçi fikirlərini inkişaf etdirməyə, onun praktikada tətbiqinə imkan yaradan yarışa 43 ölkədən 243 iştirakçı qatılıb. Müsabiqədə qardaş ölkəni təmsil edən gənc memar birinciliyi birdəfəlik plastik tullantıları təkrar emal edərək qida tullantıları üçün hazırladığı xüsusi qab – “bokashi kova” (“bokashi” yaponca qida tullantılarının torpağı münbitləşdirən qatqı, “kova” isə türkcə dolça, vedrə deməkdir) layihəsi ilə qazanıb. Layihəyə əsasən, plastik məmulatların təkrar emalından hazırlanan zibil qutusuna atılmış qida tullantılarına xüsusi maddə əlavə etməklə gübrə hazırlamaq mümkün olacaq. Əsas məqsəd ətraf mühiti qorumaq, qlobal istiləşmənin qarşısının alınmasına töhfə vermək, istifadə olunmuş plastik materialları ətraf mühitə zərər verən tullantıya deyil, əksinə faydalı məhsula çevirməkdir.

Məlumat üçün bildirək ki, İstanbul Bilgi Universitetində memarlıq təhsili alan Aysel daha sonra İspaniyanın Barselona şəhərindəki Kataloniya Memarlıq İnstitutunda qabaqcıl texnologiyalar və robot texnikası üzrə magistr proqramını tamamlayıb. Türkiyəyə qayıtdıqdan sonra isə “The Back Lab” şirkətini qurub. Həmvətənimzin “bokashi kova” layihəsi qardaş ölkənin mediasında da maraq doğurub. “Milliyet” qəzetində dərc olunan yazıda A.Abasova fəaliyyəti və hədəfləri haqqında danışarkən bildirib ki, təbiətimizə zərər vuran plastik tullantılar, əslində, böyük dəyər və potensiala malikdir: “Dünyanın hazırda iqlim böhranı yaşadığını nəzərə alaraq deyə bilərik ki, birdəfəlik istifadə olunan plastik materiallar bu problemin böyük bir hissəsini təşkil edir. Biz plastik tullantıları təkrar emal müəssisələrindən və ya fərdlərdən toplayır, sonra onları dizaynımıza uyğun şəkildə fərqli rənglərlə qarışdırırıq. Əldə etdiyimiz bu qarışıqları panel maşınımızla panellərə və ya 3D çapına çeviririk. Nəticədə, tamamilə təkrar emal edilmiş plastikdən yeni məhsullar hazırlayırıq.”

Qeyd edək ki, A.Abasova Britaniya Şurasının müsabiqəsində qazandığı mükafat sayəsində “The Back Lab” şirkəti üçün avadanlıqlar alıb və hazırda şirkət “bokaşi kova”ların hazırlanması ilə məşğuldur.

Mahir Rəsuloğlu

İki sahil.- 2021.- 1 oktyabr.- S.8.