Bakı Ali Neft Məktəbinin yaradılmasından 14 il ötür

SOCAR-ın strukturunda yaradılan Bakı Ali Neft Məktəbi bu illər ərzində bir çox mühüm uğurlara imza atıb.

Bakı Ali Neft Məktəbinin hər cür şəraiti olan bir kampus binası və bir korpusu istifadəyə verilib.

Bakı Ali Neft Məktəbi ən yüksək keçid balına malik ali təhsil müəssisəsi kimi fərqlənir. BANM ilk qəbul aparılan ildə Dövlət İmtahan Mərkəzinin (DİM) tərtib etdiyi reytinq cədvəlində 51 ali təhsil müəssisəsi arasında lider kimi tarixə düşüb və uğurunu qoruyub.

BANM Prezident təqaüdçülərinin sayına görə Azərbaycan təhsil tarixində rekord göstərərək bir neçə ildir ardıcıl olaraq liderliyini qoruyur və bu il 36 Prezident təqaüdçüsü ilə rekordunu yeniləyib.

İlk ildə yalnız iki ixtisas üzrə qəbul həyata keçirilsə də, hazırda Bakı Ali Neft Məktəbi 9 ixtisas üzrə bakalavr, 8 ixtisaslaşma üzrə magistratura və 3 ixtisas üzrə doktorantura səviyyələrinə qəbul aparır.

İlk illər yalnız I ixtisas qrupu üzrə qəbul həyata keçirilsə də, son illər II ixtisas qrupunun Biznesin idarəedilməsi ixtisasında da qəbul aparılır və bu il ilk dəfə II ixtisas qrupu üzrə Maliyyə ixtisasına qəbul həyata keçirilib, İlk dəfə qəbul həyata keçirilməsinə baxmayaraq, bu qrup üzrə Prezident təqaüdçüsü olan 25 tələbənin məhz 12-si bu yeni açılmış ixtisasın tələbəsi olub.

Bakı Ali Neft Məktəbi əmək bazarının tələblərinə uyğun ixtisaslarda qəbul aparır. Bu il BANM-in təşəbbüsü ilə Azərbaycanda ilk dəfə Data analitikası ixtisasına qəbul həyata keçirilib. İlk il olmasına baxmayaraq, bu ixtisas da ən yüksək bal toplayan abituriyentlərin seçimi olub.

BANM-in məzunlarının işlə təmin olunma göstəricisi 100% təşkil edir və məzunlar SOCAR-da, müxtəlif transmilli şirkətlərdə, dövlət qurumlarında və nüfuzlu müəssisələrdə çalışırlar. Dövlət Məşğulluq Agentliyinin 2025-ci il statistikası da bunu təsdiqləyir.DMA-nın 2025-ci il üzrə məzunları ən çox iş tapan TOP 5 universitet siyahısında Bakı Ali Neft Məktəbi liderdir.

Bakı Ali Neft Məktəbi startaplar və innovasiyalar sahəsində də liderdir, tələbələr bu illər ərzində bir çox beynəlxalq və yerli yarışlarda uğur qazanıb və qalibiyyətlər əldə ediblər. Təkcə 2025-ci ildə 30-dan çox startap layihəsi təqdim olunub və 20-dən çox hakatonda qalibiyyət əldə edilib, “Teknofest 2025”də isə 1 qızıl, 1 gümüş, 2 bürünc medal və 4 xüsusi mükafat qazanaraq ən çox mükafat qazanan ali təhsil müəssisəsi olub.

Bu illər ərzində Bakı Ali Neft Məktəbinin beynəlxalq əlaqələri genişlənib və əcnəbi tələbələrin sayı əhəmiyyətli dərəcədə artıb. Bu il əcnəbi tələbələrin sayında 67% artım qeydə alınıb.

BANM Azərbaycan ali təhsil sistemində ilk dəfə olaraq ali təhsil proqramlarının ixracını həyata keçirməyə başlayıb. SOCAR və “Uzbekneftegaz” şirkəti arasında 18 iyul 2023-cü il tarixində imzalanmış Anlaşma Memorandumunun müddəalarından irəli gələrək BANM ilə Özbəkistan universitetləri arasındakı müqavilələrə əsasən, Özbəkistanın Daşkənd Kimya-Texnologiyası İnstitutu və Buxara Dövlət Texniki Universiteti arasında ikili diplom proqramı həyata keçirilir.

Hazırda bu ali təhsil müəssisələrindən 16 özbək tələbə Kimya mühəndisliyi ixtisasının magistratura səviyyəsinin 2-ci kursunda təhsil almaq üçün BANM-də tədrisə cəlb olunublar. Onlar həm təhsil aldıqları Universitetin, həm də Bakı Ali NeftMəktəbinin diplomuna sahib olacaqlar.

Bakı Ali Neft Məktəbi Konqoda insan kapitalının inkişafına dəstək göstərir. SOCAR və Konqo Milli Neft Korporasiyası (SNPC) arasında imzalanmış Anlaşma Memorandumuna əsasən, konqolu tələbələr BANM-də təhsil alır və məzun olduqdan sonra SNPC şirkətində çalışacaqlar.

2025-ci ildə BANM-in bütün akademik proqramları ilk dəfə olaraq beynəlxalq proqram akkreditasiyasına cəlb olunub. Bu proses Almaniyanın mühəndislik sahəsində nüfuz qazanmış ASIIN agentliyi tərəfindən aparılıb.

Bakı Ali Neft Məktəbi beynəlxalq reytinqlərdə uğurlar əldə edib və “Times Higher Education (THE) Impact Rankings 2025”də ölkə üzrə III yerdə, dünya universitetləri arasında isə 801–1000-ci yerlərdə qərarlaşaraq yüksək nəticəyə nail olub.

Bakı Ali Neft Məktəbinin tərkibində artıq Rəqəmsal Biliklər Liseyi fəaliyyətə başlayıb. Texniki biliklərin öyrədilməsinə üstünlük verilən bu orta təhsil müəssisəsi ilk ildən yüksək nəticələr göstərən şagirdlərin seçimi olub.

İki sahil .- 2025.- 2 dekabr ( №219). - S.7.