2011-ci ilin dövlət büdcəsi sosialyönümlüdür

Oktyabrın 13-də keçirilən Milli Məclisin iclasında "Azərbaycan Respublikasının 2011-ci il dövlət büdcəsi haqqında" qanun layihəsinin müzakirəsi davam etdirildi. Milli Məclisin Sədri Oqtay Əsədov iclası açıq elan etdikdən sonra bu layihəyə münasibət bildirən deputat Musa Quliyev qeyd etdi ki, 2011-ci ilin dövlət büdcəsi ölkəmizdə neçə illərdir yaşanan dinamik inkişafın bundan sonra da davam edəcəyini təsdiqləyir. O, gələn il Azərbaycan iqtisadiyyatının inkişafının daha da güclənəcəyini, büdcənin isə investisiya və sosialyönümlü xarakter daşıdığını vurğuladı, sosial sahələrin proqramlar şəklində maliyyələşdirilməsinin yüksək effekt verdiyini diqqətə çatdırdı.

Deputat Aydın Mirzəzadə 2011-ci il dövlət büdcəsinin qanunuvericiliyin tələblərinə uyğun hazırlandığını, balanslaşdırılmış xarakter daşıdığını və bütün vacib sahələri əhatə edən ciddi sənəd olduğunu bildirdi və qeyd etdi ki, dövlət büdcəsinin hazırlanması yüksək peşəkarlıq tələb edir: "Azərbaycan iqtisadiyyatı dünya iqtisadiyyatının ayrılmaz bir hissəsidir. İki ildir ki, dünyada qlobal maliyyə-iqtisadi böhran davam edir. Böhranın nə vaxt sona çatacağı dəqiq məlum deyil. Bununla belə, böhran Azərbaycan iqtisadiyyatına, vətəndaşlarına təsir göstərməyib".

Deputat Azərbaycanın müharibə şəraitində olması və ərazilərinin 20 faizinin hələ də işğal altında qalması fonunda gələn il üçün ölkənin müdafiə xərclərinə böyük miqdarda vəsait ayrılmasını müsbət dəyərləndirdi. Qeyd etdi ki, ildən-ilə Azərbaycan büdcəsinin formalaşmasında qeyri-neft sektorunun xüsusi çəkisi artır: "Azərbaycanda dünya standartlarına cavab verən büdcə hazırlamaq praktikası formalaşıb". Aydın Mirzəzadə əməkhaqlarının artırılması sahəsində mövcud praktikanın bundan sonra da davam etdirilməsinin vacibliyini qeyd etdi.

Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov xatırlatdı ki, bundan öncə Azərbaycanın xaricdə fəaliyyətinin təşkilinin daha effektli qurulması üçün ayrılan büdcə vəsaitinin artırılmasına dair təşəbbüs irəli sürülüb və müvafiq təkliflər verilib: "Bu gün dövlət büdcəsinə diqqət yetirdikdə hər bir maddə üzrə artım olduğu nəzərə çarpır. Xarici İşlər Nazirliyinin həm ölkə daxilində işini təşkil etməsinə, həm də xaricdə fəaliyyətini qurmasına dair hökumət lazım olan miqdarda artımlar edib. Azərbaycan səfirlikləri və konsulluqlarının saxlanması üçün 51 milyon manat, xaricdə Azərbaycanla bağlı tədbirlərin keçirilməsinə 34 milyon manat ayrılması nəzərdə tutulub. Ölkəmizdə də beynəlxalq tədbirlərin keçirilməsi ilə bağlı ayrılacaq vəsaitin miqdarı artırılıb. Ümumilikdə, Azərbaycanın xarici siyasətinə təxminən 100 milyon manat ayrılır ki bu da çox böyük vəsaitdir".

Deputat Yevda Abramov əsası ulu öndər Heydər Əliyev tərəfindən qoyulan və Prezident İlham Əliyevin yaradıcılıqla davam etdirdiyi iqtisadi inkişafın Azərbaycana daim yeni uğurlar qazandırdığını bildirdi. Qeyd etdi ki, gələn il üçün büdcə layihəsində Azərbaycanın inkişaf dinamikası aydın hiss olunur. Büdcənin sosialyönümlü xarakterinə diqqət çəkən deputat onun ölkə vətəndaşlarının layiqli həyat tərzinin təmin etməsinə imkan verdiyini də vurğuladı. Deputat büdcədən maliyyələşən təşkilatlarda əməkhaqlarının bir qədər də artırılmasını təklif etdi.

Deputat Yaqub Mahmudov Azərbaycanda artıq düzgün büdcə siyasətinin formalaşdığını bildirdi. Qeyd etdi ki, büdcənin gəlir və xərcləri Azərbaycanın iqtisadi qüdrətini göstərir. Yeni büdcə layihəsinin Azərbaycanın daha sürətli inkişafına təminat verdiyini bildirən deputat onun sosialyönümlü xarakter daşımasının böyük əhəmiyyət kəsb etdiyini bildirdi. Qeyd etdi ki, gələn ilin büdcəsindən səhiyyə və təhsilə ayrılan xərclərin miqdarı yenə də artırılıb və bu, Prezident İlham Əliyevin insan kapitalına nə dərəcədə yüksək əhəmiyyət verməsinin bariz göstəricisidir.

Parlamentin Elm və təhsil komitəsinin sədri Şəmsəddin Hacıyev bildirdi ki, büdcə layihəsi qanunvericiliyə uyğun şəkildə tərtib olunmuş mükəmməl bir sənəddir: "Layihə Azərbaycanın bugünkü iqtisadi və sosial inkişafının reallıqları, xüsusilə dünya bazarlarında böhrandan sonrakı dövrdə qərarlaşmış vəziyyət gözlənilən dəyişiklik və perspektivlər nəzərə alınmaqla tərtib olunmuşdur. Büdcə elmi proqnozlara əsaslanır, onun həm sosial, həm də investisiya yönümlülüyünün saxlanılması təqdirəlayiqdir. Büdcədən elm və təhsilə, hərbi xərclərə ayrılan vəsaitin həcminin artması da müsbət haldır".

Milli Məclisin Aqrar siyasət komitəsinin sədri Eldar İbrahimov bildirdi ki, Azərbaycan dinamik və sabit inkişafını 2011-ci ildə də davam etdirəcək: "Dövlət büdcəsində böyük maraq doğuran və xüsusi diqqət çəkən məqamlardan biri sosial məsələlər üçün nəzərdə tutulan vəsaitlərdir. Təqdirəlayiq haldır ki, hər il olduğu kimi, 2011-ci ildə də hökumət bu sahəyə böyük diqqət göstərib. Gələn ilin dövlət büdcəsində sosialyönümlü xərclərin xüsusi çəkisinin 33,3 faiz təşkil etməsi bunun real təsdiqidir.

Gələn il sosial məsələlər üçün ayrılan vəsaitin miqdarı indiki illə müqayisədə 341,8 milyon manat və ya 8,8 faiz çoxdur. Ümumilikdə, dövlət büdcəsindən gələn il üçün bu məqsədlə ayrılan vəsaitin miqdarı 4 milyard 234 milyon manat təşkil edəcək". Eldar İbrahimov investisiya məqsədilə ayrılan vəsaitin də miqdarının artırılmasını müsbət hal kimi xarakterizə etdi.

Deputat Mirkazım Kazımov Azərbaycanda iqtisadi artım tempinin qorunub saxlandığını və bunun büdcədə öz əksini tapdığını bildirdi. Qeyd etdi ki, bu nailiyyətlərə Prezident İlham Əliyevin çevik iqtisadi siyasəti nəticəsində nail olunub. O, xarici ticarət dövriyyəsinin həcminin artdığını, iqtisadi artım dinamikasının yüksəldiyini, qeyri-neft sektorunun daha sürətlə inkişaf etdiyini bildirdi. Deputat Məjlum Şükürov da büdcə zərfinin yüksək peşəkarlıqla hazırlandığını bildirdi. Qeyd etdi ki, gələn ilin dövlət büdcəsi ölkə qarşısında duran strateji hədəflərə çatmaq üçün zəruri təminat yaradır. Onun həmkarı Fuad Muradov gələn ilin dövlət büdcəsi layihəsinin Azərbaycanın güc və qüdrətinin real göstərici olduğunu bildirdi. Deputat Jalə Əliyeva vurğuladı ki, Prezident İlham Əliyev tərəfindən təkcə bu günə yox, həm də gələcəyə hesablanmış siyasət yürüdülür. Bunun nəticəsidir ki, Azərbaycan inkişaf göstəricilərinə görə dünyanın öndə gələn dövlətləri sırasında yer alır. Gələn ilin büdcə layihəsi ölkəmizin tərəqqi dinamikasının yüksək olduğunu göstərir. Deputat Qənirə Paşayeva ötən il özünün zirvə nöqtəsinə çatan qlobal maliyyə böhranının Azərbaycana minimal təsir göstərdiyini və bunun həyata keçirilən iqtisadi siyasətin düzgünlüyünün real nəticəsi kimi çıxış etdiyini bildirdi.

Milli Məclis Sədrinin müavini Valeh Ələsgərov büdcə layihəsində makroiqtisadi göstəricilərə diqqət yetirilməsinin vacibliyini bildirdi. Qeyd etdi ki, makroiqtisadi göstəricilərə nəzarət, onların sabitliyinin qorunması dövlət büdcəsinin peşəkarlıqla hazırlanmasından və iqtisadiyyatın dayanıqlılığından xəbər verir: "Hökumətin son illərdə təqdim etdiy büdcə layihələrinin ən önəmli cəhətlərindən biri də ondan ibarətdir ki, hər bir rəqəmin arxasında makroiqtisadi sabitliyin qorunub saxlanması və onlara nəzarət məsələsi durur. Gələn ilin büdcə layihəsi də sözügedən prinsip əsasında hazırlandığı üçün onun qəbul edilməsində heç bir problem yoxdur". Valeh Ələsgərov qeyd etdi ki, büdcənin formalaşması zamanı neft gəlirlərindən istifadə edilməsi də müsbət nəticələr verir və iri infrastruktur layihələri həyata keçirilir. Eyni zamanda, qeyri-neft sektorunun inkişafı üçün lazımi zəmin hazırlanır, müvafiq işlər görülür.

Deputatların qaldırdığı məsələlərə münasibət bildirən maliyyə naziri Samir Şərifov qeyd etdi ki, Prezident İlham Əliyevin rəhbərliyi altında Azərbaycanın inkişafı artıq müəyyən büdcə tarazlığına gətirib çıxarıb: "Dövlət başçısının qeyd etdiyi kimi, artıq Azərbaycanda oturuşmuş bir büdcə mövcuddur. Sözsüz ki, 2011-ci ilin büdcəsi də bu reallıqları özündə əks etdirir. Büdcənin həm gəlirlərinin, həm də xərclər hissəsinin artım templəri iqtisadi reallıqlardan irəli gəlir. Büdcədə əsas hədəf ondan ibarətdir ki, makroiqtisadi sabitlik qorunub saxlansın, ölkə qarşısında duran əsas vəzifələrin icrası təmin edilsin. Bununla yanaşı, ən vacib məsələlərdən biri əhalinin maddi rifahının yüksəlməsidir. Bu istiqamətdə də işlər aparılır. Bir sıra xarici dövlətlərdə büdcələr ixtisar olunur, pensiyalar və əməkhaqları azaldılır və bu da qlobal maliyyə-iqtisadi böhranın nəticələridir. Azərbaycanda isə 2010-cu ilin sentyabrında Prezident İlham Əliyev tərəfindən əməkhaqları və pensiyaların artırılması üçün müvafiq sərəncamlar verilmişdir. Bu da həyata keçirilən iqtisadi siyasətin məqsədyönümlülüyünün göstəricilərindən biridir". Samir Şərifov büdcə təsnifatı ilə bağlı deputatların toxunduğu digər məsələlərə də aydınlıq gətirdi.

İqtisadi inkişaf naziri Şahin Mustafayev də deputatlar tərəfindən qaldırılan məsələlərə münasibətini bildirdi. O dedi ki, Sahibkarlığa Kömək Milli Fondu Prezident İlham Əliyev tərəfindən müəyyən edilmiş sosial-iqtisadi inkişaf strategiyasına uyğun olaraq hazırlanmış xüsusi proqramlar əsasında fəaliyyət göstərir: "Məqsəd Azərbaycanın regionlarının sosial-iqtisadi inkişafına təkan verməkdir. Ayrılan vəsaitlərin 99,8 faizi məhz regionların payına düşüb. Bu məlumat cari ilin ilk 8 ayının göstəricilərinə əsasən hazırlanıb. Eyni zamanda, bu tendensiya keçən illər ərzində də müşahidə olunub. Regionların hər birinin iqtisadi inkişaf potensialı, ehtiyacı İqtisadi İnkişaf Nazirliyi tərəfindən dərindən öyrənilir".

Şahin Mustafayev sahibkarlığın dinamik inkişafının davam etdirilməsi üçün müvafiq tədbirlərin həyata keçirildiyini qeyd etdi. Nazir deputatların qaldırdığı digər məsələlərə də aydınlıq gətirdi.

Daha sonra gündəliyin digər məsələsi olan "Azərbaycan Respublikasının Dövlət Sosial Müdafiə Fondunun 2011-ci il büdcəsi haqqında" qanun layihəsi müzakirəyə çıxarıldı. Məsələ ilə əlaqədar çıxış edən parlamentin Sosial siyasət komitəsinin sədri Hadi Rəcəbli qeyd etdi ki, hələ də fəsadları davam edən qlobal maliyyə böhranı və bu böhranın özünü sosial-iqtisadi tənəzzüldə göstərməsinə baxmayaraq, Azərbaycanın sosial həyatında bu problem hiss olunmur: "Azərbaycanda makroiqtisadi sabitliyin qorunması istiqamətində Prezident İlham Əliyevin apardığı ardıcıl siyasət nəticəsində qlobal böhranın təsirləri ölkəmizdə minimal xarakter daşıyıb. Azərbaycanda əhalinin sosial müdafiəsi və sosial təminatı sistemində köklü islahatlar həyata keçirilir".

Hadi Rəcəbli bildirdi ki, sığortanın həmrəylik prinsipindən fərdi uçot qaydalarına keçməsi, sığorta sisteminin müavinətlər sistemindən tamamilə ayrılması, əhaliyə ödənişlərin bankomatlar vasitəsilə çatdırılması sistemin mərkəzi kompüter qovşağı ilə idarə olunması və digər yeniliklər Azərbaycanın dünyaya inteqrasiyasının göstəricisidir və bu, modernləşən Azərbaycan reallıqlarına cavab verir: "Gələn il üçün Dövlət Sosial Müdafiə Fondunun büdcəsinin mədaxil hissəsi 1 milyard 970 milyon 540 min manat təşkil edir. Onun məxaric hissəsi də göstərilən həcmdədir. Sözügedən rəqəm cari ilin göstəricisindən təxminən 12,1 faiz çoxdur. DSMF büdcəsinin mədaxil hissəsi əsasən məcburi sosial sığorta yığımları hesabına formalaşdırılır". Hadi Rəcəbli dövlət büdcəsindən Fonda ayrılacaq transfertlərin həcminin 691 milyon manat olacağını vurğuladı. Bildirdi ki, gələn ilin əmək pensiyalarının orta aylıq məbləği 118 manat təşkil edəcək və bu, cari ilin analoji göstəricisindən 14 manat çoxdur. Qeyd etdi ki, görülən işlər nəticəsində pensiyalar və sosial sığorta sistemi ilə bağlı vətəndaş şikayətləri son 5 ildə orta hesabla 2,3 dəfə azalıb: "Bu rəqəm görülən işlərin səmərəliliyindən xəbər verir".

Dövlət Sosial Müdafiə Fondunun sədri Səlim Müslümov bildirdi ki, Prezident İlham Əliyev tərəfindən həyata keçirilən siyasət makroiqtisadi sabitliyə yönəlmişdir. İqtisadiyyatın dinamik inkişafı ölkə vətəndaşlarının maddi rifahını nəzərəçarpacaq dərəcədə yüksəltməklə yanaşı, sosialyönümlü bazar iqtisadiyyatının formalaşması ilə bağlı əhalinin bütün təbəqələrinin həyat səviyyəsinin yaxşılaşdırılması üçün mümkün zəruri tədbirləri gerçəkləşdirir: "Qlobal maliyyə böhranının davam etdiyi, əksər ölkələrdə sosial-iqtisadi göstəricilərin aşağı düşdüyü bir dövrdə cari ilin yanvar-avqust aylarında ölkəmizdə əhalinin pul gəlirləri ötən ilin müvafiq dövrü ilə müqayisədə 10,2 faiz, adambaşına düşən gəlir 9,8 faiz, pensiyaya hesablanmış orta aylıq əməkhaqqı 5,7 faiz, əmək pensiyasının tarif məbləği isə 11,1 faiz artmışdır". Səlim Müslümov cari ilin 9 ayı üçün Dövlət Sosial Müdafiə Fondunun gəlirləri və xərcləri barədə də məlumat verdi: "Fondun gələn il üçün nəzərdə tutulan büdcə layihəsinin tərtib edilməsi zamanı Prezident İlham Əliyevin 2009-cu il dekabrın 30-da müvafiq sərəncamı ilə təsdiq edilmiş "2009-2015-ci illərdə Azərbaycan Respublikasında sığorta pensiya sisteminin inkişafına dair Dövlət Proqramı" ilə müəyyən olunmuş əsas məqsəd və vəzifələr, eləcə də ölkə iqtisadiyyatının başlıca inkişaf meyilləri və proqnozları, Dövlət Sosial Müdafiə Fondunun 2010-cu il büdcəsinin icrası üzrə gözlənilən nəticələr, ölkənin demoqrafik inkişaf meyilləri və sığorta pensiya sistemində baş vermiş, nəzərdə tutulan dəyişikliklər əsas götürülmüşdür". Səlim Müslümov layihədə Dövlət Sosial Müdafiə Fondunun gəlir və xərclərinin balans təşkil etdiyini bildirdi. Onun sözlərinə görə, gələn il üçün Dövlət Sosial Müdafiə Fondunun büdcəsinin gəlir və xərclərinin 1 milyard 970 milyon 540 min manat təşkil edəcəyi planlaşdırılır: "Bu isə cari ilin büdcəsi ilə müqayisədə 12,1 faiz çoxdur. Gələn il ərzində əhaliyə ödənişlərin miqdarı bütün xərclərin 97,3 faizini təşkil edəcək. Bu isə 2010-cu ilin büdcəsinə nisbətən 229,4 milyon manat və ya 13,6 faiz çoxdur". Dövlət Sosial Müdafiə Fondunun sədri onu da qeyd etdi ki, maliyyə ödənişlərinin 1 milyard 853 milyon manatını və ya 96,6 faizini pensiya xərcləri, 64,6 milyon manatını və ya 3,4 faizini sosial müavinət xərcləri təşkil edəcək.

Qısa fasilədən sonra "Azərbaycan Respublikasının Dövlət Sosial Müdafiə Fondunun 2011-ci il büdcəsi haqqında" qanun layihəsi müzakirə olundu. Milli Məclisin Sosial siyasət komitəsi sədrinin müavini Musa Quliyev DSMF-nin 2011-ci il büdcəsinin qanunvericiliyin tələblərinə uyğun hazırlandığını dedi. Eyni zamanda Musa Quliyev sığortaolunanların sanatoriya-kurort müalicəsi və sağlamlaşdırma tədbirlərinin həyata keçirilməsi üzrə Azərbaycan Həmkarlar İttifaqları Konfederasiyası vasitəsilə maliyyələşdirilən xərclərin 13 milyon manatdan 15 milyon manata çatdırılmasını da təklif etdi.

Deputatlardan Gülər Əhmədova və Qənirə Paşayeva vətəndaşlara pensiyaların verilməsi məsələsinə toxunaraq bankomatların sayının artırılmasının vacibliyini bildirdilər.

Deputat Siyavuş Novruzov dedi ki, bu gün Azərbaycanda dövlətin sosial siyasəti uğurla həyata keçirilir. Pensiyaçılar pensiyalarını vaxtında alırlar, eləcə də mütəmadi olaraq pensiyalar artırılır. DSMF-nin növbəti il üçün də büdcəsi təkmil hazırlanıb və vətəndaşların maraqlarına cavab verir.

Deputat Fəzail İbrahimli bildirdi ki, DSMF-nin 2011-ci il üçün büdcəsi iqtisadi və elmi cəhətdən kifayət qədər əsaslandırılıb. Layihə Azərbaycan cəmiyyətinin inkişafına uyğun hazırlanıb. Fəzail İbrahimli son illərdə Azərbaycanın sosial təminat sistemində çox ciddi islahatlar aparılmasını, pensiyaların verilməsində müasir standartların tətbiq olunmasını təqdir etdi.

Milli Məclis Sədrinin müavini Valeh Ələsgərov vətəndaşların pensiya təminatı ilə və DSMF-nin büdcəsinə transfertlə bağlı fikirlərini bildirdi.

Deputatlardan Əhməd Vəliyev, Baba Tağıyev, İlyas İsmayılov, Cəmil Həsənli qanun layihəsi ilə bağlı çıxış etdilər.

Sonra DSMF-nin sədri Səlim Müslümov deputatların qaldırdıqları məsələlərə münasibət bildirdi. İlk olaraq deputat Musa Quliyevin təklifinə toxunan Səlim Müslümov bu məsələnin öz həllini tapması üçün səy göstəriləcəyini dedi.

Səlim Müslümov bankomatlarla bağlı fikirlərə münasibət bildirərək dedi ki, DSMF dəfələrlə ölkə üzrə monitorinqlər keçirib. Bu monitorinqlərin nəticəsi olaraq Azərbaycan Beynəlxalq Bankına və Kapital Banka yeni bankomatların qoyulması üçün müraciətlər göndərilib. Səlim Müslümov bu məsələ ilə bağlı növbəti ildə müəyyən tədbirlərin həyata keçiriləcəyini diqqətə çatdırdı. DSMF sədri onu da bildirdi ki, bu gün Azərbaycan pensiyaların həcminə görə MDB məkanında lider dövlətlərdən biridir. Onun sözlərinə görə, orta aylıq əməkhaqqı isə gələn il ölkəmizdə təqribən 360 manat təşkil edəcək.

İclasda "Azərbaycan Respublikasında 2011-ci il üçün yaşayış minimumu haqqında", "Azərbaycan Respublikasında 2011-ci il üçün ehtiyac meyarının həddi haqqında", "Əlilliyin və uşaqların sağlamlıq imkanları məhdudluğunun qarşısının alınması, əlillərin və sağlamlıq imkanları məhdud uşaqların reabilitasiyası və sosial müdafiəsi haqqında", "Sosial sığorta haqqında", "Məşğulluq haqqında" Azərbaycan Respublikasının qanunlarına və Azərbaycan Respublikasının İnzibati Xətalar Məcəlləsinə dəyişikliklər və əlavə edilməsi barədə qanun layihələri də müzakirəyə təqdim olundu. Qanun layihələri ilə bağlı Milli Məclisin Sosial siyasət komitəsinin sədri Hadi Rəcəbli məlumat verdi. Bildirdi ki, respublikamızda 2011-ci il üçün yaşayış minimumu ölkə üzrə 95 manat, əmək qabiliyyətli əhali üçün 102 manat, pensiyaçılar üçün 72 manat, uşaqlar üçün 76 manat məbləğində müəyyən edilib. Ünvanlı dövlət sosial yardımının təyin edilməsi məqsədilə isə 2011-ci ilin üçün ehtiyac meyarının həddi 75 manat məbləğində təsdiq edilib.

Müzakirələr zamanı Milli Məclis Sədrinin müavini Valeh Ələsgərov, deputatlardan Siyavuş Novruzov və Aydın Mirzəzadə qanun layihələri ilə bağlı fikirlərini bildirdilər.

İclasda "Azərbaycan Respublikası Milli Məclisinin 2011-ci il üçün xərclər smetası haqqında" və "Azərbaycan Respublikası Hesablama Palatasının 2011-ci il üçün xərclər smetası haqqında" Azərbaycan Respublikası Milli Məclisinin qərar layihələri də müzakirə olundu.

Milli Məclisin İşlər müdiri Firudin Hacıyev bildirdi ki, Azərbaycan Respublikasının 2011-ci il üçün dövlət büdcəsindən Milli Məclisin və onun Aparatının saxlanılması üçün 17 milyon 566 min 801 manat vəsait nəzərdə tutulub. Milli Məclisin və onun Aparatının 2011-ci il üçün xərclər smetasının layihəsi qanunvericilikdə nəzərdə tutulmuş qaydalara uyğun olaraq ştat cədvəlləri, inzibati binaların mühəndis qurğularına xidmət göstərən təşkilatlarla bağlanmış müqavilələr və proqnozlar əsasında tərtib edilib. Xərclər smetasının ümumi dəyərinin 70,7 faizini əməkhaqqı fondu və əməkhaqqı ilə əlaqədar ayırmalar təşkil edir. Bundan başqa, Milli Məclisin 2011-ci il üçün xərclər smetasında ezamiyyə xərcləri üçün 1 milyon 18 min manat, rabitə xidmətlərinin haqqının ödənilməsi üçün 191 min 920 manat nəzərdə tutulur.

Firudin Hacıyev xərclər smetasının digər istiqamətləri barədə də ətraflı məlumat verdi.

Hesablama Palatasının sədri Heydər Əsədov dedi ki, növbəti ildə Hesablama Palatasının xərcləri üçün dövlət büdcəsindən 3 milyon 720 min manatın ayrılması nəzərdə tutulur. Bu vəsait Hesablama Palatasının fəaliyyətinə tam imkan verir.

İclasın sonunda Milli Məclisin Sədri Oqtay Əsədov qarşıdan gələn parlament seçkiləri ilə bağlı namizədliyini irəli sürmüş şəxslərə təbliğat və təşviqat kampaniyasında uğurlar arzuladı.

2011-ci ilin dövlət büdcəsi zərfinə daxil olan məsələlər Milli Məclisin oktyabrın 22-də keçiriləcək iclasında səsverməyə çıxarılacaq.

Azərbaycan.- 2010.- 14 oktyabr.- S. 1, 2.