Neftçilərin sosial rifahının yaxşılaşdırılması məqsədilə mühüm tədbirlər həyata keçirilir

“28 May” NQÇİ əməkçiləri üçün bir yaşayış binası tikilir, daha ikisinin inşası nəzərdə tutulmuşdur

Bir müddət bundan əvvəl Azərbaycan xalqı, neft sənayesinin zəhmətkeşləri böyük bir coşqu ilə ulu öndər Heydər Əliyevin şah əsəri - “Əsrin müqaviləsi”nin 15-illik yubileyini bayram etdilər. Xəzərin Azərbaycan sektorundakı “Azəri”, “Çıraq” yataqlarının və “Günəşli” yatağının suyun dərin sahəsində yerləşən hissəsinin işlənməsini və hasilatın pay bölgüsünü nəzərdə tutan bu Saziş ümummilli lider Heydər Əliyev dühasının məhsulu olan yeni neft strategiyasının həyata keçirilməsinin əsasını qoydu.

Böyük uzaqgörənliklə işlənib hazırlanmış ölkənin neft strategiyasının uğurla reallaşdırılması nəticəsində Azərbaycan iqtisadiyyatı dinamik və sürətlə inkişaf edir, xalqımızın rifah halı durmadan yüksəlir. Sosial sahədə qazanılan nailiyyətlər neft sektorunda özünü daha bariz şəkildə göstərməkdədir. Artıq üçüncü ildir ki, ARDNŞ-in idarə və müəssisələrində çalışan işçilərin sosial rifahının yaxşılaşdırılması məqsədilə 2007-2010-cu illər üçün təsdiq edilmiş sosial inkişaf proqramının icrası istiqamətində mühüm tədbirlər həyata keçirilir.

Görülən işlər barədə danışan “28 May” NQÇİ-nin rəisi Daşqın İskəndərov vurğulayır ki, Azərbaycan Respublikasının Prezidenti cənab İlham Əliyevin rəhbərliyi altında respublikamızda həyata keçirilən sosial yönümlü siyasət dənizdə neftqazçıxarmanın flaqmanı olan idarənin əmək kollektivi tərəfindən müsbət qarşılanır. Ölkəmizin əldə etdiyi önəmli uğurlardan ruhlanan dəniz neftçiləri də var qüvvə ilə çalışaraq respublikamızın qazandığı nailiyyətlərə öz töhfələrini verməkdədirlər. ARDNŞ və “Azneft” İstehsalat Birliyi rəhbərliklərinin yaxından köməyi ilə “28 May” NQÇİ-də sosial inkişafın bütün sahələrində köklü yenidənqurma və islahat işləri aparılır. .

Bu gün ölkəmizdə ekologiya məsələlərinə ciddi fikir verilir. ARDNŞ-də ekoloji problemlərin həlli yönümündə genişmiqyaslı tədbirlər həyata keçirilir. Həmin tədbirlərin tərkib hissəsi olaraq Çilov adasında növbəti KU-200 qurğusu quraşdırılmış, bioloji təmizləmə qurğusunun 2-ci buraxılış kompleksi işə salınmışdır. Hər gün dənizə axıdılan 20 ton çirkab su bioloji təmizləmə qurğusunda təmizlənərək, təzə quraşdırılmış suvarma sistemləri vasitəsilə ağacların suvarılmasına yönəldilir.

Çilovda Həmkarlar İttifaqı Komitəsinin inzibati binasında əsaslı təmir işləri aparılmış, bina HİK-in istifadəsinə verilmişdir. Daşqın müəllim neftçilərin yaşayış və istirahət şəraitini əsaslı yaxşılaşdırmaq məqsədilə 3 saylı yataqxananın binasının tikildiyini, obyektin artıq təhvil verilmək üzrə olduğunu söylədi. Yataqxanada yaşayış üçün zəruri olan avadanlıqların yarısı alınıb, qalanı isə alınma prosesindədır. İstilik sisteminin normal fəaliyyət göstərməsi üçün qazanxanadan yataqxanalara boru xətti çəkilmişdir, sistem işçi vəziyyətdədir. Qeyd olunmalıdır ki, qəsəbənin məscidində də təmir işləri aparılıb. Artıq inşaat işləri yekunlaşdırılaraq neftçilərin istifadəsinə verilmiş 2 saylı yataqxananın birinci mərtəbəsi ixtisaslaşdırılaraq bu gün xəstəxana kimi fəaliyyət göstərir, burada ixtisaslı həkimlər Çilov adası zəhmətkeşlərinin sağlamlığı keşiyində dayanırlar. DDÖ-lərdə və Çilov adasının obyektlərində mütəmadi olaraq həyata keçirilən dezinfeksiya işləri də insanların sağlamlığına xidmət edir. Çoxdandır ki, istifadəsiz qalmış boş bir bina isə idarənin daxili imkanları hesabına əsaslı təmir olunaraq klub kimi əməkçilərin istifadəsinə verilmişdir.

İşçilərin əmək şəraitinin yaxşılaşdırılması məsələlərinə də NQÇİ-də xüsusi diqqət verilir. Bu məqsədlə Quyuların Əsaslı və Yeraltı Təmiri Sexinin inzibati binası yeni quraşdırılmış tikinti kompleksinə köçürülüb.

“28 May” NQÇİ-nin kollektivi bütün həyatını Azərbaycanın çiçəklənməsinə, dövlət müstəqilliyinin əbədiliyinin və dönməzliyinin təmin edilməsinə həsr etmiş ümummilli lider Heydər Əliyevin xalqımız qarşısında xidmətlərini yüksək qiymətləndirir. Dəniz neftçilərinin ümummilli liderə sonsuz məhəbbətinin təzahürü olaraq idarənin inzibati binasında ulu öndərimizin əziz xatirəsini əks etdirən Heydər Əliyev guşəsi yaradılıb. İndi bu guşə neftçilərin adada ən çox ziyarət etdikləri bir məkana çevrilib.

Daşqın müəllim bildirir ki, dəniz özüllərində çalışan operatorların, çilingərlərin, elektriklərin, vışkaquraşdırıcıların, digər sənət sahiblərinin əməyinin səmərəliliyinin yüksəldilməsi Çilovdakı köməkçi sexlərdə çalışan insanların fəaliyyətindən çox asılıdır. Köməkçi sexlərin işçilərinin əmək şəraitini yaxşılaşdırmaq məqsədilə onların inzibati binaları idarənin daxili imkanları hesabına əsaslı təmir edilmişdir. Payız-qış mövsümünün yaxınlaşması ilə əlaqədar istilik xətləri tam təmir edilmiş və işlək vəziyyətə gətirilmişdir.

Sosialyönümlü fəaliyyətdən bəhs edən”28 May” NQÇİ-nin rəis müavini Ələddin Mürsəlov qeyd edir ki, Çilov adasındakı 10 saylı yeməkxana əsaslı təmir olunub, məişət avadanlıqları ilə təchiz edilib. Sosial-inkişaf şöbəsinin əməkdaşları DDÖ-lərdə yeməklərin keyfiyyətinə, çeşidinə və ərzağın saxlanma şəraitinə nəzarət edirlər. NQÇİ-də abadlığa, səliqə-sahmana da xüsusi diqqət verilir. Çilov adasının bütün ərazisində abadlıq işləri aparılmış, qəsəbə ərazisindəki metal tullantıları toplanaraq təhvil verilmişdir. Adanın yaşıllaşdırılması məqsədilə son il yarımda 2500 müxtəlif ağac və gül kolları əkilmişdir.

Açıq dəniz şəraitində çalışan neftçilərin iş və istirahət şəraitinə xüsusi diqqət yetirilir. 3 və 4 saylı DDÖ-lərin yaşayış blokları tam təmir olunub, işçilərin istifadəsinə verilmişdir. 10 saylı DDÖ-nün 2-ci və 3-cü mərtəbələri təmir olunub. Birinci mərtəbənin rekonstruksiya olunması üçün layihə-smeta sənədləri hazırlanır. Qazma işləri qurtarmış 5, 15 və 8-ci DDÖ-lərdə təmir işləri başlanmalıdır. 2, 9, 6, 11 və 14 saylı DDÖ-lərdə daxili imkanlardan istifadə edərək, cari təmir işləri gorülmüş, sanitar qovşaqları təmir olunmuşdur.

Payız-qış mövsümünün yaxınlaşması ilə əlaqədar bütün özüllər qızdırıcı radiatorlarla təmin edilib. Ümumiyyətlə, DDÖ-lərdə istilik sistemləri bərpa olunmuş, bütövlükdə hər bir özüldə məişət avadanlıqları, soyuducu kameralar, soyuducular, televizorlar, mətbəx avadanlıqları davamlı olaraq təmir edilir. 9 və 11 saylı DDÖ-lərə konteyner-refrejirator verilib. İşçilərin məişət şəraitini yaxşılaşdırmaq məqsədilə 10 ədəd paltaryuyan maşın alınaraq DDÖ-lərdə quraşdırılmışdır. Bütün DDÖ-lər və köməkçi sexlərin işçiləri təzə yataq ləvazimatları ilə təmin olunub. Özüllərin yeməkxanalarına isə təzə mətbəx avadanlıqları verilib. DDÖ-lərdə və Çilov adasında yerləşən sexlərdə zərərli işlərdə çalışan işçilər vaxtlı-vaxtında süd və süd məhsulları ilə təmin olunurlar.

Damba gəmi yanalma körpüsündə sərnişinlər üçün hər cür şəraiti olan gözləmə zalı tikilib və zəhmətkeşlərin istifadəsinə verilib. Dəniz neftçilərinin nəqliyyat problemlərinin həlli ilə bağlı digər bir məsələ - Çilov adasında vertolyot meydançasının yenidən qurulması üzrə də işlər görülməkdədir. Artıq layihə-smeta sənədləri işlənilmiş və 1 nüsxəsi “Neftqaztikinti” trestinə göndərilmişdir. Çilov adasında zabit heyəti üçün 10 ailəlik yataqxana binasının yenidən qurulması obyektinin də layihə-smeta sənədləri işlənilmişdir. Dəniz neftçiləri Çilov qəsəbəsinin sosial həyatı üçün böyük önəm daşıyan uşaq bağçasının və məktəbin idman zalının tikintisində böyük fəallıq göstərirlər. R.İbrahimov adına 131 saylı orta məktəbin idman zalının tikintisində hörgü işi başa çatdırılıb, dam örtüyünün çatı elementləri, yəni fermalar quraşdırılıb. 50 yerlik uşaq bağçasının tikinti-quraşdırma işlərinə də başlanıb, hörgü işləri yekunlaşıb, örtük panelləri və plastik pəncərələr qoyulub, dam örtüyünün çatı elementlərinin quraşdırılması işləri başa çatdırılıb.

Ələddin Mürsəlovun söhbətindən məlum olur ki, dəniz neftçilərinin mənzil şəraitinin yaxşılaşdırılması məqsədilə Xətai rayonu M.Hadi küçəsində 2944-cü məhəllədə 9 mərtəbəli yaşayış binası tikilir. 4 saylı 18 mənzilli bu yaşayış binasında hal-hazırda inşaat işləri davam etdirilir. Hörgü işləri başa çatdırılıb, qapı və pəncərələrin quraşdırılmasında, taxta döşəmənin vurulmasında son tamamlama işləri, balkonlarda kərpic arakəsmələrin hörülməsi və suvaq işləri aparılır. Yaxın gələcəkdə 2 bloklu 36 mənzilli və 3 bloklu 54 mənzilli binaların tikintisi də nəzərdə tutulur.

İlqar Məmmədli

İki sahil.- 2009.- 21 oktyabr.- S. 6.