Azərbaycan elektrik enerjisi ixrac edən ölkəyə çevrilib

Prezident İlham Əliyev Nazirlər Kabinetinin bu ilin 9 ayının yekunlarına həsr olunmuş iclasındakı nitqində Azərbaycan energetikasının əldə etdiyi böyük uğurları yüksək qiymətləndirmişdir

Öndər Heydər Əliyevin 1970-1980-ci illərdə iqtisadiyyatın ən mühüm sahələrindən biri olan elektroenergetikanın inkişafı üçün gördüyü işlər Azərbaycanın müstəqillik dövründə öz tələbatını ödəməsi üçün real zəmin yaratmışdır. Məhz o illərdə Mingəçevirdə Zaqafqaziyada ən iri Azərbaycan Dövlət Rayon Elektrik Stansiyası tikilərək istifadəyə verilmiş, mövcud stansiyalar modernləşdirilərək gücləri artırılmış, Şəmkirdə Yenikənd SES-in tikintisinə başlanmış, Bakıda istilik -elektrik mərkəzləri yenidən qurulmuşdur. Xatırlatmaq yerinə düşər ki, 1996-cı ildə ulu öndər Heydər Əliyev Yenikənd Su Elektrik Stansiyasının yarımçıq qalmış tikintisinin başa çatdırılmasını təmin etdi. Beləliklə, 1993-2003-cü illərdə yaradılmış 700 meqavatlıq energetika gücləri hesabına ölkənin ümumi energetika potensialı 3 min meqavatı ötdü.

Azərbaycan elektrik təsərrüfatının yenidən qurulması, müasir stansiyaların inşası Prezident İlham Əliyevin ölkəyə rəhbərliyi dövründə yeni qüvvə ilə davam etdirildi. Dünyada enerji təhlükəsizliyinin ən əsas problemlərdən birinə çevrildiyi vaxtda dövlət başçısı İlham Əliyev respublika energetikasının inkişaf strategiyasını müəyyən etdi. Bu strategiya ölkənin enerji potensialını 5 min meqavata çatdırmağı nəzərdə tutur.

Prezident tapşırığına uyğun olaraq, müasir tələblərə cavab verən 7 elektrik stansiyasının təməli qoyuldu. Son 5 ildə Astarada, Xaçmazda, Şəkidə, Naxçıvanda, Bakıda, Səngəçalda, Qubada modul tipli elektrik stansiyaları tikilib istifadəyə verilmiş, Sumqayıtda və digər bölgələrdə yeni stansiyaların inşasına başlanmışdır. Sumqayıt və “Cənub” elektrik stansiyalarının işə düşməsi ilə Azərbaycanın enerji gücü təqribən 1300 meqavat artacaqdır.

Prezident İlham Əliyev Nazirlər Kabinetinin iclasındakı nitqində energetiklərin işini yüksək qiymətləndirərək qeyd etdi ki, Azərbaycanı qonşu ölkələrlə birləşdirən elektrik xətləri yenidən qurulur, bu yaxınlarda İmişli-Parsabad elektrik xəttinin əsaslı təmiri başa çatacaq. Dövlətimizin rəhbəri qeyd etdi ki, bu iş görüldükdən sonra İrana 700 meqavat gücündə elektrik enerjisi ixrac etməyimizə imkan yaranacq.

Azərbaycanı Gürcüstanla birləşdirən elektrik xətləri də yenidən qurulur.

Azərbaycanla Rusiya arasında bu sahədə əməkdaşlığa toxunan Prezident İlham Əliyev xatırlatdı ki, əvvəllər biz Rusiyadan daha çox enerji idxal edirdik. İndi isə Azərbaycan özü nəinki İrana, Türkiyəyə və Gürcüstana, hətta Rusiyaya da elektrik enerjisi ixrac edir. Bu isə o deməkdir ki, Azərbaycan öz tələbatını tam ödəməklə bərabər, elektrik enerjisi ixrac edən ölkəyə çevrilmişdir.

Dövlətin məqsədyönlü iqtisadi siyasəti bu məsələdə başlıca rol oynayır.

Hazırda Prezident İlham Əliyevin tapşırıqları əsasında respublikanın, o cümlədən Bakının energetika sistemində ötürücü və paylayıcı şəbəkənin yenidən qurulması, qış aylarına hazırlıq diqqət mərkəzindədir. Dövlət başçısının Prezident Fondundan ayırdığı 12 milyon manat vəsait hesabına enerji təsərrüfatı kompleks şəkildə inkişaf etdirilir. Son bir ildə 30 yarımstansiya, 78 transformator məntəqəsi inşa edilmiş, köhnə energetika qurğuları və xətləri dəyişdirilmişdir. Fransa, İngiltərə, Almaniya, Türkiyə, İsveçrə, Ukrayna və digər ölkələrin avadanlıq və texnologiyalarının tətbiqi paytaxtın energetika sistemini müasir səviyyəyə qaldırmışdır.

Bu proses uğurla davam etdirilməkdədir.

Prezident İlham Əliyevin nitqində vurğulanan bir məqam budur ki, dağ çaylarının üzərində elektrik stansiyaları qurmaq, külək və günəş enerjisindən istifadə etməklə alternativ enerji mənbələri yaratmaq bu gün təxirəsalınmaz vəzifələrdir.

Azərbaycan energetikləri Prezident İlham Əliyevin bu tapşırıqlarını layiqincə yerinə yetirmək əzmində olduqlarını 20 oktyabrda keçirilən energetiklərin peşə bayramı günündə bir daha nümayiş etdirdilər.

Telman Qafar

İki sahil.- 2009.- 22 oktyabr.- S. 2.