ADNA-dakı terror üçün 50.000 dollar ayrılıbmış

Fərda Qədirovun ailəsini də öldürmək istədiyi müəyyən edilib

Aprelin 21-də Ağır Cinayətlərə Dair İşlər üzrə Məhkəmənin hakimi Ramella Allahverdiyevanın sədrliyi ilə Azərbaycan Dövlət Neft Akademiyasında (ADNA) törədilən kütləvi qətllə bağlı məhkəmə prosesi davam etdirilib. Məhkəmə qarşısında təqsirləndirilən Nadir Əliyev, Ariz Qabulov, Cavidan Əmirov və Nəcəf Süleymanov cavab verib.

İttiham aktına əsasən, aparılmış istintaq zamanı müəyyən edilib ki, Gürcüstan vətəndaşı olan və bu ölkənin Marneuli rayonunun Şulaveri kəndində yaşayan Qumaşyan Mardun Qriqoryeviç həmin rayonun Daştəpə kənd sakini Fərda Qədirov, onun qohumu Cavidan Əmirov, kənd sakinləri Nəcəf Süleymanov, Nadir Əliyev və nəhayət, şəxsiyyətləri istintaqa məlum olmayan digər şəxslərlə 2009-cu ilin yanvar-mart aylarında cinayət əlaqəsinə girib. O, azərbaycanlılara qarşı saxladığı milli ədavət zəminində bu şəxslərlə Bakıda terror aktı törədilməsi barədə razılığa gəlib. M.Qumaşyan bu cinayətin təşkili və həyata keçirilməsi üçün onlara 50 min dollar verəcəyini vəd edərək əvvəlcədən Fərda Qədirova 5 min dollar verərək, qalan məbləği cinayət törədildikdən sonra verəcəyini bildirib. O, Fərda Qədirov tərəfindən hələ 8 noyabr 2008-ci il tarixdə Tiflis şəhərindən aldığı "Makarov" tipli tapança və 200 ədəddən artıq patronun Azərbaycana keçirilməsi barədə razılığa gəlib.

Gürcüstanda məşq etdikdən sonra tək-tək Azərbaycana gəliblər

Fərda Qədirov cinayət əlaqəsində olduğu Cavidan Əmirov, Nadir Əliyev və Nəcəf Süleymanovla Daştəpə kəndində olan evinin alt mərtəbəsində tapançadan müxtəlif nişangahlara atəş açaraq məşq edib. Bundan sonra planlaşdırdıqları cinayəti həyata keçirmək üçün Cavidan Əmirov 2009-cu ilin 12 mart, Fərda Qədirov 13 mart, Nadir Əliyev 15 mart, Nəcəf Süleymanov isə 17 mart tarixlərində Bakı şəhərinə gəliblər. Fərda Qədirov Azərbaycana gələrkən tapançanı gizli keçirmək məqsədilə Marneuli-Bakı marşrutu ilə işləyən “Mercedes-0303” markalı SOU-900 Gürcüstan dövlət nömrə nişanlı avtobusun sürücü köməkçisi olan Ariz Qabulovla razılaşıb və tapançanı Azərbaycana keçirməyə nail olub. Həmin silahı və döyüş sursatlarını Ariz Qabulovun vasitəsilə kirayəyə götürdüyü B.Çobanzadə küçəsi 65, mənzil 35-də, eləcə də Cavidan Əmirovun müvəqqəti yaşadığı Suraxanı rayonu, Qaraçuxur qəsəbəsi, İ.Musayev küçəsi, mənzil 1-də saxlayıb.

Neft Akademiyasına gələrək “rol”larını müəyyən ediblər

İttiham aktına görə, cinayəti Cavidan Əmirovun təklifi ilə Bakının mərkəzində, xüsusi mühafizəsi olmayan, eyni zamanda çoxlu sayda tələbənin təhsil aldığı və əhali arasında vahimə yaradılması üçün əlverişli yer olan Dövlət Neft Akademiyasında törədəcəkləri barədə razılaşıblar. Apreldə Fərda Qədirov Cavidan Əmirov və Nadir Əliyevlə birlikdə həmin binaya gəlib və orada giriş-çıxış, cinayəti törətdikdən sonra qaçmaq yollarını, binanın 2-ci mərtəbəsindəki dəhlizin pəncərəsindən həyətə düşüb qaçmağın mümkünlüyünü müəyyən edib və törədəcəkləri cinayətdə “rol”ları bölüşüblər.

Bölgüyə görə, cinayət törədilən zaman Fərda Qədirov və Cavidan Əmirov akademiyanın binasına daxil olmalı, cinayəti törədərkən və hadisə yerindən qaçan zaman sonuncu Fərda Qədirova kömək etməli, həmin vaxt Nadir Əliyev isə pusquda dayanaraq polisin gəlməsi barədə mobil telefon vasitəsilə onlara məlumat verməli idi. Onlar cinayəti həyata keçirmək məqsədilə görüşəcəkləri vaxtı və yeri də müəyyən ediblər: 30 aprel 2009-cu il, saat 09.00 radələrində Bakı metropoliteninin “28 May” stansiyasının çıxışı qarşısında.

Və terror baş tutur

Lakin həmin gün Fərda Qədirov Cavidan Əmirov və Nadir Əliyevin gəlmələrini gözləmədən Mardun Qumaşyanla planlaşdırdığı cinayəti başa çatdırmaq üçün “Makarov” tipli tapança və külli miqdarda patronla silahlanaraq saat 09:30 radələrində Neft Akademiyasının 2-ci tədris binasının giriş qapısına yaxınlaşıb. O, binaya daxil olaraq 6-cı mərtəbəyədək qalxaraq qarşısına çıxan tələbə və müəllim heyətinə atəş açaraq qarşısına çıxanları öldürüb və digərlərini isə özündən asılı olmayan səbəblərdən öldürə bilməyərək yaralayıb.

Fərda Qədirov daha sonra polis əməkdaşlarının hadisə yerinə gəldiklərini bilib, hadisə yerindən qaçmaq imkanı olmadığından tapançadan baş nahiyəsinə atəş açaraq özünü öldürüb. Nəticədə 12 nəfəri öldürməklə və 15 nəfəri öldürməyə cəhd etməklə əhali arasında vahimə yaradıb. Neft Akademiyasına isə maddi cəhətdən 6030 manat məbləğində ziyan vurub.

F.Qədirov ailə üzvlərini də öldürməyi planlaşdırıbmış

Ailə üzvləri ilə tez-tez münaqişə edən Fərda Qədirov təbiətcə uşaqlıqdan qapalı insan olsa da, ermənilərlə münasibət qurmağa meyilli olub. O, telekanallarda dəhşətli və vahiməli döyüş səhnələri olan bədii filmlərə baxmaqla terrora maraq göstərib.

2008-ci ilin oktyabrında Fərda Qədirov səbəbini yaxınlarına bildirmədən Daştəpə kəndinə qayıdıb. Gürcüstana qayıtdıqdan sonra da qonşuları və kənddə olan qohumları ilə nadir hallarda görüşüb. 17 oktyabr 2008-ci il tarixdə silah almaq məqsədi ilə Tiflis şəhərinə gedib və orada tanış olduğu milliyyətcə erməni olan taksi sürücüsü Serqo Qriqoryana öz məqsədini bildirib.

Həmin tarixdən noyabrın 8-ə kimi bir neçə dəfə Tiflisdə Serqo Qriqoryanla birlikdə silah mağazasında, tibbi müayinədən keçmək üçün poliklinikada, DİN-in müvafiq departamentində olub, sonuncu silah üçün lazım olan sənədlərin alınmasında ona köməklik göstərib, hətta Fərda Qədirovun əvəzindən ərizə yazıb.

Fərda Qədirov ailə üzvlərini də öldürəcəyini planlaşdırıb.

Silahı aldıqdan sonra artıq 9 noyabr 2009-cu il tarixdə Fərda Qədirov “Alkatel” markalı mobil telefonuna gələcək hərəkətləri haqda videoçəkiliş edib.

10 noyabr 2008-ci il tarixdə isə Fərda Qədirov Marneuli şəhərində fotoatelyedə silahla fotoşəkil çəkdirib və arxasına rus dilində “U menya kajdıy şaq smert. 10 noyabr 2008 q. Qadirov Farda” sözlərini yazıb. Videoyazılarda Fərda Qədirov ailə üzvlərinə və ümumiyyətlə, bütün insanlara olan nifrətini göstərməklə, insanlardan gördüyü neqativ münasibətə görə onlardan qisas alacağını bildirib...

Zərərçəkənlər Fərdanın valideynlərinin məhkəməyə gətirilməsini istəyirlər

Məhkəmə prosesində hadisə zamanı qətlə yetirilən Taleh Məmmədovun anası Südabə Nağıyeva Fərda Qədirovun valideynlərinin prosesə dəvət olunmasını məhkəmədən xahiş edib: «Qoy gəlsinlər, görək övladlarına necə tərbiyə veriblər».

ADNA-nın II kursunda təhsil almış və hadisə zamanı öldürülən Yusif Bəndəliyevin qohumu Qurban Mehdiyev ifadəsinə başlamazdan əvvəl dövlət ittihamçılarına etirazını bildirib: «İttiham aktında Yusifin adı təsadüfi güllədən ölmüş şəxs kimi qeyd edilib. Əslində isə Yusif Bəndəliyev Fərda Qədirova müqavimət göstərərək canını fəda etməklə qrup yoldaşlarını xilas edib. Xahiş edirəm ittiham aktındakı cümlələr dəyişdirilsin. Baş verən hadisəyə siyasi qiymət verilsin. Hadisənin birmənalı olaraq terror aktı olması dövlət səviyyəsində deyilsin. Terrorçuları müdafiə edən vəkillər xalqdan üzr istəsin. Azərbaycan dövləti ermənini tutub bura gətirsin».

Dövlət ittihamçısı Abdulla Yusifov isə bildirib ki, Mardun Qumaşyan barəsində ayrıca cinayət işi var və o da, təqsirləndirilənlərə verilən maddələrlə ittiham olunur.

Daha sonra terror zamanı öldürülən Taleh Məmmədovun anası Südabə Nağıyeva ifadə verib: «Mardun Qumaşyan məhkəməyə gətirilərək dindirilsin. Ermənilərlə əlbir olub min dollardan ötrü belə bir cinayət törədənləri parçalamaq lazımdır».

Zərərəçəkən Cavanşir Bağırov isə təqsirləndirilən şəxslərin günahları sübuta yetiriləcəyi təqdirdə onlara ən ağır cəza verilməsini istəyib: «Əgər bu adamların günahı yoxdursa, açın buraxın. Biz övladlarımızın qanını tökən şəxslərə cəza verilməsini istəyirik. Haqsız yerə kimisə tutmaq bizə heç nə verməyəcək. Bu işə siyasi qiymət verilsin. Terror olduğunu dövlət səviyyəsində desinlər».

Prokuror Abdulla Yusifov isə təqsirləndirilənlərin terrorda iştirak etdiyini qeyd edib: «Təqsirləndirilənlərə terrorçuluqla bağlı ittihamlar verilib. İstintaq belə nəticəyə gəlib ki, bu şəxslər terrorda iştirak ediblər. Amma bu o demək deyil ki, bu şəxslər həmin cinayəti törədiblər. Bu məsələ məhkəmə istintaqı zamanı ya təsdiq olunacaq, ya da təsdiqini tapmayacaq. Son söz məhkəmənindir».

ADNA-nın müəllimi, terror zamanı üz nahiyəsində güllə yarası alan Faiq Rüstəmbəyov ifadə verib. O, Fərda Qədirovun valideynlərinin məhkəməyə dəvət olunmasını istəyib.

Günün ikinci yarısında ADNA-nın “Neft-qaz istehsalı və emalı texnikası” kafedrasının müəllimi Məcnun Vahidovun oğlu Əziz Vahidov bildirdi ki, akademiyada terror aktının törədilməsini eşidəndən sonra hadisə yerinə gedib. Onun sözlərinə görə, akademiyanın qarşısında yaralıların xəstəxanalara aparıldığını eşidib və Respublika xəstəxanasına yollanıb: “Mən Respublika Xəstəxanasına çatanda atamın öldüyünü eşitdim və həkimlər dedi ki, atam baş nahiyəsindən aldığı güllə yarasından dünyasını dəyişib”.

Daha sonra prosesdə zərərçəkmiş qismində akademiyanın tələbəsi İlkin Şıxəliyev ifadə verib: «Həmin gün bizim birinci dərs olmayıb və ikinci dərs saatını gözləyirdik. Təxminən saat 10.25 radələrində partlayış səsi eşitdik. Bir neçə saniyə sonra yanıma bir güllə düşdü. Bildim ki, kimsə atəş açır. Uşaqlara dedim ki, gizlənin atəş açırlar. Özümüzü qorumaq üçün dərs zalının qapısını arxadan bağladıq ki, atəş açan şəxs içəri daxil olmasın. Lakin atəş açan şəxs içəri daxil olmaq istəyirdi. O, qapını aça bilmədiyi üçün pəncərənin şüşəsini sındırıb, biz olan tərəfə atəş açmağa başladı. Mən həmin dəqiqə yerə yıxıldım. Yerə yıxılandan sonra hiss etdim ki, qarın nahiyəmdən qan axır. Qorxumdan yerimdən tərpənmirdim. Buna görə də çoxlu qan itirmişdim. Mənimlə bərabər tələbə yoldaşım Elvin Cəmiyev də boğazından yaralanmışdı».

Prokurorun suallarını cavablandıran zərərçəkmiş Fərda Qədirovun tək olduğun bildirib. Onun sözlərinə görə, Fərda Qədirovu üzdən də görüb: “Fərdanın əcaib sifəti vardı. Elə bil ki, adama oxşamırdı. Özü də həyəcanlı idi. İstəyirdi ki, hamını öldürsün. Mənə elə gəldi ki, o, meymundur. Üzündə, baxışlarında qəzəb vardı”.

Daha sonra hadisə zamanı oğlu Emini itirən İra Abdullayeva ifadə verib. O bildirib ki, oğlunun ölüm xəbərini telekanallarda gedən xəbərlər proqramından eşidib: “Akademiyada hadisə barədə mənə xəbər veriləndə, tez oğluma zəng etdim. Telefona bir polis cavab verdi və dedi ki, Emin burda deyil. Sonra bacım oğluna zəng etdim və o da məni aldatdı. Sən demə, polis də, bacımın oğlu da Eminin cəsədinin yanında imişlər”.

İra Abdullayeva Fərda Qədirovun istifadə etdiyi silahla belə cinayəti törətməyin mümkün olmadığını söyləyib: “Tapança ilə bu qədər atəş açmaq olmaz. Bunu mən dəqiq bilirəm. Belə silahın lüləsi tez qızır. Ona görə də, mən inanmıram bu silahla onlara atəş açılıb. Bu silah xüsusi hazırlanıb və məqsədli şəkildə istifadə edilib. Lakin istintaq bu silahın necə və harada hazırlanmasını müəyyən etməyib. Fərda Qədirovun bu hadisəni tək törətməsinə inanmıram. Cinayət işinin 64-cü səhifəsində yazılır ki, Fərda Qədrov 4-cü mərtəbədə üç tələbə ilə əlbəyaxa olub. Necə olur ki, Fərda Qədirovla üç tələbə bacara bilməyib. Fərda Qədrovun tək olması inandırıcı görünmür. Burada bir neçə şəxs olub”.

Məhkəmə prosesi mayın 3-də davam etdiriləcək.

Ayxan

Kaspi. -2010. – 22 aprel. – S.10.