Şuşa: İslam mədəniyyətinin incisi

Qarabağın tacı sayılan Şuşa böyük Zəfərin sevinc və təntənəsini yaşayır. Burada başlanan quruculuq işləri gündən-günə sürətlənir, genişmiqyaslı layihələr uğurla icra olunur. İnfrastruktur xarakterli tədbirlər- su, elektrik, istilik və s. təchizat sahələrində ciddi addımlar atılır.

Qarabağımızın tacı, döyünən ürəyi Şuşada bərpa-quruculuq işləri sürətlə aparılır. Artıq istismara verilmiş Zəfər yolu həm də şəhidlərimizin qanı ilə yazılan şanlı tarixin şahididir. Müzəffər ordumuz məhz həmin yolla Şuşa şəhərinə daxil olduğundan bu yolun həm də rəmzi mənası, mənəvi önəmi var. Məhz bu səbəbdən Prezident İlham Əliyev Şuşaya səfəri zamanı uzunluğu 101.5 km olan bu yolu Zəfər yolu adlandırıb. Artıq Şuşaya elektrik enerjisinin və suyun verilməsi bərpa edilib. İndi iki mənbədən Şuşaya su gəlir. Natəvan bulağı da bərpa edilib. Həmçinin Şuşanın tarixi abidələrinin bərpasına start verilib. Vaqifin məqbərəsi artıq bərpa olunub. Şuşada “Xarıbülbül” oteli istifadəyə verilib. Şuşanın yaradılmasının 270 illiyi münasibətilə ölkə başçısının müvafiq Sərəncamı ilə 2022-ci ilin “Şuşa İli” elan edilməsi xalqımızın böyük sevincinə səbəb oldu.

Ölkəmizin başçısı uzun illərdən sonra Cıdır düzündə “Xarıbülbül” festivalının keçirilməsi münasibətilə xalqımızı təbrik edərək bildirmişdi ki, biz bu günü 30 il səbirsizliklə gözləmişik, 30 il Vətən həsrəti ilə yaşamışıq. Dövlət başçısı çıxışında qeyd etmişdi ki, bundan sonra biz Şuşada əbədi yaşayacağıq. Şuşanın bərpa edilməsinə artıq başlanılıb. “Xarıbülbül” festivalı bu qədim diyarımızda hər il keçiriləcək: “Biz Şuşanı quracağıq, bərpa edəcəyik, mənfur düşmən isə Şuşanı dağıdırdı. İndi siz - burada olan vətəndaşlar, dostlar gəzəcəksiniz, görəcəksiniz ki, Şuşa hansı dağıntılara məruz qalıb. Amma yenə də deyirəm, biz Şuşamızı, Ağdamımızı, Cəbrayılımızı, Füzulimizi, Zəngilanımızı, Qubadlımızı, Laçınımızı, Kəlbəcərimizi qəlbimizdə yaşatmışdıq. Dağıdılmış məscidləri biz bərpa edəcəyik, amma o məscidlər işğal dövründə bizim qəlbimizdə ucaldılmışdı. İndi isə biz burada, Cıdır düzündə - hər bir azərbaycanlı üçün müqəddəs olan yerdə yığışmışıq və bu musiqi bayramını, bu birlik bayramını, bu qayıdış bayramını, bu ləyaqət bayramını qeyd edirik”.

Azərbaycanın mədəniyyət paytaxtı olan, vaxtilə “Kiçik Paris”, “Zaqafqaziyanın konservatoriyası” adlandırılan Şuşa şəhəri bu gün özünün tarixi günlərini yaşayır. Bu gün azad, abad Şuşa yerli və beynəlxalq tədbirlərə ev sahibliyi edir.2023-cü il oktyabrın 31-dən noyabrın 4-dək Şuşada və Bakıda I Beynəlxalq TÜRKSOY Teatr Festivalı keçirilməsi bunun əyani təsdiqidir. Festival Azərbaycan xalqının Ümummilli Lideri Heydər Əliyevin 100 illik yubileyi və Şuşa şəhərinin 2023-cü il üçün “Türk dünyasının mədəniyyət paytaxtı” elan edilməsi, Azərbaycan peşəkar milli teatrının yaradılmasının 150 və TÜRKSOY-un 30 illik yubileyləri münasibətilə gerçəkləşmişdi. Festival çərçivəsində Şuşada TÜRKSOY-a üzv ölkələrin dövlət teatrları rəhbərləri şurasının 9-cu toplantısı keçirilmişdi. Öz tarixi şöhrətini bərpa edən Şuşada, eləcə də bütün Qarabağ və Şərqi Zəngəzurda həyata keçirilən bərpa-quruculuq işləri festival iştirakçılarını heyrətləndirmişdi. Şuşanın qonaqları, həmçinin işğal dönəmində mədəniyyət abidələrimizə ermənilər tərəfindən vurulan ziyanın, qədim artefaktlarımızın saxtalaşdırılmasının şahidi olmuşdular.

Prezident İlham Əliyevin 2023-cü il 21 noyabr tarixli Sərəncamı ilə Şuşa şəhəri “İslam dünyasının mədəniyyət paytaxtı” elan edilib. Şuşa şəhərinin 2024-cü il üçün “İslam dünyasının mədəniyyət paytaxtı” elan edilməsi ilə bağlı Tədbirlər Planı” təsdiq edilib. Sənəddə Şuşada İslam Əməkdaşlığı Təşkilatının mədəni irsin mühafizəsinə həsr olunmuş beynəlxalq konfransının keçirilməsi, “İslam dünyasının itirilməkdə olan qeyri-maddi mədəni irs nümunələri” mövzusunda dəyirmi masa və sərginin keçirilməsi, “İslam Əməkdaşlığı Təşkilatı Ölkələrinin İqtisadiyyatı” kitabının təqdimat mərasiminin təşkili, “Şuşa-İslam dünyasının mədəniyyət paytaxtı 2024” poçt markasının və müvafiq internet resurslarının təqdimatı, ICESCO-nun “A-Hub Akselerasiya Proqramı”nın (2023-cü il üzrə) böyük finalının Azərbaycanda keçirilməsi, Şuşa şəhərinin 2024-cü il üçün “İslam dünyasının mədəniyyət paytaxtı” elan edilməsi ilə bağlı kütləvi idman tədbirlərinin keçirilməsi, Şuşanın İslam mədəniyyətinə töhfə vermiş tarixi-dini irsi və şəxsiyyətləri haqqında müxtəlif dillərdə sənədli filmin hazırlanması, İslam dünyasının aparıcı media nümayəndələrinin Şuşaya səfərinin təşkili, bu il ərzində İslam ölkələrinin mədəniyyət paytaxtlarının “Şuşa şəbəkəsi” yaradılması və.s nəzərdə tutulur.

Azərbaycanın möhtəşəm Zəfəri ilə başa çatan qırx dörd günlük Vətən müharibəsindən sonra bu Qələbəmizin ilhamvericisi, təşkilatçısı olan Prezident İlham Əliyevin rəhbərliyi ilə tarixi torpaqlarımızda həyata keçirilən genişmiqyaslı bərpa-quruculuq işlərinin uğurla reallaşdırılması sayəsində Şuşa ən qısa zamanda çiçəklənən diyara çevriləcək, tarixi-dini abidələrimiz yenidən bərpa olunaraq əvvəlki şöhrətinə qovuşacaq, soydaşlarımız öz ata-baba yurdlarına qayıdacaqlar. O zaman Vətən qarşısında öz vəzifəsini layiqincə yerinə yetirərkən düşmən gülləsinə tuş gələrək şəhidlik zirvəsinə ucalan qəhrəmanlarımızın ruhu da şad olacaq, üçrəngli Bayrağımız bu cənnətməkan diyarımızda, Azərbaycanın ruhunu yaşadan Şuşada əbədi dalğalanacaq.

Zahid Rza

İki sahil.- 2024.- 26 yanvar, №15.- S.5.