Aparılan islahatlar YAP-ın gələcəkdə də liderliyinin qorunmasına şərait yaradacaq- Jalə Əliyeva

Eyni zamanda, plüralist, çoxfikirli, demokratik düşüncəyə əsaslanan ölkəmizdə partiyalar daha da inkişaf edir

2021-ci il mart ayının 5-də Yeni Azərbaycan Partiyasının (YAP) VII qurultayı keçirilib. Tədbirdə partiyanın ötən dövr ərzində gördüyü işlər, qazanılmış uğurlar və qarşıda duran vəzifələrlə bağlı qurultay nümayəndələrinin çıxışları dinlənilib. Yekun olaraq təşkilati məsələlərin müzakirə edildiyi qurultayda partiya daxilində yeniləşmə və islahatlar istiqamətində addımların atılmasına qərar verilib.

Milli Məclisin Ailə, qadın və uşaq məsələləri komitəsinin sədr müavini, filologiya elmləri doktoru, professor Jalə Əliyeva mövzu ilə bağlı “İki sahil”ə açıqlamasında bildirdi ki, Yeni Azərbaycan Partiyası ölkəmizin, cəmiyyətin aparıcı qüvvəsidir və bu gün onun ətrafında milyonlarla insan toplaşıb: “YAP yarandığı ilk gündən etibarən hər zaman Azərbaycanda xalqın sözünü deyən lider partiya rolunu oynaya bilib. YAP-ın adı birbaşa yaradıcısı olduğu ulu öndər Heydər Əliyevin adı ilə bağlıdır. Elə bu baxımdan da YAP bizim üçün çox dəyərli və əhəmiyyətlidir. Partiyaya ilk olaraq ümummilli lider Heydər Əliyevin rəhbərlik etməsi, Ulu Öndərin onun ideya, məramnamə və nizamnaməsinin müəllifi olması, əlbəttə ki, YAP-ın fəaliyyətini bu günə qədər uğurla davam etdirməsinin əsas səbəbidir. Görünən odur ki, bu partiyanın Azərbaycanın ictimai-siyasi fikrində, siyasət aləmində hər bir zaman öz sözü olub və olacaq.”

J.Əliyeva vurğuladı ki, əgər YAP bu gün bu qədər sayda insanı ətrafında birləşdirə bilirsə, hər keçən gün sıraları daha da genişlənir və güclənirsə, bu, partiyanın ölkədəki nüfuzundan və məşhurluğundan xəbər verir: “Əlbəttə ki, biz bu gün islahatlar dövrünü yaşayırıq. Bir cəmiyyətin təkmilləşməsi üçün mütləq yaxşı mənada dəyişikliklərin getməsi labüddür, şərtdir və qaçılmazdır. Biz davamlı olaraq özümüz-özümüzü yeniləməklə gələcəyə daha geniş üfüqlər açırıq. Bu gün Azərbaycanda bütün sahələrdə islahatlar və yeniləşmələr gedir. Yeni kadrlar, qüvvələr müxtəlif təşkilatlarda, qurumlarda rəhbərliyə gəlirlər. Bu qüvvələr əsasən gənclərdən ibarətdir, gələcəyimizin qurucularıdır. Təqdirəlayiq haldır ki, dövlətimizin başçısı İlham Əliyev bu gün gənclərə böyük imkanlar açır. Zəkalı, dünyagörüşlü gənclərimiz rəhbər vəzifələrə irəliyə çəkilirlər.”

J.Əliyevanın sözlərinə görə, bu gün siyasi partiyalarda da dəyişikliklərin təməlində daha yaxşı idarəetməyə nail olmaq, fəal, dinamik bir siyasi fəaliyyət həyata keçirmək məqsədi dayanır: “Əlbəttə ki, biz bunu müsbət dəyərləndiririk. YAP-ın yaranmasında, inkişafında, bu günə qədər uğurla fəaliyyət göstərməsində rolu, dəstəyi, xidməti olanlar heç vaxt unudulmayacaq. Eyni zamanda, əgər bu sıraların yenilənməyə - yeni nəfəsə, yanaşma tərzinə ehtiyacı varsa, biz bunu qəbul etməliyik. Unutmayaq ki, YAP-ın Sədri ulu öndər Heydər Əliyevin siyasi və mənəvi varisi olan Müzəffər Ali Baş Komandan, Prezident İlham Əliyevdir.”

Deputat xüsusi qeyd etdi ki, dövlət başçımızın “Mən nəyi nə vaxt, necə etməyi çox yaxşı bilirəm” dediyi kimi, onun seçimi, düşüncələri əsasında YAP bu gün özünü yeniləyir: “Eyni zamanda, plüralist, çoxfikirli, demokratik düşüncəyə əsaslanan ölkəmizdə partiyalar da inkişaf edir. YAP-ın verdiyi qərarlar partiyanın İdarə Heyətinin, nüfuzlu üzvlərinin hər birinin rəyi əsasında idarə edilir. Ona görə də düşünürük ki, atılan bütün addımlar, aparılan islahatlar birbaşa YAP-ın nüfuzunun daha da artırılmasına və gələcəkdə Azərbaycanın inkişafında bu partiyanın ötən illərdə olduğu kimi, hər bir zaman liderliyinin qorunmasına əhəmiyyətli şərait yaradacaq.”

Cavid Əkbərov

İki sahil.- 2021.- 23.-S.14.