Zakir Qaralov yenidən baş prokuror seçildi

O, prokurorluğun bundan sonra da dövlətçilik maraqlarının müdafiəsində qalacağını, insan hüquqlarının etibarlı qorunması və cinayətkarlığa qarşı mübarizədə daha ciddi mövqe tutacağını bildirdi

Milli Məclis Zakir Qaralovun növbəti 5 il müddətinə Respublikanın baş prokuroru seçilməsi ilə bağlı ölkə prezidenti İlham Əliyevin göndərdiyi təqdimatı təsdiqlədi. Deputatlar 103 nəfər lehinə, 6 nəfər əleyhinə olmaqla təqdimata müsbət rəy verdilər.

Milli Məclisin sədri Oqtay Əsədov Z.Qaralovu 10 ildir tanıdığını bildirərək onu dərin savada malik hüquqşünas kimi xarakterizə etdi. Onun sözlərinə görə, Z.Qaralov baş prokuror vəzifəsində çalışdığı 10 il müddətində çox səmərəli çalışıb və böyük təcrübə toplayıb. «İnanıram ki, Zakir müəllim topladığı təcrübə və bacarığı növbəti 5 il müddətində də uğurla sərf edəcək» - deyə spiker vurğuladı.

Milli Məclisin hüquq siyasəti və dövlət quruculuğu komitəsinin sədri Əli Hüseynov Z.Qaralovun rəhbərliyi dövründə prokurorluğun müasir tələblərə uyğun tam yeniləşdiyini bildirdi. O qeyd etdi ki, respublikada işçilərin tam şəffaf qaydada test üsulu ilə verilən imtahandan sonra işə qəbulu ilk olaraq məhz prokurorluq orqanlarında reallaşdırılıb. Bunun nəticəsidir ki, hazırda prokurorluq orqanlarında çalışanların 40 faizini gənclər təşkil edir. Ə.Hüseynov ötən illər ərzində Respublika Prokurorluğunda müasir texnologiyaların geniş tətbiq edildiyini və beynəlxalq əlaqələrin qurulduğunu bildirdi. Onun sözlərinə görə, prokurorluğun nəzdində fəaliyyət göstərən Korrupsiyaya Qarşı Mübarizə İdarəsinin fəaliyyəti beynəlxalq təşkilatlar tərəfindən də təqdir olunur. «Bir sözlə, son illər Azərbaycan prokurorluğunun tarixində yeni inkişaf mərhələsi başlayıb» - deyə komitə sədri vurğuladı.

Bundan sonra çıxış edən millət vəkilləri baş prokuror kimi Z.Qaralovun fəaliyyətindən razılıqlarını ifadə etdilər.

Deputatlar qarşısında çıxış edən Z.Qaralov ona göstərilən etimada görə, təşəkkürünü çatdırdı.

Son 5 ildə 265 cinayət işinin istintaqı tamamlanaraq məhkəmələrə göndərilib

O qeyd etdi ki, son 5 ildə Respublika Prokurorluğunda 400 şəxs barəsində 265 cinayət işinin istintaqı tamamlanaraq məhkəmələrə göndərilib. 2009-cu ildə isə prokurorluq orqanlarının istintaqını başa vurub məhkəmələrə göndərdiyi cinayət işlərinin sayı 133 olub. Hazırda Respublika Prokurorluğu yanında Korrupsiyaya Qarşı Mübarizə İdarəsinin icrasında 48 cinayət işinin istintaqı aparılır.

Ziya Bünyadovun qətlinin təşkilatçıları İranda sığınacaq tapıblar

Baş prokuror bir sıra qalmaqallı qətllərlə bağlı açıqlamalar da verdi. O qeyd etdi ki, 1997-ci ildə qətlə yetirilmiş azərbaycanlı akademik Ziya Bünyadovun qətlinin təşkilatçıları hazırda qonşu İran İslam Respublikasında sığınacaq tapıblar. Müxalifətin bu qətl işini siyasiləşdirməyə çalışdığını vurğulayan baş prokuror işin istintaqının tamamilə başqa nəticələr üzə çıxardığını vurğuladı: «İstintaq müəyyən etdi ki, bu qətl İran İslam Respublikasının dini dairəsi tərəfindən həyata keçirilib. Bununla bağlı, qətldə iştirak edən konkret şəxslər məsuliyyətə cəlb ediliblər. Qətlin təşkilatçılarından olan Cavanşir Aslan və Tariel Ramazanov isə hazırda İranda sığınacaq tapıblar».

Elmar Hüseynovun qətli ölkədə siyasi sabitliyi pozmağa hesablanıbmış

Z.Qaralov bəzi xarici qüvvələrin ölkədə siyasi sabitliyi pozmağa çalışdıqlarını bildirdi. Onun sözlərinə görəÖ, 2005-ci ildə parlament seçkiləri ərəfəsində «Monitor» jurnalının baş redaktoru Elmar Hüseynovun qətlə yetirilməsi də məhz bu məqsədə xidmət edib. Z.Qaralov dedi ki, E.Hüseynov öldürülən günün səhəri prezident İlham Əliyev Təhlükəsizlik Şurasının iclasını keçirib. Bundan sonra baş prokuror Avropa Birliyinə üzv olan ölkələrə rəsmi müraciət edərək E.Hüseynovun qətlinin istintaqına xarici ekspertlərin cəlb olunmasını xahiş edib. İstintaq qətlin şəxslər tərəfindən törədildiyini yerli və xarici ekspertlərin iştirakı ilə sübuta yetirib. Hazırda cinayət işinin istintaqını aparan Milli Təhlükəsizlik Nazirliyi iş üzrə əməliyyat-axtarış tədbirlərini davam etdirir.

“Siyasi partiyaların haradan maliyyələşməsi barədə ictimaiyyətə məlumat verilməsinin zamanı çatıb”

Z.Qaralov bəzi xarici qüvvələrin ölkədəki siyasi partiyalar vasitəsi ilə ictimai-siyasi vəziyyəti gərginləşdirməyə çalışdıqlarını vurğuladı. Onun sözlərinə görə, artıq Azərbaycandakı siyasi partiyaların haradan maliyyələşməsi barədə ictimaiyyətə məlumat verilməsinin zamanı çatıb: «Ölkədəki siyasi korrupsiyadan danışan müxalifət təmsilçiləri təmsil olunduqları partiyaların haradan maliyyələşməsi barədə məlumat versələr, daha yaxşı olar. Onlar ölkədəki siyasi sabitliyi pozmağa necə cəhd göstərmələri ilə bağlı bəyanatlar verməlidirlər». Z.Qaralov Respublika Prokurorluğunun bundan sonra da dövlətçilik maraqlarının müdafiəsində qalacağını, insan hüquq və azadlıqlarının etibarlı qorunması və cinayətkarlığa qarşı mübarizə işində daha ciddi mövqe tutacağını, ölkədə ictimai-siyasi sabitliyin pozulmasına imkan verməyəcəyini dedi. «rəngli yuxular görən yoldaşlar elə rəngli yuxular görə-görə də qalacaqlar».

İlham Quliyev

Kaspi. -2010. – 28 aprel. – S.3.