Dövlət müstəqilliyi Milli sərvətimizdir

Xalqımızın çoxəsrlik tarixinin ən parlaq günlərindən biri olan Dövlət Müstəqilliyi gününü qeyd edərkən respublikamızın ərazi bütövlüyü və müstəqilliyi uğrunda şəhid olmuş insanların ruhu qarşısında baş əyir, Tanrıdan onlara rəhmət diləyirik!

Xalqımız bir əsrdən də çox müddətdə milli azadlıq, müstəqillik qazanmaq arzusunda olmuşdur. Ancaq təəssüflər olsun ki, xalqın, ölkənin gələcəyi barədə düşünə bilməyən insanlar 1991-ci ildə belə bir fürsət yarandığı zaman ulu öndərin sözləri ilə desək, lbundan nəinki istifadə etməmişdilər, hətta istifadə etməkdən imtina etmişdilər.»

O dövrə qısa bir nəzər yetirək. 1991-ci ildə SSRİ dağılanda bir sıra respublikalar öz müstəqilliklərini elan edəndə Azərbaycan hakimiyyəti referendum keçirərək xalqın guya 76 faizinin Sovet İttifaqının saxlanması tərəfdarı olduğunu bildirdi. Bununla belə, müstəqillik, azadlıq!- hayqırtıları ilə meydanlara axışan xalqın ağzını yummaq üçün sentyabrın 8-də Ali Sovetin sessiyasında Azərbaycanın dövlət müstəqilliyini bərpa etmək haqqında bəyannamə qəbul edildi. Həmin bəyannamə iki həftə ərzində dövlət müstəqilliyi haqqında Konstitusiya Aktının qəbul edilməsini nəzərdə tutsa da hakimiyyətin səriştəsizliyi üzündən 48 gün, yəni oktyabrın 18-nə qədər, onun dərc olunması isə 20 gün yubadıldı.

Bütün bunlar göstərir ki, respublikanın o zamankı rəhbərləri dövlət müstəqilliyinə var gücü ilə müqavimət göstərir və onun artıq dağılmış SSRİ-dən çıxmasına hər vəchlə mane olurdu. Məlum həqiqətdir ki, müstəqilliyin ilk illərində Azərbaycanın başına gələn ağır bəlaların, o cümlədən, torpaqlarımızın Ermənistan tərəfindən işğalının əsas səbəbi, hətta dövlət müstəqilliyinin uçurum ağzına çatdırılması məhz Vəzirov, Mütəllibov kimi lrəhbərlərin», AXC-Müsavat başçılarının ölkənin, xalqın taleyinə biganəliyi, səriştəsizliyi, səriştəsiz fəaliyyətlərinin məntiqi nəticəsi idi. Xalq belə vəziyyətdən yeganə çıxış yolunu görkəmli siyasi xadim Heydər Əliyevi hakimiyyətə dəvət etməkdə gördü. Ulu öndər Heydər Əliyev xalqın tələbinə, dövlət müstəqilliyinin qorunub saxlanmasına biganə qalmayaraq 1993-cü ilin iyun ayında Bakıya gəldi. İyunun 15-də onun respublika rəhbəri seçilməsi ilə müstəqil dövlətçilik tarixinin yeni dövrü başlandı. Lakin dövlət müstəqilliyini gözü götürməyən, hakimiyyətə silah gücünə can atan qüvvələr Azərbaycanın azad, müstəqil şəraitdə yaşaması üçün Heydər Əliyevin göstərdiyi səylərə hər vəchlə mane olurdular. Bununla belə, ulu öndər iqtisadiyyatın inkişafına, xarici şirkətlərin Azərbaycana cəlb olunmasına, ordu quruculuğuna böyük diqqət yetirirdi. Belə ardıcıl səylər nəticəsini verdi. Dünyanın tanınmış şirkətləri ilə neft müqavilələri imzalandı, müstəqil dövlətimizin ilk Konstitusiyası qəbul edildi, prezident və parlament seçkiləri keçirildi, hüquqi dövlət quruculuğunu sürətləndirmək üçün qanunlar təsdiq olundu. Bütün bunlar ölkəmizin beynəlxalq nüfuzunu gücləndirdi, Azərbaycan dünyanın nüfuzlu təşkilatlarına üzv qəbul edildi.

Ulu öndərin dediyi bir fikir o illəri göz önünə gətirir 1991-ci ildə tarixi zərurətdən qazanılmış dövlət müstəqilliyi Azərbaycan xalqı üçün tarixi hadisə idi. Müstəqilliyin qorunub saxlanmasını onun əldə edilməsindən daha çətin olduğunu dəfələrlə bəyan etmiş ulu öndərv Heydər Əliyev deyirdi: lBiz bütün bu çətinliklərdən keçdik, bütün maneələrin qarşısını aldıq, Azərbaycanın düşmənlərinə layiqli cavablar verdik, ölkəmizin dövlət müstəqilliyini qoruduq, Azərbaycanı parçalanmaq təhlükəsindən xilas etdik. Azərbaycanın dövlət müstəqilliyini yaşadırıq və bundan sonra da yaşadacağıq!»

Dövlət müstəqilliyinin qorunub möhkəmləndirilməsi üçün ulu öndərin göstərdiyi fəaliyyət bu gün Prezident İlham Əliyev tərəfindən uğurla davam etdirilir. Azərbaycanda hüquqi, demokratik, dünyəvi dövlət quruculuğu yeni inkişaf mərhələsinə qədəm qoyub. Neft-qaz layihələrinin uğurla icrası, hakimiyyətin bacarıqlı əllərdə olması, ölkəmizin sülhsevər siyasətə sadiqliyi, iqtisadiyyatın inkişafına görə Azərbaycanın dünyada ön mövqeyə çıxması ölkəmizə beynəlxalq aləmdə böyük nüfuz qazandırıb.

Son 5 ildə Azərbaycanın dünyada mövqeyi möhkəmlənmiş, nüfuzlu xarici dövlətlərin ölkəmizlə iş birliyi qurmaq istəyi artmışdır. ABŞ Prezidenti Barak Obamanın iki gün əvvəl 18 oktyabr ÜDövlət Müstəqilliyi günü münasibətilə Azərbaycan Prezidenti İlham Əliyevə göndərdiyi təbrik teleqramında deyilən fikir məhz ölkəmizlə əməkdaşlığı davam etdirmək istəyinin ifadəsidir. Digər dövlətlərin başçılarından gələn təbrik teleqramlarında da bu istək xüsusi vurğulanır.

Hər bir Azərbaycan vətəndaşı üçün əziz olan dövlət müstəqilliyi bütövlükdə xalqımızın ən böyük milli sərvətidir. Əsrlər boyu müstəqillik həsrətində olan xalqımız milli azadlığını görüb sevinir, özünü dünyanın xoşbəxt xalqlarından biri hesab edir.

Müstəqillik günün mübarək, Azərbaycan!

Telman Qafar

İki sahil.- 2009.- 17 oktyabr.- S. 4.