Tarixi Zəfər məğlubedilməzliyimizi bir daha dünyaya sübut etdi

İkisahil.TV-nin bugünkü müsahibi Milli Məclisin Aqrar siyasət komitəsinin sədri Tahir Rzayevdir

-Tahir müəllim, 27 sentyabr-Anım Günü ərəfəsindəyik. Azərbaycanın haqqı, ədaləti bərpa etdiyi 44 günlük İkinci Qarabağ savaşının reallıqları sizdə hansı hissləri yaradır?

- İlk olaraq deyərdim ki, Müzəffər Ali Baş Komandan İlham Əliyevin qətiyyəti, Vətən oğullarının qəhrəmanlığı, şücaəti sayəsində qürurla qeyd edirik ki, torpaqlarımız artıq tarixi sahibinə qovuşub. Torpaqlarımızın işğalçılardan təmizlənməsində canlarından keçən şəhidlərimizin ruhu qarşısında baş əyir, qazilərimizə Allahdan şəfa diləyirik.

Otuz il ərzində düşmən torpaqlarımızı işğal altında saxladı. Bu illər ərzində işğalda olan bütün şəhər və rayonlarımız talandı, viran qoyuldu, qarət edildi. Erməni vandalları bu torpaqlardan tariximizi, mədəniyyətimizi yox etməyə çalışdılar. Lakin bacarmadılar. Bu gün artıq həmin torpaqların əsl sahibləri geri dönüblər.” Ölkə Prezidenti cənab İlham Əliyevin işğaldan azad edilmiş ərazilərə, o cümlədən Şuşa şəhərinə hər bir səfəri bu torpaqların tarixən Azərbaycan xalqına məxsus olduğu və bundan sonra da əbədi olaraq belə qalacağı barədə bütün dünyaya verdiyi bir mesajdır. Erməni vandalları tərəfindən məhv edilən Azərbaycanın mədəniyyət paytaxtı Şuşa cənab Prezident İlham Əliyevin və Birinci vitse-prezident Mehriban xanım Əliyevanın rəhbərliyi altında bərpa edilir. Bu gün artıq işğaldan azad edilmiş torpaqlarda Ölkə Prezidenti cənab İlham Əliyevin rəhbərliyi ilə Azərbaycan xalqı böyük vüsətlə quruculuq işləri aparır. Azərbaycan xalqının qazandığı böyük Qələbə ilə bölgənin taleyində yeni bir mərhələ və yeni reallıqlar yarandı. Azərbaycan bölgənin əsas söz sahibinə çevrildi. Bütün beynəlxalq norma və prinsiplər çərçivəsində aparılmış bu müharibə istifadə edilmiş müasir hərbi texnologiyalara görə inkişaf etmiş ölkələrin hərbi təhsil proqramlarına daxil edilmişdir. Şəhidlərimizin qanı ilə yazılan bu möhtəşəm Zəfər dövlətimizin gücünü, xalqımızın və onun Liderinin məğlubedilməzliyini bir daha bütün dünyaya sübut etdi.

- Təcavüzkar dövlət olan Ermənistan bu reallıqları necə qarşılayır?

- 44 günlük müharibə bizim gücümüzü, Silahlı Qüvvələrimizin rəşadətini, qəhrəmanlığını, xalqımızın birliyini bütün dünyaya göstərdi. Hər halda Ermənistan anlamalıdır ki, artıq Azərbaycanın qazandığı Qələbənin yaratdığı yeni vəziyyətə uyğunlaşmağa məcburdur. Çünki artıq Azərbaycan dünyada qalib ölkə kimi qəbul edilir. Hazırda qarşıda dayanan əsas vəzifəmiz azad olunmuş ərazilərimizdə quruculuq-bərpa işlərinin həyata keçirilməsidir. Bu baxımdan, Azərbaycan Prezidenti İlham Əliyevin işğaldan azad olunmuş rayonlara mütəmadi səfərləri xalqımız tərəfindən böyük ruh yüksəkliyi ilə qarşılanır. Azad olunmuş ərazilərdə artıq böyük inkişafın təməlləri atılır. Məqsəd yalnız ölkə səviyyəsində deyil, həm də uğurlu inteqrasiyaya nail olmaqla, regional və beynəlxalq səviyyələrdə inkişafı təmin etməkdir. 30 ilə yaxın erməni vandalizminə məruz qalan torpaqlarımızda tezliklə canlanmanın və məskunlaşmanın şahidi olacağıq.

- Regionun bundan sonrakı taleyini necə görürsünüz?

- Bu gün yeni reallıq yaranıb. Azərbaycan böyük quruculuq işlərinə start verib. Ermənistan bunu görməlidir ki, azərbaycanlılar qurucu xalqdır. Yaratmış olduğumuz reallığın nəticəsidir ki, Azərbaycana Ermənistan lazım deyil, çünki Ermənistansız da Azərbaycan bölgədə istədiyinə nail olub. Biz illər ərzində bütün qonşu dövlətlərlə aktiv, bir o qədər də konstruktiv siyasət yürüdərək heç bir dövlətə qarşı ərazi iddiası etmədən, təşəbbüskarı və tərəfdaşı olduğumuz bütün layihələrdə etibarlı tərəfdaş kimi çıxış edərək qonşu dövlətlərlə bütün kommunikasiyaları qurub, enerji xətlərini çəkib, dəmir yollarını, bütün nəqliyyat layihələrini icra etmişik. Ermənistan tərəfi hər şeydən öncə xahiş etməli, qonşularından icazə almalıdır ki, bu prosesə qoşulsun. Artıq Dağlıq Qarabağ sözü, ya da münaqişə termini yoxdur. Ermənistan, onun havadarları ümumiyyətlə, bu sözü işlətməli deyillər. Əgər erməni xalqını belə çox istəyirlərsə, onların inkişafında maraqlıdırlarsa Ermənistana bildirsinlər ki, öz qonşuları ilə normal münasibətlər qursun və ərazi iddialarından birdəfəlik əl çəksin. Çünki işğalçılıq siyasəti nəticəsində müstəqil dövlət ola bilməyən, xarici dairələrin əlində alət olan, ötən illər ərzində bu siyasətin ağır nəticələrindən əziyyət çəkən Ermənistan üçün yeganə çıxış yolu Azərbaycanla sərhədlərin müəyyən edilməsi istiqamətində iş aparmaqdan, delimitasiya üzrə işçi qrup yaratmaqdan və sülh müqaviləsinə hazırlıq işlərinə başlamaqdan keçir. Eyni zamanda, burada xüsusi vurğulanmalı bir məsələ Zəngəzur dəhlizinin açılmasıdır ki, bu, hər bir region dövlətindən öncə elə Ermənistanın özünə lazımdır ki, iqtisadi blokadadan çıxsın.

-Azərbaycanın əldə etdiyi Qələbə və uğurla həyata keçirdiyi bərpa-quruculuq işləri erməniləri və onlara havadarlıq edən xarici gücləri narahat edir. Onların ölkəmizdəki əlaltılarının bu narahatlığa dəstəklərini necə şərh edərdiniz?

- Hərbi əməliyyatların başa çatmasından və tarixi Qələbədən sonra Qarabağda bərpa-quruculuq işləri sürətlə davam etdirilməkdədir və bunun üçün bütün imkanlar və resurslar səfərbər edilib. Bütün bunlar təkcə işğaldan azad edilmiş ərazilərimizin deyil, bütövlükdə regionun çoxistiqamətli inkişafı üçün zəmin yaradır. Əlbəttə ki, Azərbaycanın beynəlxalq layihələrdəki uğurlu fəaliyyəti, qazandığı etibar da bu prosesin daha sürətli və uğurlu əməkdaşlıq çərçivəsində getməsinə öz töhfəsini verir”. Bu, bir gerçəklikdir ki, Vətən müharibəmizin hərb mərhələsi bitsə də, beynəlxalq aləmdə və mediada erməni faşizminin ifşası məqsədilə informasiya mübarizəmiz davam edir. Anti-Azərbaycan qüvvələrin yenidən daxildəki əlaltılarından alət kimi istifadə edərək görülən bu əzəmətli işlərin əhəmiyyətini gözdən salmaq istiqamətində fəaliyyətləri müşahidə olunmaqdadır. Dünyada gedən qlobal maliyyə-iqtisadi çətinliklər və pandemiya fonunda möhtərəm Prezidentimiz cənab İlham Əliyevin rəhbərliyi ilə həyata keçirilən uğurlu siyasət, ölkənin və bölgənin gələcək dayanıqlı inkişafı, işğaldan azad edilən ərazilərdə çox sürətlə nəhəng işlərin görülməsi nəinki bu antimilli qüvvələri təəccübləndirir və ya narahat edir, hətta gözləri götürmür. Onlar üçün ancaq xaos və anarxiya lazımdır.

- İşğaldan azad olunmuş ərazilərimizdə qısa müddət ərzində infrastrukturun qurulmasına başlanıldı. Bu proseslər məskunlaşmanın intensivliyinə necə təsir edəcək?

- Bu gün Qarabağın, işğaldan azad edilmiş bütün ərazilərimizin dirçəlişi üçün ən yüksək standartlarla inkişaf planı və proqram hazırlanmış, həyata keçirilməyə başlanmışdır. Füzuli rayonunda Beynəlxalq Hava Limanının qısa zamanda istifadəyə verilməsi, işğaldan azad olunmuş bütün ərazilərdə elektrik stansiyalarının qurulması, nəqliyyat-kommunikasiya layihələrinin həyata keçirməsinə, mədəniyyət paytaxtı Şuşanın dirçəldilməsi istiqamətində misilsiz işlərin görülməsi sözün həqiqi mənasında ölçüyəgəlməzdir. Bunu təkcə beynəlxalq təşkilatlar deyil, hətta erməni mətbuatı və siyasətçiləri etiraf edirlər.

-Azərbaycanda yürüdülən çevik iqtisadi siyasətin ən mühüm uğurlarından biri sənaye sektoru, xüsusilə də qeyri-neft sektorunun inkişafıdır. Bununla bağlı nə deyərdiniz?

- Qeyri-neft sənayesinin sürətli inkişafı ölkə iqtisadiyyatının dünyadakı mənfi tendensiyalardan qorunmasına imkan verir. Ölkənin sənayeləşməsi iqtisadiyyatı sürətli inkişafa aparan və onun rəqabətqabiliyyətliliyini artıran əsas istiqamətdir. Məhz sənayenin inkişafı iqtisadiyyatın neftdən asılılığının aradan qalxmasına, o cümlədən müasir innovasiyalı texnoloji sahələrin açılmasına və işsizliyin azalmasına imkan verir. Prezident İlham Əliyevin imzaladığı Dövlət proqramlarına uyğun olaraq ölkəmizdə sənayenin inkişafına xidmət edən sənaye parklarının və sənaye məhəllələrinin yaradılması prosesi sürətlənib. Sənaye zonalarında lazımi bütün infrastruktur yaradılır, yeni fəaliyyət sahələrinin işləməsi üçün uzunmüddətli güzəştlər tətbiq olunur.

Şəmsiyyə Əliqızı,

Könül Əliyeva

İki sahil.- 2021.- 25 sentyabr.- S.11.