Ekoloji tarazlığın qorunması diqqət mərkəzindədir

Ətraf mühitin mühafizəsi, ekoloji tarazlığın qorunması daim dövlət siyasətinin vacib istiqamətlərindən biri olub. Prezident İlham Əliyev yaşıllaşdırma işlərinin genişləndirilməsini, ekoloji mühitin sağlamlaşdırılmasını öz fəaliyyətinin əsas istiqamətlərindən birinə çevirməklə bu sahədə mühüm tədbirlər həyata keçirir. Məhz bu zərurəti nəzərə alaraq dövlət başçısı 28 sentyabr 2006-cı ildə “Azərbaycan Respublikasında ekoloji vəziyyətin yaxşılaşdırılmasına dair 2006-2010-cu illər üçün Kompleks Tədbirlər Planı”nı təsdiqlədi və icrasına başlandı. Bununla da cənab İlham Əliyevin ölkədə ekoloji vəziyyətin sağlamlaşdırılması, yeni yaşıllıqların salınması ilə bağlı verdiyi tapşırıqların yerinə yetirilməsi sürətləndi.

Ölkə iqtisadiyyatının inkişafına öz töhfələrini verən neftçilər bu prosesdə də fəal iştirak edirlər. Belə ki, ARDNŞ-in idarə və müəssisələrində ekoloji tarazlığın, sağlamlığın qorunmasına xidmət edən tədbirlər daha da genişləndirilir.

ARDNŞ-in strukturlarından biri olan “Kompleks Qazma İşləri” Tresti “Qobustan” KQİİ bu işlərə xüsusi önəm verir. Ölkənin iqtisadi inkişafı, bunun nəticəsində respublikada aparılan geniş quruculuq və abadlıq işləri idarədə çalışan kollektivin əzmini daha da artırıb.

Qeyd edildiyi kimi, ətraf mühitin qorunması çirkləndirmə prosesinin zəifləməsinə yönəldilən bir sıra kompleks tədbirlər əhatə edir. Kompleks Tədbirlər Planında da bu fikir qeyd olunur ki, böyük neft-qaz yataqlarına malik olan Azərbaycanın ərazisində karbohidrogen ehtiyatlarının intensiv mənimsənilməsi zamanı ekoloji vəziyyətin yaxşılaşdırılması əsas diqqət göstərilən məsələlərdəndir. Dövlət başçısının bu fikirləri ekoloji məsələlərə daha diqqətlə və məsuliyyətlə yanaşmağı tələb edir. Proqramdan irəli gələn vəzifələrin yüksək səviyyədə yerinə yetirilməsində ARDNŞ və onun strukturlarının da üzərinə böyük məsuliyyət düşür. Belə ki, şirkətin strukturları neft və neft məhsulları ilə çirklənmiş ərazilərin təmizlənməsi, münbit torpaqla örtülməsi və yaşıllaşdırma işlərinin görülməsi istiqamətində nəzərdə tutulan tədbirlər planını lazımi səviyyədə yerinə yetirməyə çalışırlar.

2008-ci ildə Qobustan Kəşfiyyat Qazma İşləri İdarəsində ekologiya və ətraf mühitin mühafizəsi sahəsində bir çox işlər görülüb. Müvafiq intervallarda “Kimyəvi işlənmiş qazma məhlulu ilə qazma” gedişi zamanı 119 ton qazma xıltı (şlam) yaranıb. Yaranmış qazma xıltı mütəmadı olaraq, Ekologiya İdarəsinin “Tullantı Mərkəzi”nə təhvil verilib, tullantıya görə isə 14.818 manat ödəniş aparılıb.

Bakı şəhər Ərazi Ekologiya Departamentinin 8 may 2008-ci il tarixli yoxlaması sahəsində həmin idarəyə “çirkləndirici maddələr”in normadaxili atılmasına görə 1818 manat ödəniş aparılıb.

Mart və aprel aylarında tədbirlər planına uyğun olaraq idarənin inzibati binası ətrafında, sex və sahələrində ekoloji şəraiti yaxşılaşdırmaq məqsədi ilə yaşıllaşdırma işləri aparılıb və müxtəlif dekorativ ağaclar əkilib.

Qeyd edək ki, Qobustan KQİİ-nin “Ekoloji pasportu” və “Yol verilən atmosferə atılma həddi” normativ sənədi mövcud və sənəd 2010-cu ilə qədər qüvvədədir. Bütün ekoloji hesabatlar, Bakı şəhər Ekolgiya və Təbii Sərvətlər Departamenti ilə razılaşdırılaraq Kompleks Qazma İşləri» Trestinə təqdim olunub.

Həmçinin keyfiyyətə nəzarət məqsədilə İSO 9000 seriyalı Beynəlxalq Standartlar sisteminin tələblərinə uyğun olaraq “Kompleks Qazma İşləri” Trestinin “Keyfiyyət Əl Kitabı” və digər sənədlər artırılaraq idarənin müvafıq struktur bölmələrinə paylanılıb. Keyfiyyətə nəzarət məqsədilə 2008-ci ildə İSO 9000 seriyalı beynəlxalq sistemi idarəmizdə tam tətbiq edilib. Belə ki, xidmət sahələrində daxili audit keçirilib. Daxili auditin nəticələri rəhbərlik yanında müzakirə edilərək lazımi tədbirlər görülüb.

Məmmədağa Gözəlov

İki sahil.- 2009.- 11 fevral.- S. 5.