AZƏRBAYCAN QÜDRƏTLİ DƏNİZ DÖVLƏTİNƏ ÇEVRİLMƏKDƏDİR

Dünən Yeni Azərbaycan Partiyasının mərkəzi qərargahında mətbuat konfransı keçirən Dövlət Dəniz Administrasiyasının rəisi Qüdrət Qurbanov cari ildə görülən işlər və qarşıda duran vəzifələr barədə ətraflı məlumat verdi. Bildirdi ki, Azərbaycan Respublikasının Dövlət Dəniz Administrasiyası əsası 21 aprel 2001-ci il tarixdə ümummilli lider Heydər Əliyev tərəfındən qoyulmuş və bu siyasətin məntiqi davamı olaraq, Prezident İlham Əliyevin 20 aprel 2006-cı il tarixli fərmanı ilə təsdiqlənmiş “Əsasnamə”yə əsasən ölkə ərazisində dəniz nəqliyyatı sahəsində dövlət siyasətini və tənzimlənməsini həyata keçirən mərkəzi icra hakimiyyəti orqanı olaraq fəaliyyət göstərməkdədir.

“Dünya ticarət məhsullarının 80 faizdən artıq hissəsinin daşınması təhlükəsiz, maddi cəhətdən sərfəli və ətraf mühitə daha az mənfi təsir göstərməklə məhz dəniz nəqliyyatı vasitəsilə həyata keçirilir. Bu səbəbdən bütün dünya dövlətləri tərəfındən qəbul olunan və riayət edilən dənizçilik münasibətlərini tənzimləyən tələblərə və normalara daim ehtiyac yaranmışdır. Bu normaların effektiv fəaliyyət göstərən yalnız bir təşkilatda müzakirə olunaraq qəbul edilməsinin vacibliyi nəzərə alınaraq 1948-ci ildə Birləşmiş Millətlər Təşkilatının strukturuna daxil olan Beynəlxalq Dəniz Təşkilatı yaradılıb. Azərbaycan da məhz ümummilli lider Heydər Əliyevin səyi ilə 1995-ci ildən Beynəlxalq Dəniz Təşkilatının tam səlahiyyətli üzvüdür.”

Bildirildi ki, hazırda respublikamız dünyanın 182 dövlətinin üzvü olduğu BDT-nın dənizçilik sahəsində 20-dən artıq beynəlxalq dəniz konvensiyalarına qoşulub. Bu konvensiyaların tələblərinin gəmiçilik sahəsində fəaliyyət göstərən müəssisə, təşkilatlar və Azərbaycan bayrağı altında üzən gəmilər tərəfindən yerinə yetirilməsinə nəzarəti Dövlət Dəniz Administrasiyası həyata keçirir.

Q.Qurbanov ümummilli lider Heydər Əliyevin bütün sahələrdə olduğu kimi, dəniz nəqliyyatı kompleksinin inkişafı sahəsində də müstəsna rolu olduğunu xüsusi vurğuladı. Qeyd etdi ki, dəniz donanmasına malik keçmiş Sovet İttifaqı respublikalarının bir çoxunda donanmalar yox səviyyəsinə çatdırılmışdır. Ölkəmizdə isə ulu öndər Heydər Əliyevin uğurlu siyasəti nəticəsində iqtisadiyyatımızın strateji cəhətdən mühüm sahəsindən biri olan dəniz nəqliyyatı üzərində nəzarət saxlanmış və bu gün də qeyd edilən sahəyə diqqət və qayğı ulu öndərin layiqli davamçısı Prezident İlham Əliyev tərəfındən uğurla davam etdirilir. Bu diqqətin nəticəsidir ki, hazırda donanmada sərnişin bərələri, neft tankerləri, quru yük gəmiləri, boru kəməri çəkən, elmi-tədqiqat, qəza-xilasetmə, yedək və dalğıc gəmiləri, torpaqqazan və həmçinin analoqu olmayan iritonajlı kran gəmiləri mövcuddur. Bu da Azərbaycanı qüdrətli dəniz dövləti hesab etməyə əsas verir.

“Ümumiyyətlə, hazırda respublikamızda iqtisadiyyatın bütün sahələri ilə yanaşı dəniz nəqliyyatı sahəsinin də sürətli inkişafı, dövlətimizin tranzit nəqliyyat dəhlizlərinin formalaşmasında iştirak etməsi Prezident İlham Əliyevin gərgin əməyinin nəticəsi kimi qiymətləndirilməlidir” söyləyən Q.Qurbanov bildirdi ki, cənab İlham Əliyevin müvafıq sərəncamına əsasən yeni, müasir standartlara cavab verən Bakı Beynəlxalq Dəniz Ticarət Limanının tikilməsi ilə ölkəmizin beynəlxalq nəqliyyat dəhlizlərinin mühüm məntəqəsi kimi əhəmiyyətli rolu daha da artacaq.

Qeyd edildi ki, Bakı şəhərində nəqliyyat sisteminin təkmilləşdirilməsi üzrə Tədbirlər Planı öndə olmaqla paytaxtın müxtəlif növ nəqliyyat vasitələri ilə yüklənməsinin qarşısının alınması və ən vacib məsələlərdən biri, şəhərin ekoloji vəziyyətinin diqqətdə saxlanılmasıdır. lBununla əlaqədar dövlət başçısı İlham Əliyev tərəfindən verilmiş tapşırıq əsasında nəzərdə tutulmuş böyük İpək yolunun üstündə yerləşən Ələt qəsəbəsində müasir tələblərə cavab verən və Xəzəryanı dövlətlər arasında analoqu olmayan yeni liman kompleksinin tikilməsi üçün bir neçə xarici dövlətlərin mütəxəssisləri ilə birgə ciddi hazırlıq tədbirləri həyata keçirilib. Düşünürəm ki, öz strukturuna görə Avropanın tanınmış dəniz limanlarından geri qalmayan müasir liman kompleksi lazımdır. Qarşıda olan perspektivdə bu, Bakı-Tbilisi-Ceyhan layihəsinin həyata keçirilməsində əsas rollardan birini oynayan bir kompleks və Böyük İpək Yolunun əsas hissəsidir.”

Dövlət Dəniz Administrasiyasının rəisi söylədi ki, Prezident İlham Əliyevin tapşınğına uyğun olaraq müasir standartlar səviyyəsində gəmiqayırma zavodunun inşası da dəniz nəqliyyatı sahəsinin inkişafına yönəlmiş layihələrdəndir: “Zavodun tikintisi yeni sənaye sahələrinin yaradılmasında, mövcud sahələrin inkişafında əhəmiyyətli olacaq, Azərbaycanda mövcud infrastrukturun inkişafı və ölkənin ixrac potensialının artınlmasında da xüsusi önəm kəsb edəcək.”

Zavodun inşası üçün Dövlət Neft Şirkəti və Azərbaycan İnvestisiya Şirkətinin birgə yaradacağı müştərək müəssisə həm sifarişçi, həm də zavodun mülkiyyətçisi qismində çıxış edəcək. Bildirildi ki, ilkin hesablamalara əsasən, layihənin dəyəri təxminən 300-350 milyon dollar təşkil edəcək. Heydər Əliyev adına Bakı Dərin Özüllər Zavodunun ərazisində inşa olunacaq zavodun təxminən 2 - 3 ilə istismara verilməsi nəzərdə tutulur. Regionda ilk belə müasir zavodun yaranması Azərbaycanda və digər Xəzəryanı ölkələrdə yeni gəmilərin tikintisində, eləcə də mövcud gəmilərin təmirində xüsusi əhəmiyyətə malik olacaq. Zavodun tikintisinin ilkin mərhələsində 1400 -1700 yeni iş yerinin açılması nəzərdə tutulub.

O da bildirildi ki, Dövlət Dəniz Administrasiyası öz fəaliyyətində qabaqcıl ölkələrin dəniz nəqliyyatı sahəsində təcrübəsinin öyrənilməsinə və respubilkamızda tətbiqi məsələlərinə xüsusi diqqət yetirir. “Administrasiya çoxtərəfli əməkdaşlıq fəaliyyətini təkcə Beynəlxalq Dəniz Təşkilatı ilə deyil, həmçinin Beynəlxalq Əmək Təşkilatı, Avropa İttifaqının Avropa Dəniz Təhlükəsizliyi Agentliyi, Qara dəniz İqtisadi Əməkdaşlıq Təşkilatı və s. kimi beynəlxalq qurumlarla inkişaf etdirməkdədir. 2009-cu ilin aprelində Bakıda Dövlət dəniz Administrasiyasının və Beynəlxalq Dəniz Təşkilatının birgə təşkilatçılığı ilə ballast sularının idarə edilməsinə dair beynəlxalq seminar keçirildi. Seminarda Beynəlxalq Dəniz Təşkilatının ekspertləri ilə yanaşı Xəzəryanı dövlətlər olan Qazaxıstan, Türkmənistan, İran İslam Respublikası və Rusiya Federasiyasından nümayəndələr iştirak etdilər. Əsas məqsəd beynəlxalq dəniz daşımaları zamanı dəniz ətraf mühitinin mühafizəsi, gəmilər tərəfındən dənizin çirklənməsinin qarşısının alınması və dəniz bioloji mühitinin qorunub saxlanılması üzrə təcrübə mübadiləsinin aparılması, mövcud təcrübə bazasının təkmilləşdirilməsidir.”

Dövlət Dəniz Administrasiyasının rəisi hazırda bütün dünya dövlətlərini ciddi narahat edən dəniz quldurluğu ilə mübarizə sahəsində görülən işlər barədə də məlumat verdi. Bildirdi ki, BMT, BDT, NATO və digər təşkilatlarla əməkdaşlığı xüsusi vurğulamaq lazımdır. Dövlət Dəniz Administrasiyası daim bu sahədə normativ sənədlərin layihələrinin hazırlanmasında aktiv iştirak edir.

Sonda Dövlət Dəniz Administrasiyasının rəisi Q.Qurbanov media nümayəndələrini maraqlandıran sualları cavablandırdı.

Yeganə Əliyeva

İki sahil.- 2009.- 26 dekabr.- S. 6.