Nazir aktrisanı mükafatlandırdı

Azərbaycan Respublikasının Mədəniyyət və Turizm naziri Ə.Qarayev 60 illik yubileyini qeyd edən Azərbaycan Dövlət Musiqili Komediya Teatrının aktrisası Emma Məlikovanı teatr sahəsindəki xidmətlərinə görə mükafatlandırmışdır. Nazirin bu münasibətlə imzaladığı əmrdə Emma Məlikovanın yaradıcılığı yüksək qiymətləndirilmişdir.

Emma Məlikova 1978-82-ci illərdə Azərbaycan Dövlət Mədəniyyət və İncəsənət Universitetinin "Musiqili komediya aktyorluğu" fakültəsində təhsil almışdır. 1976-cı ildən Azərbaycan Dövlət Musiqili Komediya Teatrında çalışan aktrisa burada maraqlı, dolğun və özünəməxsus obrazlar yaratmağa nail olmuşdur. "Gözün aydın" tamaşasında Nargilə, "Hələlik"də Jalə, "Qızıl toy"da Ballı, "Özümüz bilərik"də Nabat, "50 yaşında cavan"da Kələk, "Hicran"da Qızbacı, "Talelər qovuşanda"da Leyla, "Qaynana"da Mülayim, "Kələkbazlar"da Səməni və s. kimi rollarda çıxış edən aktrisa bu gün də öz fəaliyyətini davam etdirir. Hazırda o, Azərbaycan Dövlət Musiqili Komediya Teatrının 100 illik yubileyi qarşısında hazırlanan "Şəhərdə manyak var!" (Əziz Nesin, Sərdar Fərəcov) tamaşasında Xumar rolu üzərində çalışır.

Teatrın kollektivi də yubiley münasibətilə aktrisanı təbrik etmiş və cənab nazirin diqqətindən məmnun qaldıqlarını bildirmişlər.

Vüsalə Ağamalıyeva

İki sahil.- 2009.- 3 fevral.- S. 8.