ARDNŞ-nin idarə və müəssisələrində iməcilik keçirilmişdir

Azərbaycan Respublikasının Prezidenti İlham Əliyevin rəhbərliyi altında ölkənin hər yerində genişmiqyaslı ekoloji tədbirlər həyata keçirilir. Prezidentin 28 sentyabr 2006-cı il tarixli Sərəncamı ilə təsdiq edilmiş “Azərbaycan Respublikasında ekoloji vəziyyətin yaxşılaşdırılmasına dair 2006-2010-cu illər üçün Kompleks Tədbirlər Planı”nda ARDNŞ-nin üzərinə mühüm vəzifələr qoyulmuşdur. Dövlət Neft Şirkəti həmin vəzifələrin yerinə yetirilməsi üçün məqsədyönlü iş aparır. Şirkətin Ekoloji Siyasət konsepsiyasında nəzərdə tutulan tədbirlər müvəffəqiyyətlə həyata keçirilir. Mədən torpaqlarının neftdən çirklənmədən tam həcmdə təmizlənməsi, mədən ərazilərində yaşıllıq zolaqlarının salınması ekoloji tədbirlər sırasında mühüm yer tutur. ARDNŞ-də artıq ənənə halını almış iməcilik tədbirlərinin davam etdirilməsi məqsədi ilə noyabrın 14-də Şirkətin idarə və müəssisələrində iməcilik keçirilmişdir. Məlum olduğu kimi, ARDNŞ Abşeron yarımadasının neftlə çirklənmiş ərazilərində ekoloji tarazlığın bərpası, rekultivasiya və reabilitasiya məqsədilə kompleks tədbirlər həyata keçirir. Bibiheybət mədən sahəsinin təmizlənməsi də bu baxımdan prioritet sahələrdəndir. Təsadüfi deyil ki, bu dəfəki iməcilikdə ARDNŞ Baş ofisinin, “Azneft” İstehsalat Birliyinin, Sərmayələr İdarəsinin, Qazma İşləri Trestinin və Ekologiya İdarəsinin əməkçiləri Bibiheybətdəki neftdən təmizlənmiş ərazilərdə 7 mindən çox ağac əkmişlər. Burada şam, sərv, eldar şamı, zeytun və Abşeron iqliminə uyğunlaşa bilən başqa növ ağaclar əkmişlər. ARDNŞ prezidenti Rövnəq Abdullayev, Şirkət rəhbərliyinin digər nümayəndələri iməcilikdə iştirak etmiş, ağac əkmişlər. ARDNŞ prezidentinə məruzə edilmişdir ki, Bibiheybət ərazisində indiyədək əkilmiş ağacların sayı 50 minə çatmışdır. Xatırladaq ki, Azərbaycan Respublikasının Prezidenti cənab İlham Əliyevin 2008-ci il 4 fevral tarixli Sərəncamına əsasən, Bibiheybətdə çirklənmədən təmizlənmiş və yaşıllığa bürünmüş 45 hektarlıq ərazidə ARDNŞ tərəfindən Neft Muzeyi yaradılacaqdır. Muzeyin konsepsiyasına görə, onun ərazisinin böyük bir hissəsini parklar təşkil etməlidir. 2007-ci ildən etibarən Bibiheybət ərazisində aparılan irimiqyaslı abadlıq işləri həm də bu məqsədə xidmət edir. ARDNŞ prezidenti Rövnəq Abdullayev, Şirkətin digər rəhbərləri noyabrın 14-də həmçinin Heydər Əliyev adına Bakı Dərin Özüllər Zavodunun və Qaz Emalı Zavodunun kollektivlərinin müəssisələrin yerləşdiyi Qaradağ rayonu ərazisindən keçən Salyan şossesinin kənarlarında keçirdikləri yaşıllaşdırma və abadlaşdırma işləri ilə də tanış olmuşlar. Həmin gün Xəzər Dəniz Neft Donanmasının kollektivi Gəmi Təmiri Zavodunun ərazisində, Heydər Əliyev adına Bakı Neft Emalı Zavodunun, “Azərneftyağ” NEZ-in, Şirkətin digər idarə və müəssisələrinin kollektivləri isə öz ərazilərində ekoloji tədbirlər həyata keçirmişlər. Noyabrın 14-də keçirilmiş yaşıllaşdırma tədbirlərində ümumilikdə 15 min ağac əkilmişdir.

Nail Rəhimzadə

İki sahil.- 2009.- 17 noyabr.- S. 5.