İLLƏR KEÇİR

Desəm inanmassan bəlkədə mənə,

Sevgi nə olduğun səndən öyrəndim.

Elə aşiq oldum sən sevdiyinə,

Bəlkədə sevməzdim sən sevməsəydin.

O ilk söhbətimiz, sözümüz nə idi,

Yadında qalanı xatırla bir an.

Bəlkə də hardasa xətrinə dəydim,

Mən sənin əlindən tutduğum zaman.

Həyadan qızarmış yanaqlarında,

Sözlər qırıq-qırıq, kəlmələr ayrı.

Süzülüb bal kimi dodoqlarından,

Məni aparırdı sevgiyə sarı.

Bir misra sevgidən şeir deyəndə,

Duydum ki, qəlbinə hərarət gəldi.

Bir sönmüş sevgiyə boyun əyəndə,

Şad olub sevinmək necə gözəldir.

O xoşbəxt bir gündə qoyduq təməlin,

Əbədi sönməyən bir məhəbbətin.

Mən təzə bəy oldum, sən təzə gəlin,

Yandırdıq şamını əbədiyyətin.

İndi o illərdən neçə il keçir,

Kök salıb təmiz eşq iki ürəkdə.

İnanki sevgilim bu illər nədir,

Əsri qarşılarıq güllə çiçəklə.

Suliddin Yanar

Kaspi. -2010. – 13 aprel. – S.12.