Azərbaycan öz inkişafını uğurla davam etdirir

Nazirlər Kabinetinin 2009-cu ilin 9 ayının yekunlarına həsr olunmuş iclasında Prezident İlham Əliyevin giriş və yekun nitqlərində bu məsələ dönə-dönə vurğulanmışdır

Son illər Azərbaycanda iqtisadiyyatın inkişafı, əhalinin həyat səviyyəsinin yüksəlməsi, ölkə həyatının aparıcı sahələrində müşahidə olunan tərəqqi bu ilin 9 ayında uğurla davam etdirilmişdir. Təkcə Azərbaycanda deyil, artıq dünyanın ən nüfuzlu təşkilatlarında da etiraf olunan bu inkişaf sevindirici haldır. Prezident İlham Əliyevin nitqində deyildiyi kimi, xüsusilə ona görə ki, bu il dünyada hökm sürən maliyyə və iqtisadi böhran bir çox ölkələri çox ciddi tənəzzülə uğratdığı şəraitdə belə Azərbaycan öz inkişafını davam etdirmiş, ölkəmiz böhranın təsiri altına düşməmişdir. Azərbaycan rəhbərliyinin qabaqlayıcı tədbirlər görməsi, sosial-iqtisadi islahatlara geniş yer verməsi bu uğurun başlıca səbəbləridir.

Bu ilin 9 ayında iqtisadiyyatın əsas göstəricisi olan ümumi daxili məhsulun (ÜDM) 6,1 faiz artması ölkənin hərtərəfli inkişafı barədə aydın təsəvvür yaradır. Müqayisə üçün qeyd edək ki, 9 ayda ÜDM Rusiyada 14, Qazaxıstanda 1,5, Belarusda 4,6, Qırğızıstanda 12,7, Moldovada 24,6, Tacikistanda 11,4, Ukraynada 29,6 faiz azalmışdır.

9 ayda Azərbaycan sənayesində 5 faiz artım əldə olunmasını da dövlətimizin başçısı yüksək qiymətləndirərək sənayeləşmə siyasətinin artıq bəhrə verdiyini qeyd etdi. “Biz çalışırıq ki, sənaye sahəsində yeni müəssisələr işə salınsın. Bunun üçün xarici və daxili investisiyalar cəlb edilir. Bölgələrdə görülən işlər sənayenin inkişafına gözəl şərait yaradır. Söz yox ki, sənaye artımının təməlində, eyni zamanda dövlətin özəl sektora verdiyi güzəştli kreditlər də mühüm rol oynayır.”

Bu il Azərbaycanın kənd təsərrüfatında ən əsas göstəricilərdən biri rekord miqdarda - 3 milyon ton taxıl istehsal olunmasıdır. Bu, tarixi nailiyyətdir və ölkədə kənd təsərrüfatı sahəsində aparılan islahatların bariz nəticəsidir.

Dövlət başçısı Azərbaycanda makroiqtisadi sabitliyin dayanıqlı olmasının bir çox sahələrə, xüsusilə əhalinin həyat səviyyəsinin daha da yaxşılaşmasına mühüm təsir göstərdiyini xüsusi qeyd etdi. 9 ayda inflyasiyanın 2,1 faiz təşkil etməsi, məhsulların satış qiymətlərinin sabit qalması göstərir ki, maliyyə-iqtisadi böhranın insanların həyatına təsiri ötən aylarda minimum səviyyəyə enmişdir.

Hesabat dövründə əhalinin pul gəlirlərinin 10 faiz artmasını digər ölkələr üçün qibtə ediləcək hal kimi dəyərləndirən Azərbaycan Prezidenti İlham Əliyev qeyd etdi ki, “əhalinin 10 faiz pul gəlirlərinin artması, təxminən 2 faizlik inflyasiya-deməli, real artım templəri 8 faizdir. Böhranlı il üçün bu, hesab edirəm ki, dünya miqyasında nadir bir göstəricidir”.

Bu gün ölkəmizin valyuta ehtiyatlarının 19 milyard dollar səviyyəsinə çatması Azərbaycanın daha da inkişafı üçün çox böyük maliyyə təminatıdır. Bunun nəticəsidir ki, bütün sosial proqramlar icra olunur. Bu ilin 9 ayında orta əməkhaqqı 15 faiz artaraq 370 dollar həddinə çatmışdır. Pensiyalar artır, ünvanlı sosial yardım proqramı uğurla icra olunur. Neft-qaz gəlirləri ümumilikdə iqtisadiyyatın inkişafına, bu isə gəlirlərin öz növbəsində insan kapitalına çevrilməsinə, yoxsulluğun azaldılmasına xidmət edir.

Dövlət başçısı indiyədək görülmüş işlərə yekun vuraraq qeyd etdi ki, 2003-cü ildən bu günə qədər ölkədə 824 min yeni iş yerləri açılması əhalinin işlə təminatında böyük dönüş əmələ gətirmişdir. Bölgələrdə bu istiqamətdə işlər davam etdirilir. Gələn ilin dövlət büdcəsində bu məsələlər öz əksini tapmışdır. Belə ki, büdcə həm sosial yönümlüdür, həm də bir çox infrastruktur layihələrinin icrasını nəzərdə tutur.

Prezident İlham Əliyev məmnunluq hissi ilə qeyd etdi ki, Azərbaycanın elektrik enerjisi və yanacaq qazı ilə təminatı yüksək səviyyədədir, içməli su problemi artıq həllini tapmaq üzrədir. Bu il Sumqayıt Elektrik Stansiyası və “Cənub” Elektrik Stansiyası, Oğuz-Qəbələ-Bakı su kəməri istifadəyə veriləcək, İmişli-Parsabad elektrik xəttinin çəkilişi başa çatdırılacaq.

Prezident yekun nitqində qarşıda duran bir çox mühüm məsələlərə aydınlıq gətirdi. Bakının ekoloji baxımdan sağlamlaşdırılması, neftayırma zavodlarının və ətraf mühiti çirkləndirən digər sənaye müəssisələrinin şəhərdən çıxarılması, qaz və elektrik təsərrüfatlarının yenidən qurulması, yaşıllıq salınmasının genişləndirilməsi və digər məsələlərin həlli vacibliyi diqqətə çatdırıldı.

Nazirlər Kabinetinin ölkənin sosial-iqtisadi inkişafının yekunlarına həsr olunmuş hər yığıncağı Prezident İlham Əliyevin xalq qarşısında açıq hesabatına çevrilir. Bu mənada, 9 ayın yekunlarına dair iclasda dövlət başçısının giriş və yekun nitqləri istisna olmadı. Prezident öz nitqlərində Ermənistan-Azərbaycan, Dağlıq Qarabağ münaqişəsinin həlli ilə bağlı fikirlərini xalqa bir daha bəyan etdi və bildirdi ki, müharibə hələ bitməyib, biz milli maraqlarımızı istənilən yolla müdafiə edəcəyik.

Telman Qafar

İki sahil.- 2009.- 20 oktyabr.- S. 3.