Heydər Əliyev yolu Azərbaycanı

möhtəşəm Zəfər zirvəsinə yüksəltdi

Müsahibimiz Milli Məclisin deputatı, “İki sahil” qəzetinin baş redaktoru, siyasi elmlər doktoru, professor Vüqar Rəhimzadədir

- Vüqar müəllim, 12 dekabr müasir müstəqil Azərbaycan dövlətinin banisi Heydər Əliyevin anım günüdür. Ümummilli Lider Heydər Əliyevin əziz xatirəsi ehtiramla yad edilir. Ulu Öndərin dövlətimiz və xalqımız qarşısındakı xidmətlərini necə şərh edərdiniz?

- Azərbaycanın müasir tarixinin bütöv bir mərhələsi Ulu Öndər Heydər Əliyevin adı və titanik fəaliyyəti ilə bağlıdır. Onun dövlətimiz, xalqımız qarşısındakı xidmətlərinin miqyası o qədər böyükdür ki, fəaliyyətinin hər bir sahəsi haqqında saatlarla , günlərlə danışmaq olar. Əbəs yerə deyilmir ki, Ümummilli Lider Heydər Əliyev hələ sağlığında canlı əfsanəyə çevrildi. Onun hakimiyyətinin hər iki dövrü Vətənə, dövlətə, xalqa xidmət nümunəsidir. Ulu Öndər hələ hakimiyyətinin birinci dövründə Azərbaycanın müstəqil gələcəyini düşünərək mühüm addımlar atdı. Həmin illərdə yaradılan möhkəm təməlin bugünkü uğurlarda rolu böyükdür. Azərbaycançılıq ideologiyasının əsası qoyuldu. Ulu Öndər Heydər Əliyevin tarixi yaddaşın bərpası istiqamətindә atdığı qətiyyətli addımlar o dövrdə milli ruhun canlanmasına xidmət göstərdi, özünüdərki və soykökə qayıdışı təmin etdi, müstəqil dövlət quruculuğuna aparan yolun təməl daşına çevrildi. Azadlıq və müstəqillik duyğularının milli düşüncəmizdə üstünlük təşkil etməyə başladığı həmin illər Azərbaycanın quruculuq salnaməsinin ən parlaq səhifələridir. Dahi şəxsiyyət 1969-1982-ci illərdə sosial-iqtisadi böhran keçirən Azərbaycanı keçmiş İttifaqın ən qabaqcıl respublikalarından biri səviyyəsinə yüksəltdi. Müstəqil Azərbaycanın sənaye və iqtisadi potensialı məhz o illərdə formalaşdı. Həmin dövrdə yetişmiş kadrlar bu gün müasir müstəqil Azərbaycanın davamlı uğurlarına öz töhfələrini verirlər. Ümummilli Lider Azərbaycan gənclərinin təhsil almaq üçün keçmiş İttifaqın ən nüfuzlu ali məktəblərinə göndərilməsini qarşıya əsas hədəf kimi qoymuşdu. O dövrün reallıqları sırasında hərbi kadrların yetişdirilməsi məqsədilə Cəmşid Naxçıvanski adına Hərbi Liseyin yaradılmasını da xüsusi qeyd etməliyik. Bu gün orduda xidmət edən zabitlərin böyük əksəriyyəti bu liseyin yetirmələridir. Vətənini, xalqını canından artıq sevən Ulu Öndər Heydər Əliyev Azərbaycanı hər zaman qüdrətli, zəngin görmək istəyib və buna nail olmaq üçün bütün zəruri addımları atıb. Prezident İlham Əliyev çıxışlarında Ümummilli Lider Heydər Əliyevin hakimiyyətinin birinci dövründə gördüyü işlərdən, xidmətlərindən bəhs edərkən bu reallığı xüsusi qeyd edir ki, Azərbaycan xalqının faciələri Ümummilli Lider Heydər Əliyevin siyasi hakimiyyətdən getməsindən sonra başladı. 1987-ci ildə istefa verməsindən iki həftə keçməmiş erməni millətçiləri və onların sovet iqtidarında olan himayədarları ovaxtkı Dağlıq Qarabağ Muxtar Vilayətini Azərbaycanın tərkibindən çıxarıb Ermənistanın tərkibinə verilməsi ilə bağlı məsələ qaldırdı və Azərbaycan xalqının faciələri o gündən başladı. “Şübhə yoxdur ki, əgər Heydər Əliyev hakimiyyətdə təmsil olunsaydı, heç vaxt erməni millətçiləri bu çirkin əməllərə əl atmağa cürət etməzdilər. Həm erməni millətçiləri, həm də ovaxtkı Azərbaycan rəhbərliyində təmsil olunmuş milli satqınlar faktiki olaraq birləşərək Heydər Əliyevə qarşı çirkin şər, böhtan kampaniyası aparmışdılar. Heydər Əliyevin gücü, müdrikliyi, ümumiyyətlə, Heydər Əliyev amili Azərbaycanı bir çətir kimi qoruyurdu. Baxmayaraq ki, siyasi fəaliyyətdən kənarda qalıb, amma Ulu Öndər hər zaman Azərbaycanın maraqları ilə yaşayırdı, ürəyi Azərbaycanla bir döyünürdü”.

- Ümummilli Lider Heydər Əliyevin ölkəmizə rəhbərliyinin ikinci dövrü xilaskarlıq missiyası ilə xarakterizə edilir...

- 1991-ci ilin 18 oktyabr tarixində dövlət müstəqilliyini bərpa edən Azərbaycan həmin dövrün iqtidarının yarıtmaz siyasəti nəticəsində faciələrlə, təhlükələrlə üz-üzə qaldı. Hakimiyyəti zor gücünə ələ keçirən AXC-Müsavat cütlüyünün bir illik hakimiyyəti dövründə Azərbaycanın üzləşdiyi vəziyyət müstəqillik tariximizin faciəli səhifələri sırasında yer alır. Ermənistanın təcavüzü, xarici təzyiqlər və daxili çəkişmələr üzündən dünyanın siyasi xəritəsindən silinmək və dövlətçiliyini itirmək təhlükəsi ilə qarşılaşan Azərbaycanın çətin günlərində xalqımız üzünü xilaskarına- Ümummilli Lider Heydər Əliyevə tutdu.

1993-cü ildə xalqın təkidli tələbi ilə hakimiyyətə qayıdan Ulu Öndər doğma Vətənin xilası naminə misilsiz fədakarlıq nümayiş etdirdi, ölkəmizi ictimai-siyasi pərakəndəliyin, anarxiyanın məngənəsindən qurtardı, bütün sahələrdə müşahidə olunan dərin tənəzzülün qarşısını aldı, yenidən qurduğu və hər cür qəsdlərdən qoruduğu dövlətin dayanıqlı inkişaf yolunu müəyyən etdi. Ümummilli Lider düşünülmüş və məqsədyönlü siyasəti nəticəsində Azərbaycanın müstəqilliyini əbədi və dönməz etdi. Yeni qurulan Azərbaycanın qarşısında yeni imkanlar, üfüqlər açıldı. Dövlətçiliyin əsasları yaradıldı. Müstəqillik yollarında ilk addımlarını atan ölkənin qarşısında dayanan vəzifələr dahi şəxsiyyət Heydər Əliyevin hələ 1992-ci ildə xalqın böyük əksəriyyətinin istəyini ifadə edən 91 nəfər ziyalının Yeni Azərbaycan Partiyasının yaradılması ilə bağlı müraciətinə cavabında öz əksini tapmışdır. Daxili sabitliyin təmin edilməsi, dünyanın müxtəlif ölkələrində yaşayan soydaşlarımızın azərbaycançılıq ideologiyası ətrafında sıx birləşməsi, həmrəyliyi əsas hədəflərdən biri kimi qarşıya qoyuldu. Zəngin idarəçilik təcrübəsi, liderlik keyfiyyətləri Ulu Öndər Heydər Əliyevin xidmətlərində özünün aydın ifadəsini tapır. Ümummilli Liderin böyük inamla bəyan etdiyi “Azərbaycan dünyaya Günəş kimi doğacaq” hədəfinin reallığa çevrilməsi istiqamətində atılan addımların uğurlu nəticələri bugünümüzün reallıqları fonunda indiki və gələcək nəsillərə çatdırılır. Dahi şəxsiyyət Heydər Əliyevin xalqa 1 oktyabr 2003-cü il tarixli müraciətində də bildirildi ki, yeganə amal torpaqlarımızın işğaldan azad edilməsi, Azərbaycan Bayrağının həmin ərazilərdə ucaldılmasıdır. Prezident İlham Əliyevin ötən il “Heydər Əliyev ili” çərçivəsində Ulu Öndərin anadan olmasının 100 illiyi münasibətilə xalqa təbrikini də məhz Şuşadan çatdırması səbəbsiz deyildi. Müzəffər Ali Baş Komandanın qeyd etdiyi kimi, “bu təbrik müraciətimi Bakıdan da edə bilərdim. Amma hesab etdim ki, bu gün burada, Şuşada, bu binanın önündə olmalıyam. Şuşa Zəfərimizin rəmzidir. Şuşa Zəfərimizin tacıdır. Şuşa işğaldan azad olunanda bu meydanda qəhrəman Azərbaycan hərbçiləri Şuşanın azad olunması ilə bağlı raport verdilər. Bu binanın damında Azərbaycan Bayrağı qaldırıldı və Şuşanın azad olunması tarixi Zəfərimizin əsas hissəsi idi”.

- Ulu Öndər Heydər Əliyevin dövlətimiz, xalqımız qarşısında misilsiz xidmətlərindən bəhs edərkən Yeni Azərbaycan Partiyasının yaradılmasını xüsusi qeyd etməliyik. Bu mühüm addım Azərbaycan xalqı və dövləti üçün mühüm dönüş nöqtələrindən biri oldu…

- Ümummilli Lider Heydər Əliyevin adı ilə bağlı olan Yeni Azərbaycan Partiyası Ulu Öndərin fəaliyyətinin Naxçıvan mərhələsinin mühüm reallığıdır. Bu, o dövr idi ki, Azərbaycan özünün ən çətin günlərini yaşayırdı. Xalqın istəyinin, zamanın tələbinin nəticəsi olaraq yaradılan Yeni Azərbaycan Partiyası ilk gündən dövlətə, xalqa xidməti fəaliyyətinin əsası kimi qəbul etdi. “Yeni Azərbaycan uğrunda” devizini bu gün “Qalib ölkənin qalib Lideri” çağırışının əvəzləməsi keçilən yolun uğurlarının, hər bir hədəfə doğru inamlı addımların atılmasının təqdimatıdır. Dövlət başçısı İlham Əliyevin YAP-ın tarixi Zəfərimizin reallıqları fonunda keçirilən VII qurultayındakı çıxışında qeyd etdiyi kimi, hər dövrün öz tələbləri var. Biz 1990-cı illərin tələbləri ilə XXI əsrdə yaşaya bilmərik. Əvvəlki dövrlərdə əldə edilmiş bütün uğurları kənara qoymalıyıq. Bəli, bu, bizim üçün fundament yaratdı, baza yaratdı, imkan yaratdı ki, əsas məqsədimizə çataq. Ancaq əgər biz oturub bütün günü o dövr haqqında danışsaq, gələcək haqqında düşünməsək, onda nə olacaq. Biz gələcək haqqında düşünməliyik. Biz zamanı qabaqlamalıyıq. Ölkənin gələcəyini elə planlaşdırmalıyıq ki, uzunmüddətli dayanıqlı inkişaf təmin edilsin, müstəqillik əbədi olsun, ölkəmizin qüdrəti artsın, təsir imkanlarımız artsın və daim Azərbaycan xalqı təhlükəsizlik şəraitində öz dədə-baba torpağında yaşasın.

“91-lər”in müraciəti, Ulu Öndər Heydər Əliyevin müraciətə cavabı Azərbaycanın bugünkü reallıqlarının əsası oldu. “91-lər”in müraciətindən ötən 32 il onun bugünümüz və gələcəyimiz üçün əhəmiyyətini daha aydın şəkildə göz önünə gətirir. Partiyanın yaradılmasında məqsəd, təbii ki, demokratik yolla hakimiyyətə gəlib ölkəni düşdüyü ağır vəziyyətdən xilas etmək idi. Bütün Azərbaycan xalqı həmin dövrdə Ulu Öndər Heydər Əliyevin Naxçıvanı çətinliklərdən necə xilas etdiyini görürdü. Blokada şəraitində olan muxtar respublikada insanlarla Heydər Əliyevin birliyi bütün çətinliklərə sinə gərdi. Bütövlükdə xalqımız Ulu Öndər Heydər Əliyevi çox sevirdi və Azərbaycanın xilasını Onun hakimiyyətə qayıdışında görürdü. Çünki Ulu Öndər daim bildirirdi ki, Onun üçün hər şeydən əziz xalqıdır, Vətənidir, torpağıdır. Həyatı və fəaliyyəti yalnız və yalnız Azərbaycanın müstəqilliyinin qorunub saxlanılmasına, ölkəmizin ağır vəziyyətdən xilasına həsr edilib. Bununla bərabər bu çağırışı da edirdi ki, bunu xalqla, xalqın dəyərli insanları, hörmətli adamları, xalqın irəli çəkdiyi nümayəndələri ilə birlikdə edə bilər. “91-lər” çox mühüm missiyanı həyata keçirdi. Yeni Azərbaycan Partiyasının yaradılması ilə xalqda sabaha ümid yaranmağa başladı. Partiyanın yaranmasından çox keçmədi ki, Ümummilli Lider xalqın təkidli tələbi ilə hakimiyyətə qayıtdı. 1993-cü ilin yayında, müstəqilliyini yenicə bərpa etmiş Azərbaycanın böyük faciələrlə, təhlükələrlə üz-üzə qaldığı bir vaxtda xalq özünün və ölkənin gələcəyini Ulu Öndər Heydər Əliyevə etibar etdi. Azərbaycan xalqı dahi şəxsiyyətin əvəzsiz xidmətlərini heç vaxt unutmur.

- Vüqar müəllim, müasir dövlətçilik tariximizin mühüm reallıqları sırasında siyasi varisliyin təmin edilməsi Azərbaycanın Zəfərinə yol açan müstəsna hadisə kimi xüsusi yer tutur. Bu barədə nə deyə bilərsiniz?

- Xalqımız 2003-cü ildə Heydər Əliyev siyasətinin davamına səs verdi. İllər keçdikcə bu seçimin əhəmiyyəti, xalqımızın yanılmadığı reallıqların əsasında təsdiq edilir. Ümummilli Lider həmin müraciətində bildirmişdi ki, axıra çatdıra bilmədiyi işləri, planları cənab İlham Əliyev xalqın və Yeni Azərbaycan Partiyasının dəstəyi ilə axıra catdıra biləcək. Bu inam Azərbaycanın tarixi Zəfərə qovuşmasına, ərazi bütövlüyünü və suverenliyini tam bərpa etməsinə gətirib çıxardı. Ulu Öndərin dediyi kimi, Azərbaycan çətin günlərini arxada qoydu, dünyaya Günəş kimi doğdu, dünya azərbaycanlıları bir araya gələrək Azərbaycanın davamlı uğurlarına, xaricdə varlığının təsdiqlənməsinə öz töhfələrini verdilər. Bu gün Azərbaycanın mənafeyi naminə elə bir sahə yoxdur ki, onun inkişafı Ümummilli Liderin adı ilə bağlı olmasın. Ulu Öndər cəmiyyət həyatının müxtəlif sahələri arasında üzvi bağlılığı aydın görərək, müəllifi olduğu milli inkişaf strategiyasında ictimai, siyasi, sosial, iqtisadi, mədəni və digər sahələrdə qarşıda duran vəzifələri düzgün müəyyənləşdirdi və həyata keçirdi. Milli neft strategiyasının uğurla reallaşdırılması nəticəsində xalqımız öz təbii sərvətlərinin tam sahibinə çevrildi və qısa müddətdə ölkəmizin inkişafına güclü təkan verən resurslar əldə edildi. Müstəqil Azərbaycanın ilk Konstitusiyasının qəbul olunması və bütün sferaları əhatə edən köklü islahatların həyata keçirilməsi, demokratik, hüquqi dövlət quruculuğu, nizami ordunun yaradılması Ulu Öndər Heydər Əliyevin Azərbaycan xalqı qarşısında müstəsna xidmətləridir. Məhz bu möhkəm təmələ əsaslanaraq dövlətimizin başçısı İlham Əliyev 2003-cü ildən 2020-ci ilin sentyabr ayınadək olan dövrü Qələbəyə hazırlıq mərhələsi kimi dəyərləndirir. Həmin müddətdə bütün sahələrdə əldə olunan uğurlar davamlı xarakter aldı. İqtisadiyyatın düzgün əsaslar üzərində qurulması bütün sahələrdə yenilikləri, təkmilləşməni şərtləndirdi. Azərbaycan böyük investisiyalar məkanına çevrilməklə investisiya cəlbediciliyini qorudu. Beynəlxalq maliyyə qurumlarının hesabatlarında ən islahatçı ölkə kimi xarakterizə edildi. İqtisadi tərəqqi, ordu quruculuğu sahəsində də mühüm addımları təmin etdi. Azərbaycan Ordusu dünyanın ən güclü orduları sırasında yer aldı. Ordumuz gücünü, qüdrətini 2020-ci ilin 27 sentyabr tarixində başlayan İkinci Qarabağ müharibəsinə qədər 2016-cı ilin Aprel döyüşlərində, 2018-ci ilin Günnüt əməliyyatında nümayiş etdirdi. 44 günlük İkinci Qarabağ müharibəsində tarixi Zəfərimiz, ötən ilin sentyabrında həyata keçirilən bir günlük lokal antiterror tədbirləri nəticəsində suverenliyimizin tam bərpa edilməsi 1993-cü ildən başlanan yolun uğurlarının ümumiləşdirilmiş ifadəsidir.

2003-cü ildə keçirilən prezident seçkilərində xalqın böyük əksəriyyətinin səsini qazanaraq Prezident seçilən cənab İlham Əliyev andiçmə mərasimində Azərbaycanın daha güclü, qüdrətli dövlətə çevrilməsi üçün Heydər Əliyev siyasətinin davam etdirilməsinin vacibliyini bildirdi və Ümummilli Liderə bu müraciəti etdi ki, əsəriniz olan müasir müstəqil Azərbaycanı zəfərlərə aparacağıq. 2020-ci ilin 8 noyabrında Şuşanın işğaldan azad edilməsi münasibətilə Şəhidlər xiyabanından xalqa müraciətində söylədiyi “Mən bu gün, eyni zamanda, Ulu Öndər Heydər Əliyevin məzarını ziyarət etdim, onun ruhu qarşısında baş əydim. Ürəyimdə dedim, xoşbəxt adamam ki, ata vəsiyyətini yerinə yetirdim. Şuşanı azad etdik! Bu, böyük Qələbədir! Şəhidlərimizin, Ulu Öndərin ruhu şaddır bu gün! Gözün aydın olsun Azərbaycan! Gözünüz aydın olsun dünya azərbaycanlıları!” fikirləri Müzəffər Ali Baş Komandanın verdiyi vədlərin yerinə yetirilməsindən keçirdiyi qürur hissinin nümayişi oldu. Möhtərəm Prezident ötən ilin sentyabrında suverenliyimizin bərpasından sonra oktyabrın 15-də Xankəndidə, Xocalıda, Ağdərədə və Xocavənddə Azərbaycan Bayrağını ucaltdıqdan sonra Xankəndidən xalqa müraciətində vurğuladı ki, verdiyi bütün vədlərin yerinə yetirilməsindən çox şaddır.

Ümummilli Lider Heydər Əliyevin şah əsəri olan müasir müstəqil, qalib və bütövləşən Azərbaycan yeni dövrün yeni hədəflərinin icrası istiqamətində mühüm addımlar atır. Qarabağımız və Şərqi Zəngəzurumuz sürətlə dirçəlir, soydaşlarımız doğma yurd-yuvalarına qayıdır.

Bu gün Ümummilli Lider Heydər Əliyevin, torpaqlarımızın azadlığı uğrunda şəhidlik zirvəsinə ucalan Vətən övladlarının ruhu şaddır. Artıq vaxtilə “Gün gələcək Qarabağda, Şuşada, Xankəndidə üçrəngli Bayrağımız dalğalanacaq. O gün uzaqda deyil” çağırışını “Bu gün Qarabağ dirçəlir, Zəngəzur dirçəlir, biz öz doğma torpaqlarımızda qururuq, yaradırıq” fikirləri tamamlayır. Bundan böyük xoşbəxtlik ola bilərmi? Bu xoşbəxtliyi bizə yaşadan Heydər Əliyevin əbədiyaşar ideyalarıdır.

İki sahil.- 2024.- 12 dekabr, №229.- S.4.