Həm jurnalist, həm də qəhrəman

Alı Mustafayev 1952-ci ilin 14 aprelində Qazax rayonunun Qarabəyli kəndində dünyaya göz açıb. 1976-1981-ci illər arasında Azərbaycan Dövlət Universitetinin Jurnalistika fakültəsində təhsil alan gənc jurnalist dolğun, məzmunlu reportajları, oçerk və müsahibələrində olan operativliyi ilə daim həmkarlarından seçilirdi. Ermənistanın Azərbaycana hücumları dövründə də Qarabağın bir sıra nöqtələrindən reportajlar hazırlayaraq günün ən aktual məsələlərini işıqlandırırdı. 1991-ci ildə «İlin ən yaxşı jurnalisti» adını alan reportyor elə həmin ilin ya noyabrında Qarakənd yaxınlığında baş verən vertolyot qəzası nəticəsində şəhid olur. Ölümündən sonra ona Milli Qəhrəman fəxri adı verilir. Alı Mustafayevin xatirəsi aprelin 18-də BDU-nun jurnalistika fakültəsinin tələbələri və müəllim heyəti tərəfindən anılıb. Baş tutan görüşdə tələbələr Alı Mustafayevin qrup yoldaşları ilə tanış oldular. BDU-nun jurnalistika fakültəsinin tələbəsi Aysel Fərziyeva tədbir haqda bizə bir sıra məlumatlar verdi: «Alı Mustafayev həm jurnalist, həm də qəhrəman idi. Doğum günü ilə əlaqədar keçirilən anım mərasimində 1981-ci ilin məzunları – «Xalq qəzeti»nin bölgə müxbiri İlqar Həsənov, İctimai Televiziyanın əməkdaşı Qərənfil Xəlilova, Beynəlxalq Bankın mətbuat xidmətinin rəhbəri Rauf Ağayev, «Ekran-efir» qəzetinin baş redaktorunun müavini Mirzə Yusifov, Ali Məhkəmənin mətbuat xidmətinin rəhbəri Allahverən Məmmədov qonaq qismində iştirak edirdi.

Tədbiri açıq elan edən Məmməd Ağayev bildirib ki, «Gənc reportyorlar klubu»nın üzvləri Alı Mustafayevi özlərinə mənəvi müəllim hesab edir. Jurnalistin anım mərasimi elə onun təbiətinə uyğun tərzdə keçdi».

Məhərrəmova N.

Kaspi. -2010. – 26 aprel. – S.13.